«Քաղաքականությունից հոգնած» Կարո Կարապետյանը՝ Յուվեցի Կարոն, «դիտորդություն» է անում՝ վերահսկելով ընտրությունը. «Փաստ»

«Փաստ» օրաթերթը գրում է.

ՀՀԿ–ական պատգամավոր Կարո Կարապետյանը՝ Յուվեցի Կարոն, անձամբ էր վերահսկում Արարատի մարզի Յուվա գյուղի դպրոցում տեղակայված թիվ 12/34 ու 12/35 ընտրատեղամասերի ընտրությունները: Ընդ որում՝ դպրոցում տեղակայված երկու տեղամասերում պատգամավորը շրջում էր առանց բեյջի: Չնայած դրան, 12/34 ընտրատեղամասի ընտրական հանձնաժողովի նախագահ Գրետա Եղիազարյանը պնդեց, որ պատգամավորը չի ուղղորդում ընտրողներին: «Ինքը եկել, պտտվել, գնացել ա, չեմ նկատել՝ ինքն էստեղ ա ընտրե՞լ, թե՞ մյուս տեղամասում: Չեմ կարծում, որ ինչ–որ արտառոց բան ա արել»,– ասաց Եղիազարյանը:

Նույն դպրոցում տեղակայված 12/35 ընտրատեղամասի նախագահ Թամարա Դավթյանը հարցին, թե ինչու է թույլ տալիս, որ պատգամավորն ուղղորդի ընտրողներին, պատասխանեց. «Պատգամավորը չի ուղղորդում, ինքը որպես դիտորդ մտնում, դուրս է գալիս»:

Ընտրատեղամասից ընտրատեղամաս շրջող Կարո Կարապետյանին մի քանի հարց ուղղեցինք:

– Պարոն Կարապետյան, ինչպե՞ս հասկանանք Ձեր ներկայությունն էստեղ:

– Իմ հետ մի խոսացեք: Դիտորդ եմ «Շահեն» կազմակերպությունից: Պաշտպանում եմ ՀՀԿ–ին ու Արայիկ Գրիգորյանին: Փակենք:

–Տեղեկություն կա, որ էստեղ մարդկանց ուղղորդում եք:

– Չկա նման բան: Ով որ ասել ա, գլուխը պատին ա տվել, «մուտիտ» եք անում, քո գործն ա, դրա համար էլ ասում ես:

– Եկել եք, որ Ձեր պատգամավորական ազդեցությո՞ւնն ունենաք գյուղի ընտրության վրա:

–Չէ, ինչ պատգամավորական, էս գյուղը ոնց ուզում ա, նենց անում ա: Տենց բան գոյություն չունի:

– Իսկ եթե Ձեր պաշտպանած թեկնածուն չընտրվի, ի՞նչ եք անելու:

– Ընտրվել, պրծել ա արդեն ինքը: Թազա ձևավորված ԱԺ–ում արդեն ինքը պատգամավոր ա:

– Ի՞նչ գիտեք, էստեղ ուրիշ թեկնածուներ էլ կան:

– Որովհետև ժողովուրդն ա իրան սիրում, հարգում:

– Չեք կարծո՞ւմ, որ Ձեր ներկայությունն արդեն իսկ ճնշող ազդեցություն է ունենում ընտրողների վրա:

– Իհարկե՝ ոչ, Ձերն ավելի շատ ա:

– Իսկ ի՞նչն էր պատճառը, որ այս անգամ Դուք չառաջադրվեցիք:

– Չուզեցա, քաղաքականությունից դուրս եկա:

– Ձեզ դո՞ւրս հրավիրեցին:

– Չէ, ես դուրս եկա, անձամբ ես: Չեմ ուզում հերիք ա, հոգնել եմ, թող նորերը գնան:

– Այնքան շատ զբաղվեցիք քաղաքականությամբ, որ հոգնե՞լ եք:

– Այո:

– Իսկ ինչո՞ւ որոշեցիք դիտորդ դառնալ, դա Ձեզ ի՞նչ կտա:

– Չեմ ուզում պատասխանել Ձեր հարցերին:

Շարունակությունը` «Փաստ» օրաթերթի այսօրվա համարում: