Շուռնուխցիները գյուղը չեն թողել փախել, բայց տհաճ է, երբ թշնամին մոտ է մեզ. Շուռնուխի համայնքապետ

Համայնքում, իհարկե, մարդիկ վտանգ զգում են, որովհետև, երբ աչքերդ բացում ես ու ճանապարհին թուրքն է կանգնած, կանհանգստանան, այնպես չէ, որ գյուղը թողեցին, փախան, չկա նման բան, ուղղակի այդ տհաճ երևույթն է, որ թշնամին մոտ է մեզ: Այս մասին Tert.am-ի հետ զրույցում ասաց Սյունիքի մարզի Շուռնուխ համայնքի ղեկավար Հակոբ Արշակյանը՝ խոսելով ադրբեջանական զորքի՝ ՀՀ-ում գտնելու մասին, համայնքներում փոփոխված իրավիճակի ու գյուղացիների հոգեվիճակի մասին:

Հակոբ Արշակյանը նշեց, որ կոնկրետ Շուռնուխ համայնքում ադրբեջանական կողմը առաջ չի եկել և ինչպես տեղակայվել էին հունվար ամսից, այդպես էլ մնացել են: «Մինչև հիմա առաջ չեն եկել, իրենց տեղում են: Այս պահին համայնքը հսկում է մեր ԱԱԾ սահմանապահ զորքը, ռուսական զրահատեխնիկա է տեղակայված՝ իրենց դրոշով, մի հինգ հոգի էլ ռուս խաղաղապահներ կան»:

Ադրբեջանական զորքերի՝ ՀՀ տարածք գալու մասին համայնքի ղեկավարը նշեց, որ մյուս համայնքների համեմատ, իրենց համայնքում գողության դեպքեր, միջադեպեր չեն եղել, բայց եղել  է, երբ հայկական կողմից անասուններ անցել են մյուս կողմ, և թշնամին դրանք հետ չի վերադարձրել: «13 գլուխ անասուն մեկ է անցել, 6 գլուխ անասուն՝ մեկ, ու հետ չեն վերադարձրել»:

Արշակյանը կարծիք հայտնեց, որ իշխանությունն անպայմանորեն պետք է գյուղն ազատի ադրբեջանցիներից, և վերջնական այն անցնի հայկական վերահսկողության տակ: «Համոզված եմ, որ այդ GPS-ը, որով սահման են գծել, կեղծ է, սուտ է, այն տարածքը, որն անցել է հակառակորդին, այդ թաղամասն ընդհանուր Հայաստանի սուվերեն տարածք է»:

Համայնքի ղեկավարը նշեց, որ սահմանազատման պատճառով իրենց տները կորցրած բնակիչները տեղափոխվել են գյուղի դատարկ տներ, Գորիսում երեք ընտանիք վարձով է ապրում: «Մարզպետարանի կողմից երկու ընտանիքի տնակ են տվել»: