Արա Պապյանը` «ՍԱՍ»–ի Արտակի բիզնես–ապագայի և Երևանի ավագանու ընտրությունների մասին. «Փաստ»

«Փաստ» օրաթերթը գրում է.

Կարելի է արձանագրել, որ քաղաքագետ Արա Պապյանի կանխատեսումներն իրականություն են դարձել: Ավելի վաղ «Փաստի» հետ զրույցում նա նշել էր, որ նոր Ընտրական օրենսգրքով, եթե ընտրություններին մասնակցող բոլոր կուսակցությունները և դաշինքները կարողանան անցողիկ շեմերը հաղթահարել, միևնույն է` Հանրապետական կուսակցությանը բաժին հասած ձայները կկազմեն ընդհանուր ձայների 50%–ից ավելին:

Խոսելով ընտրություններից առաջ ուսուցիչների և ընտրություններից հետո «ՍԱՍ»–ի աշխատակիցների ձայնագրությունների մասին, նա նշեց, որ առաջինի դեպքում եթե այն ազատ և արդար ընտրությունների համար պայքար էր, ապա երկրորդ ձայնագրությունը շրջանառության մեջ դնելը «կոմպրոմատների» պայքարի է նման: Ա. Պապյանի կարծիքով, դա կարող է կազմակերպված լինել և՛ ոստիկանության, և՛ աշխատակիցների, և թե՛ յուրայիններից որևէ մեկի կողմից:

«Որևէ մեկը չէր էլ կասկածում, որ ոչ միայն Արտակ Սարգսյանը, այլև շատերը նման մեթոդներով պետք է ձայներ հավաքեին: Եվ բնական է, որ նրանք պետք է օգտագործեին իրենց ձեռքի տակ եղած բոլոր ռեսուրսները: Եվ այն, որ դա օրենքի խախտում է, միանշանակ է: Ուրիշ հարց է, թե ինչու է հենց նրանը «բացահայտվել»: Տարբեր տեղերից լուրեր կան, որ բոլոր տեղերում էլ նույն ոճով են «աշխատել» և աշխատանքից չհեռացնելու պայմանով աշխատակիցներին ստիպել են ցուցակներ ներկայացնել»,– ասում է Արա Պապյանը:

Քաղաքագետը չի բացառում, որ նմանատիպ այլ ձայնագրություններ նույնպես հայտնվեն, իսկ ստեղծված իրավիճակից կօգտվեն թե՛ իշխանությունները, թե՛ այս կամ այն անհատները: Խոսելով երկրի տնտեսական վիճակի մասին, Ա. Պապյանի կարծիքով այն շարունակելու է վատանալ, քանի որ իշխանությունների «ընտրյալները» նախկինի նման այլևս չեն կարողանալու օգտվել ճոխ պայմաններից: Եվ թեև «ՍԱՍ»–ի Արտակի շուրջ ստեղծված ինտրիգը որևէ իրավական հետևանքներ էլ չունենա, սակայն իրարից բիզնեսներ խլելու նոր փուլ կսկսվի:

«Մեզ մոտ ամեն ինչ գերքաղաքականացված և կուսակցականացված է, ինչպես ԽՍՀՄ տարիներին էր: Այն ժամանակ էլ Կոմունիստական կուսակցությունն էր որոշում, թե ով պետք է դատվի, ով՝ ոչ: Նույն իրավիճակն է նաև այսօր: Ամենայն հավանականությամբ նրան կստիպեն որևէ բիզնեսից հրաժարվել, քանի որ ինչ վատ պատառ է ասենք՝ «ՍԱՍ»–ի Արտակի բիզնեսը»,– ասաց Ա. Պապյանը:

Խոսելով մայիսի 14–ին անցկացվելիք Երևանի ավագանու ընտրությունների մասին, նրա կարծիքով թեև «Ելք» դաշինքն ու «Երկիր Ծիրանին» չեն միավորվի ՀՀԿ–ի դեմ, սակայն երեք ուժերն էլ ներկայացված կլինեն ավագանիում, իսկ ՀՀԿ–ն կրկին կկարողանա հավաքել ընտրողների ձայների կեսից ավելին: Երկրորդ տեղում կլինի «Ելք»–ը, երրորդ տեղում՝ «Երկիր Ծիրանին»: Արա Պապյանի կարծիքով ավագանու ընտրությունների ժամանակ անակնկալներ չեն լինի, քանի որ այն խորհրդարանական ընտրությունների կրկնօրինակը կլինի:

«Որպեսզի «Ելք» դաշինքին հաջողվի 50%–ից ավելի ձայն հավաքել, պետք է մեզ մոտ արդար ընտրություններ լինեն: Հիմա էլ, ինչպես խորհրդարանական ընտրությունների ժամանակ էր, նույն հաջողությամբ կաշխատեն Տարոն Մարգարյանի օգտին: Եվ եթե այն ժամանակ «ՍԱՍ»–ի կամ Լֆիկի ժողովրդին ասում էին «կգնաք այս կամ այն անձին կքվեարկեք», հիմա էլ կասեն՝ «կգնաք Տարոնի համար կքվեարկեք»: Այդքան բան: Եվ պետք չէ մոռանալ նաև, որ մեր պետական ապարատի 80%–ը Երևանում է գրանցված և նրանք բոլորը պետք է ՀՀԿ–ի օգտին քվեարկեն: Սա կրկին շատ վատ հետևանքների կհանգեցնի, քանի որ երբ սեփական ժողովրդին զրկում են խաղաղ և օրինական ճանապարհով իշխանափոխություն կատարելու հնարավորությունից, ապա մի մասը բռնում է գաղթի ճանապարհը, մյուսները՝ ընտրում են այլ միջոցներով փոփոխություններ կատարելու ճանապարհը»,– ասաց Ա. Պապյանը:

 Շարունակությունը` «Փաստ» օրաթերթի այսօրվա համարում