Ժանրը` քաղաքական զավեշտ, վերնագիրը` քաղաքական հավկուրություն. «Փաստ»

«Փաստ» օրաթերթը գրում է.

Պետրոս Ղազարյանը հարցազրույց էր ունեցել առաջին նախագահ Լևոն Տեր–Պետրոսյանի հետ: Ցանկացա իմանալ քաղաքական, հասարակական, մշակութային գործիչների կարծիքը առաջին նախագահի հնչեցրած դրույթների վերաբերյալ:

Բանն այն է, որ դրանք հերթապահ հարցեր չեն, որ ամեն օր կհանդիպես լրատվամիջոցներում: Դրանք առնչվում են մեր ժողովրդի լինելիությանը: Ինչպե՞ս ենք ապրելու սրանից հետո, կարո՞ղ ենք ապրել «ոչ պատերազմ–ոչ խաղաղության» պայմաններում, և ինչքա՞ն ժամանակ կարող ենք: Կամ` կարո՞ղ ենք ապրել շրջափակման մեջ ու զարգանալ միաժամանակ:

Կարծում եմ` ոչ ոք չի կարող ժխտել, որ սրանք այս պահին ճակատագրական դարձած հարցերն են մեր երկրի ու ժողովրդի համար:

Այլ բան է, որ որոշ քաղաքական կամ հասարակական ուժերին պարզապես ձեռնտու չէ այսօր այն «վերցնել–դնելը»: Հիմա` բուն խնդրից:

Զանգեցի այս ուժի ներկայացուցչին, այն ակտիվ ուժի ներկայացուցչին, այս դաշինքի առանցքային դեմքին, այն դաշինքի առանցքային դեմքին, ու… ի՞նչ պարզվեց` այս մարդկանցից ոչ մեկը չի նայել Լևոն Տեր–Պետրոսյանի հարցազրույցը:

Չեմ նայել` ասում են, ու` վերջ: Դու էլ ի՞նչ կարող ես անել, եթե մարդը չի դիտել: Եթե չի դիտել, ուրեմն դու էլ հարց չպետք է տաս, ու ինքն էլ քո տված հարցին չի պատասխանի:

Անցա մշակութային, հասարակական գործիչներին: Այստեղ էլ էր նույնը. չեն նայել հարցազրույցը, և` վերջ:

Բայց հոգուս մեղք չանեմ. մեկը կար, որ դիտել էր. ՀՅԴ–ից Կիրո Մանոյանն էր, որի հետ մեր ունեցած կարճ հարց ու պատասխանը կներկայացնենք ստորև:

Նաև կներկայացնենք մեկ չդիտածի` «Ելք» դաշինքից Էդմոն Մարուքյանի հետ մեր զրույցը:

Միայն մեկ դիտարկում` հայտնի թռչունի գլուխը որքան էլ հողի մեջ լինի, նրա մարմինը դրսում է:

Շարունակությունը` «Փաստ» օրաթերթի այսօրվա համարում: