Թալիշի զորամասին կից խանութի տերը պատերազմի ընթացքում զինծառայողների բանկային քարտերից գումար է կանխիկացրել
Թալիշի զորամասին կից խանութի սեփականատերը պատերազմի ընթացքում զինծառայողների բանկային քարտերից տարբեր չափերի գումար է կանխիկացրել՝ պատճառաբանելով, թե դրանք եղել են զինծառայողների պարտքերը։ Թալիշում չկար գումար կանխիկացնելու որևէ միջոց, այդ իսկ պատճառով զինծառայողներն իրենց բանկային քարտերը տալիս էին խանութպանին, որպեսզի վերջինս գումար կանխիկացնի և վերցնի խանութից գնված ապրանքների դիմաց։ Խանութպանը պատերազմի ընթացքում կանխիկացրել է ավելի շատ գումար, քան զինծառայողների պարտքն է եղել։ Զոհված զինծառայողի մայրը, պարզելով, որ տղայի բանկային քարտը խանութպանի մոտ է, և դրանից ընդհանուր 97 հազար դրամ է կանխիկացվել դիմել է ոստիկանություն։ Հարուցվել է քրեական գործ։ Այս մասին գրում է Hetq.am-ը:
Զինծառայող Գևորգ Քարտաշյանի հետ տան անդամները կապը կորցրել են պատերազմի առաջին օրը՝ սեպտեմբերի 27-ին։ Նա ծառայում էր Թալիշի զորամասում։ Հոկտեմբերի 7-ին նրա անունը հրապարակվել է զոհվածների ցուցակում, բայց տղայի աճյունը չի հայտնաբերվել, հետո նրա անունը տեղափոխվել է անհետ կորածների ցուցակ և միայն 2021 թվականի հունվարի 21-ին՝ զոհվելուց 4 ամիս անց, ԴՆԹ անալիզի միջոցով նույնականացվել է նրա աճյունը։
Գևորգի ընտանիքն ապրում է Լոռու մարզի Տաշիր քաղաքում։ Գևորգի մայրը՝ Աիդա Ամիրխանյանը, այդ ընթացքում մի քանի անգամ Տաշիրից Երևան է գնացել, տարբեր կառույցների դիմել տղայի մասին լուր իմանալու համար։
Գևորգի մորը հունվարի 21-ին Պաշտպանության նախարարությունից նաև հայտնել են, որ կարող է գնալ Արցախբանկ, ստուգել տղայի բանկային հաշիվը և կանխիկացնել տղայի հաշվին առկա գումարը։
Պատերազմից առաջ Գևորգ Քարտաշյանը Թալիշում գտնվող Գագիկ Աբրահամյանին պատկանող խանութից պարտքով զինվորական համազգեստ էր գնել, պարտքի մասին մայրն իմացել էր ու սեպտեմբերի 26-ին որդու հաշվեհամարին 15 000 դրամ գումար էր փոխանցել, որպեսզի նա վճարի ձեռք բերած համազգեստի համար։
Աիդան գնացել է Արցախբանկ, քանի որ կարծել է, որ կարող է տղան հասցրած չլինի գումարը կանխիկացնել և համազգեստի գումարը վճարել խանութպանին։
Ստուգելով տղայի հաշիվը՝ Աիդան տեսել է, որ տղայի հաշվին գումար չկա։ Երբ դիմել է Արցախբանկ իմանալու, թե ո՞վ է կանխիկացրել որդու հաշվից գումարը Աիդային հայտնել են, որ սեպտեմբերի 27-ից տղայի քարտից գումար կանխիկացվել է 3 անգամ, առաջին անգամ՝ Ստեփանակերտի բանկոմատից, 2-րդ անգամ Շուշիից, իսկ 3-րդ անգամ՝ Չարենցավանի բանկոմատից, դեկտեմբերի 31-ին։ Ընդհանուր Գևորգ Քարտաշյանի հաշվից կանխիկացվել է 97 000 դրամ։
Աիդան Արցախբանկի աշխատակիցներին խնդրել է տրամադրել բանկոմատների տեսագրությունը, որպեսզի կարողանա պարզել, թե ով է եղել որդու քարտից գումար կանխիկացնողը, սկզբում կնոջը մերժել են, հետո` տրամադրել։
Բանկոմատի տեսագրության լուսանկարները, որպես ապացույց, մեզ է տրամադրել Աիդա Ամիրխանյանը։ Առաջին լուսանկարում՝ Գագիկ Աբրահամյանը Ստեփանակերտի բանկոմատից գումար կանխիկացնելիս։ Երկրորդ լուսանկարում` Գագիկի եղբորորդին, Չարենցավանի «Արդշինբանկի» բանկոմատի մոտ։
Աիդա Ամիրխանյանը, որ մինչ այդ տղայից որևէ լուր ունենալու համար գտել էր տղայի զինակից ընկերներին, կապվել է նրանց հետ, ուղարկել բանկոմատի տեսագրությունից արված լուսանկարը, տղաներն, ասել են, որ դա Գագիկ Աբրահամյան անուն, ազգանունով մարդն է, որը Թալիշում զորամասին կից խանութ է ունեցել, և բոլոր զինծառայողներն անհրաժեշտության դեպքում օգտվել են նրա խանութից։ Տղաները Աիդային ասել են` քանի որ Թալիշում բանկոմատ չի եղել խանութպանը զինծառայողներին ապրանք է տրամադրել, հետո հավաքել նրանց բանկային քարտերը, պարտքի չափով գումար կանխիկացրել, վերցրել ու քարտը վերադարձրել զինծառայողներին։ Պատերազմի ընթացքում էլ մի շարք զինծառայողների բանկային քարտեր եղել են Գագիկի մոտ, քանի որ նա դրանք չի հասցրել վերադարձնել զինծառայողներին։
Աիդա Ամիրխանյանը նույն օրը դիմել է ոստիկանություն, ներկայացրել փաստերը, հարուցվել է քրեական գործ, որին, կնոջ խոսքով, ընթացք չի տրվել։ Երևանից քրեական գործը տեղափոխել են Չարենցավանի բաժին։
Կնոջը ոստիկանությունում ասել են, որ գործը Երևանից տեղափոխվել է Չարենցավանի բաժին, քանի որ վերջին անգամ գումար հանվել է Չարենցավանի «Արդշինբանկի» բանկոմատից։
Ըստ Աիդա Ամիրխանյանին Չարենցավանի ոստիկանությունից ուղարկված ծանուցագրի` փետրվարի 1-ին իր հաղորդման հիման վրա հարուցվել է քրեական գործ։ Մինչ օրս Աիդային հարցաքննության չեն կանչել։
Հարուցված քրեական գործում որպես վկա ներգրավված է նաև զոհված Գևորգ Քարտաշյանի զինակից ընկերը՝ Հակոբ Ենոքյանը։ Հակոբը մեզ հետ զրույցում նշեց, որ իր քարտը ևս եղել է Գագիկ Աբրահամյանի մոտ։ Հակոբը պատերազմում վիրավորվել էր, ապաքինվելուց հետո տեղափոխվել էր Նոր Ալաշանի զորամաս, որտեղ հանդիպել է Գագիկ Աբրահամյանին, Հակոբի խոսքով՝ նրան այնտեղ բնակվելու տարածք էին հատկացրել։ Այդ ժամանակ Հակոբը Գագիկից խնդրել է իր քարտը, վերջինս ասել է, որ իր ու էլի զինծառայողների քարտեր թողել է Թալիշի զորամասում։ Հակոբի քարտից էլ պատերազմից հետո Գագիկ Աբրահամյանը կանխիկացրել է 20 000 դրամ, որը մի քանի անգամ գերազանցում է Հակոբի ունեցած պարտքը։
Կապ ենք հաստատել նաև Գագիկ Աբրահամյանի հետ, վերջինս մեզ հետ զրույցում չի հերքել այն հանգամանքը, որ տարբեր ժամանակներում զինծառայողների բանկային քարտերը եղել են իր մոտ։ Իր խոսքով՝ քարտերը պահել է, որպեսզի անհրաժեշտության դեպքում դրանցից գումար հանի, քանի որ Թալիշում չկար բանկոմատ, ու զինծառայողները Գագիկից ապրանք գնել են պարտքով։ Քարտերի մեծ մասը, իր խոսքով, մնացել է զորամասում։ Գագիկը մեզ հայտնեց, որ իրեն կանչել են Չարենցավանի բաժին հարցաքննության, ոստիկանություն Գագիկը ներկայացրել է մի քանի բանկային քարտ և պարտքերի տետր, որի մեջ նշված է եղել զինծառայողների կուտակած պարտքի չափը։ Աբրահամյանը նշեց, որ Թալիշի զորամասի զինծառայողները ընդհանուր հաշվով մոտ 1 700 000 դրամի պարտք էին կուտակել, բայց ինքը պատերազմից հետո ոչ ոքից գումար չի ուզել։
Գագիկն ասաց, որ չգիտեր նաև Գևորգ Քարտաշյանի զոհվելու մասին, բայց քանի որ զինվորը պարտք է եղել իրեն մի քանի անգամ ստուգել է քարտի վրա արդյոք գումար կա, որպեսզի կանխիկացնի:
Գագիկ Աբրահամյանը Քարտաշյան Գևորգի հաշվից ընդհանուր առմամբ կանխիկացրել է 97 000 դրամ, որից 15 000-ը զինվորի` պարտքով գնած համազգեստի գումարն էր։ Գագիկը նշում էր, որ մնացած գումարն էլ՝ 82 000 դրամ, այլ ժամանակներում Գևորգի կուտակած պարտքն է։ Մինչդեռ Հակոբ Ենոքյանը, որը ծառայում էր Գևորգի հետ նույն վաշտում, ինչպես նաև քրեական գործում ներգրավված է որպես վկա, պնդում էր, որ Գագիկը այդ չափի գումարի ապրանք պարտքով ոչ ոքի չէր տալիս և հնարավոր չէր, որ Գևորգը այդքան պարտք կուտակած լիներ։ Ըստ Հակոբի՝ մոտ 100 հոգու բանկային քարտ մնացել էր Գագիկի մոտ։
Վերջին անգամ՝ դեկտեմբերի 31-ին, Գևորգ Քարտաշյանի հաշվից Չարենցավանի «Արդշինբանկի» բանկոմատից գումար է կանխիկացրել Գագիկ Աբրահամյանի եղբորորդին։ Գագիկը նշեց, որ ինքը բանկոմատից գումար կանխիկացնել չի կարողանում, դրա համար էլ դիմել է եղբորորդու օգնությանը, վերջինս այդ օրը 74 000 դրամ է կանխիկացրել։ Առաջին տեսագրությունում, սակայն, գումար կանխիկացնողը անձամբ ինքը՝ Գագիկ Աբրահամյանն էր։
Գագիկ Աբրահամյանը ծնունդով Կոտայքի մարզի Չարենցավան քաղաքից է, բայց ապրում էր Թալիշում։ Ըստ Հայաստանի Հանրապետության ընտրողների ռեգիստրի՝ Գագիկ Աբրահամյանը գրանցված է Չարենցավան քաղաքում։
Հարուցված քրեական գործի վերաբերյալ պաշտոնական տեղեկատվություն ստանալու համար հարցում էինք ուղարկել նաև Քննչական կոմիտե։ Մեր հարցմանն ի պատասխան Քննչական կոմիտեից հայտնել են, որ Աիդա Ղարիբի Ամիրխանյանի հաղորդման հիման վրա 2021 թվականի փետրվարի 1-ին ՀՀ ոստիկանության Չարենցավանի բաժնում Քրեական օրենսգրքի 177-րդ հոդվածի 2-րդ մասի 3-րդ կետի հատկանիշներով հարուցվել է քրեական գործ։
«Չարենցավանի քննչական բաժնում ընդունվել է վարույթ եւ գտնվում է նախաքննության փուլում։ Քրեական գործով կատարվել են հարցումներ, տարբեր քննչական ու դատավարական գործողություններ, հարցաքննվել են մի շարք անձինք»,- նշված էր ՔԿ պատասխանում:
Քրեական օրենսգրքի 177-րդ հոդվածի 2-րդ մասի 3-րդ կետ. գողություն, որը կատարվել է՝ պահեստարան կամ շինություն ապօրինի մուտք գործելով, պատժամիջոց է սահմանվում նվազագույն աշխատավարձի հինգհարյուրապատիկից հազարապատիկի չափով, կամ ազատազրկմամբ` երկուսից հինգ տարի ժամկետով:
Даст ли ход «папкам», или удовлетворится увольнением? «Паст»
Очередная «шустрость» свалить на других собственные ошибки: «Паст»
Своеобразная «концепция» «борьбы» с преступностью: «Паст»
Уголовное преследование в отношении предпринимателей продолжается: «Паст»
В списке основных налогоплательщиков также есть грузоперевозчики: «Паст»
Покорение арктической сцены Степанакертским русским драматическим театром
Между Николом Пашиняном и Араратом Мирзояном «пробежала черная кошка»? «Паст»
Сколько граждан РА, обучающихся за рубежом в последние годы, получили отсрочку от призыва на обязате...
Без Сюника не может быть Армении: Хачик Асрян
Своеобразное «продолжение» COP29 уже в Армении: опять продолжают лить воду на мельницу Азербайджана:...
