ՀՀ-ն չհայտարարված, բայց փաստացի պատերազմական իրավիճակում է․ երկրում գտնվող թշնամական զորախումբը եկել է իրեն խոստացվածի հետևից և երաշխիք ունի, որ չի արժանանալու ռազմական դիմադրության․ Վ․ Մարտիրոսյան
Հայաստանը գտնվում է չհայտարարված, բայց փաստացի պատերազմական իրավիճակում։ Այս մասին Tert.am-ի հետ զրույցում ասաց քաղաքագետ, «Մեկ Հայաստան» կուսակցության խորհրդի անդամ Վլադիմիր Մարտիրոսյանը՝ անդրադառնալով սահմանային իրադրությանն ու այսօր նախատեսված բանակցություններում ադրբեջանական կողմի չներկայանալուն։
Ըստ Մարտիրոսյանի՝ իշխանությունը փորձում է ստեղծել իմիտացիա, թե իրավիճակը վերահսկվում է, մինչդեռ չի կարող պետությունում անվտանգային իրավիճակը վերահսկելի համարվել այն պարագայում, երբ սահմանը խախտել է թշնամի պետության զինվորական ուժը։ Ադրբեջանի՝ բանակցություններին չներկայանալը, քաղաքագետի խոսքով, նշանակում է, որ այդ երկիրն այլ ասելիք, քան նախկինում ասվածը, չունի, և իր նախապայմաններից ու պահանջներից չի նահանջելու։
«Իրականությունն այն է, որ մեր պետության տարածքում գտնվում է թշնամական զորախումբ՝ այն էլ՝ շատ հանգիստ ռեժիմով, ինչը նշանակում է, որ այդ զորախումբը երաշխիք ունի, որ չի արժանանալու ռազմական դիմադրության, և եկել է իրեն խոստացվածի հետևից։ Սա է այն հենաքարը, որից պետք է սկսել այս ողջ գործընթացի պարզաբանումը։ Պատերազմից հետո Փաշինյանը 6-ամսյա ժամանակահատված էր խնդրում՝ ներքին գործընթացներում իր քաղաքական շնչառությունը կայունացնելու համար, որ հետո նաև կարողանա բավարարել այն խոստումները, որոնք, իմ կարծիքով, տրվել են։ Ադրբեջանցիներն ուղղակի չեն եկել ու հավաքվել այն տարածքներում, որտեղ հիմա են»,-ասաց նա։
Վլադիմիր Մարտիրոսյանը նշեց, թե այն տեղեկատվական «թմրանյութը», որ տրվում է հասարակությանը հանգստացնելու համար, որևէ կապ չունի իրական մարտահրավերների հետ։
«Մենք այսօր ոչ միայն այս մարտահրավերներն ադեկվատ չենք գնահատում, այլև խորացնում ենք դրանք՝ չլուծելով և վերջնականապես «սպանելով» պետության բոլոր ոլորտների, այդ թվում՝ անվտանգային դիմադրողականությունը։ Մեր երկրի անվտանգային շեմը հատած և այլևս մեր երկրում գտնվող թշնամական զինվորական խմբավորումների առկայությունը հարձակում չներկայացնելու՝ իշխանության փորձը ընդունել կարող են միայն Նիկոլ Փաշինյանի փոքր ընտրազանգվածի ներկայացուցիչները»,- ասաց նա՝ նշելով, թե մյուսները հասկանում են, որ այն իրավիճակը, որում այսօր գտնվում է ՀՀ-ն, կոչվում է պատերազմական։
«Պետության կառուցվածքային տրամաբանության տեսանկյունից անհնար է հասկանալ՝ ինչ է նշանակում, երբ քո սուվերեն տարածք մուտք են գործում թշնամի երկրի զինված ներկայացուցիչներ․ դա այլ կերպ ձևակերպել, քան պատերազմական իրավիճակ, անհնար է։ Զարմանում եմ, թե ինչու են մարդիկ միայն ԱՄՆ Պետդեպի հայտարարությունից հետո հասկանում, որ ռեալ է պատերազմի վտանգը»,-ասաց նա։
Ինչ վերաբերում է ՀՀ-ի կողմից ՀԱՊԿ-ին դիմելուն, քաղաքագետն ասաց, թե դրա ենթատեքստը հետևյալն է՝ ՀՀ-ն փորձում է իր անվտանգային խնդիրների լուծման հիմնական բեռը դնել ՀԱՊԿ-ի վրա՝ նույնիսկ չփորձելով գնալ լուծման՝ սեփական ռազմական պոտենցիալի օգտագործմամբ, ինչը, քաղաքագետի խոսքով, միայն ուղղակի հակամարտության մեջ մտնելը չէ։
«Մենք չենք բանակցում մեր սուվերեն տարածքը խախտած թշնամական զորախմբի ղեկավարության հետ, այդ ֆունկցիոնալությունը օտարել ենք մեզնից՝ դնելով միջազգային անվտանգային կառույցի վրա, որի մասն ենք։ ՀԱՊԿ-ի՝ կտրուկ քայլերի գնալը այս պարագայում կբացառեմ, կարծում եմ՝ կգնա պրոցեսների զսպման, ոչ թե այս կամ այն կողմի պաշտպանության ուղղությամբ։ Մի բան հստակ է՝ ՀՀ-ն իր անվտանգային համակարգի կենսունակությունն ապահովելու որևէ քայլ չի կատարել, բարձիթողի իրավիճակ է եղել, անվտանգային հարցի լուծումը թողնվել է հովիվների վրա, և սա անմիջականորեն խոսում է այն մասին, թե երկրի ղեկավարությունն ինչպիսի վերաբերմունք ունի իր պետության անվտանգային համակարգի, օրեցօր ավելացող մարտահրավերների նկատմամբ»,- ասաց Վլադիմիր Մարտիրոսյանը։
Тотально используя административный ресурс, он «ненавидит» административный ресурс? «Паст»
Великая Победа и великий подвиг армянского народа. Арман Варданян
Чтобы ни одна стена не осталась без фотографии Никола Пашиняна: «Паст»
Сын Мадуро рассказал, что его отец сидит в общей камере на 18 человек
Чья кандидатура будет выдвинута на пост президента Союза армян России? «Паст»
Ваге Овеян разгромил соперника и стал чемпионом Европы по греко-римской борьбе
Властям содержание не нужно: «Паст»
Идеологическая подготовка нового давления на Армению. «Паст»
Здание семинарии было возвращено армянской епархии при поддержке Самвела Карапетяна: «Паст»
BBC: Звучит как угроза: Путин за месяц до выборов напомнил Армении об Украине
