Դրամահավաք լսողական խնդիրներով երեխաների համար մարզասրահ կառուցելուն. «Փաստ»

«Փաստ» օրաթերթը գրում է.

Մարտի 15–ին «Գլոբալ Շեյփերս Երևան» երիտասարդական կազմակերպության կողմից www.generosity.com կայքում օնլայն դրամահավաք է մեկնարկել։ Դրամահավաքի արդյունքում հավաքված գումարը Երևանի՝ լսողական խանգարում ունեցող երեխաների հատուկ կրթահամալիրում մարզասրահ կառուցելուն կուղղվի:
«Ուժեղ երեխաներ, պայծառ ապագա» անունը կրող նախաձեռնության նպատակը Երևանի լսողական խանգարումներ ունեցող երեխաների հատուկ կրթահամալիրում մարզասրահ կառուցելն է։ Ծրագիրը հնարավորություն կտա լսողական և հենաշարժողական խնդիրներ ունեցող երեխաներին՝ ձևավորել ակտիվ և առողջ կենսակերպ, մասնակցել նախապես մշակված ֆիզիկական ակտիվության ծրագրին, որը կնպաստի նրանց զարգացմանը, ստանալ համապարփակ գիտելիքներ ֆիզիկական վարժանքների կարևորության մասին, դարձնել ֆիզիկական ակտիվությունը իրենց առօրյայի բաղկացուցիչ մաս։ Դարձնելով ֆիզիկական ակտիվությունը իրենց կենսակերպի անբաժան մաս՝ երեխաները ավելի մեծ հնարավորություն կունենան վարելու առողջ և ուրախ կյանք՝ խուսափելով ավելորդ քաշից, ձեռք բերելով նոր գիտելիքներ և ինքնավստահություն։
Երևանի լսողական խանգարումներ ունեցող երեխաների հատուկ կրթահամալիրը գտնվում է Նորքի այգիներում և միակն է Հայաստանում, որտեղ գործում է 12–ամյա միջնակարգ կրթություն խուլ կամ լսողական խանգարումներ ունեցող երեխաների համար։ Դպրոցը հնարավորություն ունի ընդունելու 350 աշակերտ՝ տալով նրանց համապարփակ գիտելիքներ, սովորեցնելով ժեստերի լեզուն, տարբեր արվեստներ և արհեստներ։ Դպրոցում այս պահին սովորում է 130 երեխա՝ 5–18 տարեկան։
Աշխարհն ավելի լավը դարձնելու նշանաբանով առաջնորդվող «Գլոբալ Շեյփերս Երևան»–ը դրամահավաքի արդյունքում հավաքված գումարով պատրաստվում է վերանորոգել դպրոցի երկու սենյակ և լսողության խնդիրներ ունեցող երեխաների առողջության ամրապնդմանը նպաստող մարզասարքեր տեղադրել այդտեղ։
Դպրոցի կառավարման խորհրդի նախագահ Աշոտ Ավետիսյանը «Փաստ»–ի հետ զրույցում նշեց, որ լսողական խանգարում ունեցող երեխաների համար շատ կարևոր է մարզասրահ ունենալը։
«Լսողության խնդիր ունեցող մարդկանց մոտ թոքերը թույլ են զարգացած։ Մարդու թոքերը մարզվում են նաև խոսելու ընթացքում։ Իսկ լսողության խնդիր ունեցող մարդկանց մոտ թոքերը փոքր են։ Նրանք պետք է անընդհատ մարզվեն, որպեսզի թոքերը լինեն ֆորմայի մեջ։ Այս աջակցությունը մեզ շատ անհրաժեշտ է»,– ասաց նա։
Դպրոցի սաները բազմաթիվ սպորտային հաջողություններ ունեն։ Դպրոցում գործում են ըմբշամարտի և ֆուտբոլի խմբակներ, և ըմբիշների հավաքականը 2015 թ. դարձել է աշխարհի, իսկ 2016 թ.՝ Եվրոպայի չեմպիոն։
Անցած երկու օրերի ընթացքում 48 նվիրատուի կողմիվ հավաքվել է 1866 ԱՄՆ դոլար։ Մարզասրահի վերանորոգման համար անհրաժեշտ է 10 հազար ԱՄՆ դոլար։ Նախատեսվում է դրամահավաքի միջոցով հավաքել 5 հազար 200 ԱՄՆ դոլար, բայց դրամահավաքի ավարտից հետո հավաքված գումարը կկրկնապատկվի։ Գումարի երկրորդ կեսը հատկացնելու է դոնոր կազմակերպություն, որի անունը «Գլոբալ Շեյփերս Երևան» կազմակերպությունը դեռևս գաղտնի է պահում։
«Գլոբալ Շեյփերս Երևան»–ը ստեղծվել է 2012 թ. և հանդիսանում է «Համաշխարհային Տնտեսական Ֆորում»–ի (World Economic Forum) նախաձեռնությունը, որը գործում է աշխարհի շուրջ 453 քաղաքներում և ունի ավելի քան 5964 անդամներ ողջ աշխարհում: Այն իր անդամների շահերի ընդհանրության և կամավորության սկզբունքով հիմնված, ոչ քաղաքական, անկախ, շահույթ չհետապնդող կազմակերպություն է։
Դրամահավաքին կարելի է միանալ հետևյալ հասցեով՝ www.generosity.com/sports–fundraising/strong–kids–bright–future։

Շարունակությունը` «Փաստ» օրաթերթի այսօրվա համարում: