Դավթաշենում ծառեր հատած անձը բերման է ենթարկվել. «Փաստ»

«Փաստ» օրաթերթը գրում է.

Ապրիլի 8–ի լույս 9–ի գիշերը Երևանի Դավթաշեն վարչական շրջանում անհայտ անձը թվով 23 բարդի է հատել: Թե ինչպես է ստացվել, որ հանցագործության պահին կամ ընթացքում ոչ ոք այդ մասին չի իմացել, չի լսել կամ չի նկատել, անհասկանալի է: Վերջիվերջո, 23 ծառ հատելը մեկ ճյուղ կոտրել կամ կտրել չէ, այն ժամանակ է պահանջում և առնվազն այդ գործողության ընթացքում աղմուկ պիտի լիներ:

Մինչդեռ Դավթաշեն վարչական շրջանի ղեկավար Ռուսլան Բաղդասարյանը «Փաստի» հետ զրույցում նշեց, որ պատճառն այն է, որ ապօրինի ծառահատումը իրականացվել է գիշերը, և բացի այդ, մոտակայքում բնակելի շենքեր չկան:

Սակայն նշենք, որ հատված ծառերը գտնվում էին Դավթաշենի «Դելֆին» լողավազանի բակում և համացանցում լուրեր կային, թե իբր ծառահատումների հեղինակները լողավազանի սեփականատերերն են եղել: Այս լուրերը, սակայն, Ռուսլան Բաղդասարյանը հերքեց՝ համարելով դրանք անհեթեթություն:

«Գիշերով է հատվել: Շատ հավանական է, որ ոչ ոք չի տեսել, բավականին հեռու են բնակելի շենքերը: Եթե գիշերով չլիներ, գոնե մեր թաղապետարանի աշխատակիցները, ովքեր ռեգուլյար այդ փողոցով, այդ հատվածով անցնում են, կտեսնեին ու կարգելեին»,– ասաց նա:

Ռուսլան Բաղդասարյանը նաև տեղեկացրեց, որ պաշտոնական գրությունով դիմել են ոստիկանություն, արդեն արձանագրությունը կազմվել է, անգամ ծառ հատողը հայտնաբերվել է, ով արդեն խոստովանել է իր մեղքը:

«Ես գիտեմ, թե ով է: Բայց ավելի լավ է իրավապահ մարմիններից ճշտեք»,– նշեց նա: Մեր այն հարցին, թե ինչ պիտի անել, որպեսզի մարդիկ նման վայրագությունների չդիմեն, Բաղդասարյանը պատասխանեց, թե այդ մի օրինակով, երբ մեղավորը խիստ պատիժ կստանա, ընդհուպ մինչև ազատազրկում, մնացածը կխուսափեն նման հանցագործություն կատարել: Վերջինս նաև նշեց, որ իր համար այդպես էլ անհասկանալի մնաց, թե ինչու են հատել նման քանակի բարդու ծառեր:

Հավելենք նաև, որ ոստիկանության պաշտոնական կայքում արդեն իսկ տվյալներ կան ծառերի՝ հավանական հատողի վերաբերյալ, ով բերման է ենթարկվել ոստիկանություն:

«Ապրիլի 10–ին ոստիկանության Մաշտոցի բաժնում ահազանգ էր ստացվել, որ Աղաբաբյան փողոցում՝ «Դելֆին» լողավազանի դիմաց, 23 բարդի են հատել:

Ձեռնարկված միջոցառումների և որոնողական աշխատանքների արդյունքում պարզվել է, որ արարքը կատարել է 1966 թ. ծնված Ա. Ս.–ն, որը ապրիլի 10–ին՝ ժամը 11.30–ին, Դավթաշենի 36/2 հասցեի մոտ հայտնաբերվել և բերման է ենթարկվել ոստիկանության Մաշտոցի բաժին:

Պատճառված նյութական վնասի չափը պարզվում է:

Նյութերն ուղարկվել են Աջափնյակ և Դավթաշեն վարչական շրջանների դատախազություն»,– կարդում ենք ոստիկանության հաղորդագրության մեջ:

Նշենք նաև, որ ծառահատման դեպքի հետ կապված Երևանի քաղաքապետ Տարոն Մարգարյանն ասել էր, թե Դավթաշենում արձանագրված դեպքն ուղղակի վանդալիզմ է:

«Բոլորիդ է հայտնի ապօրինի ծառահատումների հետ կապված իմ դիրքորոշումը. ցանկացած նման դեպք պետք է օրենքով սահմանված կարգով պատժվի: Իսկ այս դեպքում ծառահատում իրականացնողները պետք է անպայման հայտնաբերվեն ու ենթարկվեն օրենքով սահմանված ամենախիստ պատժին: Վարչական տույժի կիրառումն այս դեպքում բավարար չէ, և օրենքն էլ թույլ է տալիս նման դեպքերում քրեական պատասխանատվության ենթարկել օրինախախտներին»,– ասել էր նա առավոտյան խորհրդակցության ժամանակ:

 Շարունակությունը` «Փաստ» օրաթերթի այսօրվա համարում: