«Կարուսելի» փորձ, քվեարկված քվեաթերթիկ ընտրողին. ընտրությունները Արարատի մարզում. «Փաստ»

«Փաստ» օրաթերթը գրում է.

Արարատի մարզում երեկ բավական լարված իրավիճակ էր, հատկապես լարված մթնոլորտ էր տիրում մարզկենտրոն Արտաշատում: Երեկ «Փաստը» այցելել է Արարատի մարզի մի շարք ընտրական տեղամասեր և հետաքրքիր միջադեպեր արձանագրել:

Մասնավորապես Ավշարի թիվ 13/30 ընտրատեղամասում ընտրողներից մեկին միայն ՀՀԿ–ի քվեաթերթիկ են տվել, սակայն այդ ընտրատեղամասում գտնվող վստահված անձինք կարողացել են կանխել ընտրախախտումը։

Գյուղի թիվ 13/30 ընտրատեղամասում ընտրողներից մեկին «բաժին» էր ընկել միայն մեկ քվեաթերթիկ, այն էլ՝ հանրապետականի, և որ ամենահետաքրքիրն է՝ քվեաթերթիկի հակառակ երեսում արդեն իսկ նշում էր արված Արարատի մարզում առաջադրված ռեյտնիգային թեկնածու Արայիկ Գրիգորյանի անվան դիմաց։

Ընտրախախտումը հնարավոր է եղել կանխել «Ելք» դաշինքի վստահված անձի և ընտրատեղամասում գտնվող մի քանի այլ քաղաքացու միջամտությամբ։

Թիվ 13/30 ընտրատեղամասի «Ելք» դաշինքի վստահված անձ Կարեն Թևոնյանը «Փաստին» տեղեկացրել է, որ հանձնաժողովը ընտրողներից մեկին փոխանցել էր ոչ թե անհրաժեշտ 9 քվեաթերթիկները, այլ միայն մեկը՝ 6 համարի քվեաթերթիկը։

Արարատի մարզկենտրոն Արտաշատի մի շարք ընտրատեղամասերում էլ ականատես եղանք կուտակումների՝ ընտրատեղամասի մուտքի մոտ 20–25 ընտրողներ էին սպասում, ինչը նաև դժվարացնում էր լրագրողների՝ ընտրատեղամաս մտնելը: Ընտրողների՝ սահմանվածից ավելի մեծ թվով ներկայություն է նկատվել նաև ընտրատեղամասերի ներսում։

Բացի նկատելի կուտակումներից, պարզվում է, որ ընտրատեղամասերից մեկում «կարուսելի» փորձ է արվել և որն ամենահետաքրքիրն է՝ այդ մասին բարձրաձայնում էր ՀՀԿ–ի վստահված անձը:

Այսպես, Արտաշատի թիվ 12/04 ընտրատեղամասում ընտրողների մուտքը ընտրատեղամաս ֆիզիկապես վերահսկում էր դիտորդը, թեև դա սովորաբար ոստիկանի իրավասությունն է։ Նշված ընտրատեղամաս մեր այցի պահին բավական շատ ընտրողներ կային ներսում, ինչի հետ կապված հանձնաժողովի անդամներից մեկը բարկացած ձայնով հանձնաժողովի նախագահի ուշադրությունը հրավիրեց տվյալ փաստի վրա՝ նշելով, որ 15 վստահված անձ կա, բայց 25–ից ավելի ընտրող։

Տվյալ ընտրատեղամասում էլ հենց «կարուսելի» փորձն է արվել։ Ընտրական տեղամասում ՀՀԿ վստահված անձ Նանե Մնացականյանի ներկայացմամբ նա նկատել էր, թե ինչպես ընտրողներից մեկը դուրս գալով ընտրատեղամասից՝ ծոցագրպանից քվեաթերիկ է հանել և այն փոխանցել դրսում գտնվող մի քաղաքացու։ Վերջինս փորձել է հասնել այդ քաղաքացուն բացատրություն ստանալու նպատակով, սակայն խարդախության հեղինակը նստելով 67ԼԼ242 պետհամարնիշով «Վոլգա» մակնիշի ավտոմեքենան՝ ասել էր` թե կարող ես, ապացուցիր։

Ընտրությունները հետաքրքիր էին անցում նաև Մրգավանի միակ ընտրատեղամասում, որտեղ բացի հանձնաժողովի անդամներից, վստահված անձանցից, դիտորդներից ու ընտրողներից ներկա էր նաև համայնքապետը:

Մրգավանի 12/42 ընտրատեղամասի բակում կայանված էր գյուղապետի ավտոմեքենան, գյուղապետն էլ՝ Սամվել Վարդանյանը, անընդհատ ներսուդուրս էր անում։ Նա ժամեր շարունակ չէր հեռանում տարածքից, թեև այդ տեղամասում այդ պահի դրությամբ ընտրություն չէր կատարում։ Վերջինս բավական «խառն» էր՝ անընդհատ հեռախոսով խոսում էր, կարգադրություններ անում դրսում գտնվող տղաներին։

Պարզվում է, գյուղապետը դեպի ընտրատեղամաս սեղաններ տեղափոխելու հանձնարարություններ էր տալիս։ Ինչպես նա մեզ ասաց՝ սեղանները հանձնաժողովի անդամների ու վստահված անձանց համար «հացի սեղան» կազմակերպելու համար էր։ Բացի այդ, «Փաստը» տեղեկացավ, որ գյուղապետն իր սեփական միջոցներով էր պատրաստվում կազմակերպել վերջինների «ընդմիջումը»։

Նշենք, որ Մրգավան գյուղի թիվ 12/42 ընտրական տեղամասում նաև փորձ էր արվել օգնել քվեախցում գտնվող ընտրողին, այն էլ՝ վստահված անձի կողմից։ Միջադեպին միջամտել էր «Հայկական վերածնունդ» կուսակցության վստահված անձը, ով նկատել էր ՀՀԿ–ի վստահված անձի կողմից քվեախցում ընտրողներից մեկին օգնելու փորձը։

Շարունակությունը` «Փաստ» օրաթերթի այսօրվա համարում: