Հակոբ Հակոբյան՝ Կիլիկիայի Հակոբ. «Որևէ մեկի պատգամավորական մանդատը չի կարող իր բիզնեսը պաշտպանել». «Փաստ»

«Փաստ» օրաթերթը գրում է.

Տավուշում պարտված ՀՀԿ–ական պատգամավոր, «Երևան Գարեջուր» ընկերության սեփականատեր Հակոբ Հակոբյանը, ով հայտնի է նաև որպես Կիլիկիայի Հակոբ, «Փաստի» հետ զրույցում պնդում է, որ ինքը չէր գնացել խորհրդարան՝ բիզնեսը պաշտպանելու համար: Ավելին՝ ըստ գործարար– պատգամավորի, «նման բան մեր երկրում գոյություն չունի, որ որևէ մեկի մանդատը կարողանա իր բիզնեսը պաշտպանել, և եթե որևէ մեկը գնում է ԱԺ հանուն դրա, կոպիտ սխալվում է»:

Հիշեցնենք, որ պատգամավոր Հակոբ Հակոբյանը այն բացառիկ գործարարն է, ով 2 տարվա դատական քաշքշուկից հետո անցյալ տարի դատարանում հաղթեց ՊԵԿ–ին, և իր գործարանի վրա դրված 650 մլն դրամ, այն ժամանակ մոտ 1.5 մլն ԱՄՆ դոլարի տուգանքը հանվեց: Դա աննախադեպ երևույթ էր հայ գործարարության համար:

Այժմ, ընտրություններում պարտված թեկնածուն նոր մարտահրավերի առաջ է. մի քանի ամիս առաջ ՏՄՊՊՀ–ն 110 մլն դրամով տուգանել է «Երևան Գարեջուր» ընկերությունը՝ գերիշխող դիրքի չարաշահման համար։

Ներկայացնում ենք «Փաստի» զրույցը ՀՀԿ խմբակցության պատգամավոր Հակոբ Հակոբյանի հետ:

– Պարոն Հակոբյան, այս անգամ Դուք չկարողացաք պատգամավոր դառնալ, մինչդեռ երբ պատգամավոր էիք, այն բացառիկ գործարարներից էիք, որ 1,5 մլն դոլարի տուգանքի հայցով դատարանում հաղթեցիք ՊԵԿ–ին: Հիմա, երբ մանդատ չունեք, կարծում եք կկարողանա՞ք այդ հաղթարշավը շարունակել:

– Երբեք մանդատը 10 տարի շարունակ ինձ չի օգնել: Եթե 2003 թ. գնանք, էն ժամանակ ես պատգամավոր չեմ եղել, էն ժամանակ 187 միլիոնի էլի հաղթել է մեր կազմակերպությունը: Բնականաբար աշխատող մարդուն պիտի տուգանեն էլ, բայց եթե ճիշտ չեն տուգանում, գնում է դատարան և դատարանը որոշում է՝ ով է ճիշտ, ով` սխալ:

– Հավատո՞ւմ եք, որ առանց մանդատի կկարողանաք նախկինի պես ՊԵԿ–ին հաղթել դատարանում:

– Ես բիզնեսով զբաղվում եմ 1987 թ–ից, չհաշված պատգամավոր եղած ժամանակը, այդ ժամանակ հանձնել եմ հավատարմագրային կառավարման: Մշտապես նման խնդիրներ եղել են: Իսկ մեծ տուգանքը եղել է այն ժամանակ, երբ ես պատգամավոր էի: Ի՞նչ կապ ունի՝ պատգամավոր ես, թե պատգամավոր չես: Ես մանդատով չի, որ բիզնես եմ ձևավորել, աշխատացրել: Նման բան մեր երկրում գոյություն չունի, որ որևէ մեկի մանդատը կարողանա իր բիզնեսը պաշտպանել: Եթե որևէ մեկը գնում է հանուն դրա, կարծում եմ, որ ինքը կոպիտ սխալվում է:

– Դուք հանուն ինչի՞ էիք գնացել խորհրդարան, հանուն տավուշցիների՞, նաև հանուն Ձեր բիզնեսի չէի՞ք գնացել խորհրդարան:

– Ոչ, բացարձակ, մեկ տոկոս անգամ դա ճիշտ չի, որովհետև ես հանուն բիզնեսի չէի գնա ու էդքան ի օգուտ մեր երկրի ու ժողովրդի լավ բաներ չէի անի: Բիզնեսս կա, եղել է ու մնալու է:

– Օրինակ՝ ի՞նչ եք արել մեր ժողովրդի ու երկրի համար խորհրդարանում, ի՞նչ օգուտ եք տվել:

– Գնացեք Տավուշի մարզ և հարցրեք, տեսեք ինչքան մարդիկ են փոշմանել, որ ինձ ձայն չեն տվել, որովհետև իրանք զրկվել են և իմ բարի վերաբերմունքից, և իմ օգնություններից և ամեն ինչից:

– Դե, Հաղարծինի գյուղապետն էլ էր ասել, որ զրկվել են, քանի որ չեք ընտրվել և ՈՒԱԶ–ը հետ եք ուզում:

– Լավ էլի, ես չգիտեմ ինչի մասին ա խոսքը: Ես էդ գյուղերի համար տասնյակ տարիներ շատ–շատ բաներ եմ արել, բայց նվեր որևէ մեկին որևէ բան չեմ տվել, հատկապես նախընտրական շրջանում: Կարող եք փաստաթղթերը ստուգել:

– Պարոն Հակոբյան, մի քանի ամիս առաջ «Երևան գարեջուրը» 110 մլն դրամով տուգանվեց ՏՄՊՊՀ–ի կողմից: Դուք ասել էիք՝ դիմելու եք դատարան, հույսեր ունե՞ք, որ կհաղթեք:

– Մենք դատարան չենք դիմել, մենք դիմել ենք իրենց հանձնաժողովին, նոր փաստաթղթեր, նոր թվեր ենք ներկայացրել: Էս պահին իրանք էդ թվերն ուսումնասիրում են, ինչը կարող է տևի մի 3–4 ամիս, որովհետև մենք բավականին փաստեր ենք ներկայացրել, որը նախկինում չէինք ներկայացրել: Հիմա էդ պրոցեսը գնում է, վերջում կարծում եմ, ամեն ինչ իր տեղը կընկնի: Կտեսնենք՝ ինչ որոշում են կայացնում, հետո մենք կտեսնենք՝ ինչ ենք անում շարունակությունը:

– Եթե որոշեն, որ տուգանքը մնում է, դիմելո՞ւ եք դատարան:

– Էս պահին ես ոչինչ չեմ կարող ասել, բայց ոչինչ չեմ բացառում:

Շարունակությունը` «Փաստ» օրաթերթի այսօրվա համարում: