Սովորաբար, Հայաստանում բարեգործությունների, մարդասիրության կամ այլ վեհ բաների մասին խոսակցությունները թեժանում են հատկապես ընտրություններին

Սովորաբար, Հայաստանում բարեգործությունների, մարդասիրության կամ այլ վեհ բաների մասին խոսակցությունները թեժանում են հատկապես ընտրություններին. նպատակը, թերևս, ոմանց բուռն ցանկությունն է՝ այդ օրերին առավելապես բարերարի ու մարդասերի դիմակով հանդես գալու: Արդյունքում, սակայն, այդ ամենը վերջանում է ընտրությունների ավարտով, ու, որպես կանոն, ոչ ոք այլև չի հիշում ո՛չ իր խոստումները, ո՛չ էլ, առավել ևս, կարիքավոր ու օգնության կարոտ մեր համերկրացիներին: Իրականում, սակայն, կյանքն է ցույց տալիս՝ իսկական բարերարը երբեք այդ ամենի հաշվին դիվիդենտներ չի փորձում հավաքել ու այլոց օգնելու միջոցով չի ջանում ինքնակայանալ. Գագիկ Ծառուկյանի պարագայում ամեն բան հենց այսպես է: Պարզվում է՝ «Գագիկ Ծառուկյան» հիմնադրամը, «Շիրակ կենտրոնի» հետ համատեղ, ձեռնամուխ է եղել հերթական մարդասիրական ծրագրի իրականացմանը. Գագիկ Ծառուկյանի անմիջական նախաձեռնությամբ առաջիկայում Գյումրիում բազմաթիվ ընտանիքների, որտեղ շուտով նոր երեխա պետք է ծնվի, հատկացվելու են նոր բնակարաններ՝ ի աջակցություն սոցիալապես կարիքավոր մեր համերկրացիների: Ուշագրավն այստեղ այն է, որ ծրագրի մեկնարկի ժամանակահատվածը հատուկ նպատակով է ընտրվել, որպեսզի այս ամենը ոչ մի կերպ չասոցացվի քաղաքական գործունեության հետ: Անկասկած, Ծառուկյանի այս անակնկալ նախաձեռնությունն ամենևին էլ միակն ու եզակին չէ, ու նույն «Գագիկ Ծառուկյան» հիմնադրամն ամենևին էլ առաջին տարին չէ, որ ազգանպաստ գործունեություն է ծավալում: Պարզապես այստեղ հարցը մեկ այլ բան է՝ այն նրբանկատությունը, որ դրսևորվել է այս հարցում. Ծառուկյանի բարեգործական առաքելությունը քաղաքական նպատակներ երբեք չի ունեցել ու մշտապես նպատակ է հետապնդել օգնելու, աջակցելու օգնության կարիք ունեցող մարդկանց: Ծառուկյանը եղել ու մնում է իր ժողովրդի կողքին՝ մինչև վերջ: