Սաթենիկ Մկրտչյան. «Չգրանցված դեղերը մեծ ռիսկայնություն են պարունակում». «Փաստ»

«Փաստ» օրաթերթը գրում է.

ՀՀ ԱՆ «Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնի» եզրակացությամբ «Պրեստանս» 5 մգ/10 մգ, դեղահատեր, N30 (սերիա 0590516, պիտանիության ժամկետ՝ 11.2018 թ.) և «Ցեֆտրիաքսոն–Աստերիա» 1 գ դեղերի նմուշների ուսումնասիրությամբ պարզվել էր, որ դրանք կեղծ են: Դրան հաջորդեց Առողջապահության նախարարության հայտարարությունն այն մասին, որ հայտնաբերված կեղծ դեղերից մեկը «Լե Լաբողատուաղ Սեղվիե» ընկերության արտադրության «Պրեստանս» 5 մգ/10 մգ, 5 մգ/5 մգ, 10 մգ/5 մգ դեղն է եղել:

«Պրեստանսի» կեղծ և օրիգինալ դեղի առաջին էական ու նկատելի տարբերությունը սերիայի թվերի անհամապատասխանությունն էր: Գրանցված տարբերակի սերիան 6 նիշից է բաղկացած եղել, իսկ կեղծի դեպքում՝ 7:

Նախորդ շաբաթ էլ Առողջապահության նախարարությունն իր պաշտոնական կայքում հրապարակել էր, որ նախարարությունը «Լե Լաբողատուաղ Սեղվիե» ընկերության հետ համատեղ ձեռնարկել է միջոցառում, ըստ որի` բոլոր այն քաղաքացիները, ովքեր գնել են 7 սերիական նիշ պարունակող «Պրեստանս» դեղեր, 15–օրյա ժամկետում կարող են դիմել պատկան մարմիններին` ներկայացնելով դեղի տուփը և անձը հաստատող փաստաթուղթ: Դեղի կեղծ նմուշները բնակչությունից հետ հավաքելուց հետո` մարդկանց կտրամադրվի նույն դեղաչափով օրիգինալ «Պրեստանս» դեղը: Իսկ գործընթացն էլ պիտի տևի մինչև մարտի 20–ը:

«Պրեստանս» դեղը կեղծողները այնքան էլ քիչ եկամուտ չէին ունենա, եթե, իհարկե, կեղծիքը չբացահայտվեր և հնարավոր է նույն կերպ շարունակեին գործունեություն ծավալել, քանի որ նշված դեղատեսակի մեկ տուփը միջինում վաճառվում է 6–7 հազար դրամի սահմաններում:

Առողջապահության նախարարի օգնական Սաթենիկ Մկրտչյանը «Փաստի» հարցին, թե դեղի կեղծ նմուշները որքանով են վտանգավոր դրանք գնած բնակչության համար, պատասխանեց, որ անվտանգ է միայն այն դեղը, որը գրանցված է Հայաստանում և կեղծված չէ: Հակառակ պարագայում և ցանկացած այլ դեպքում արդեն խոսք է գնում ռիսկայնության մասին, քանի որ չգրանցված լինելու պարագայում այն պարունակում է որոշակի ռիսկեր:

Հարցին, թե այս ընթացքում որքան է կեղծ դեղատեսակ հավաքագրվել, պատասխանեց, որ այդ մասին չեն կարող ասել. «Համապատասխան մարմինը այդ տվյալներին տիրապետում է, բայց այս պահին քանի դեռ վերջնական կամ որևէ հստակ բան չկա, ոչինչ չենք կարող ասել»,– նշեց նախարարի օգնականը:

Այն դիտարկմանը, թե նախարարությունը կեղծ դեղերը բնակչությունից հետ հավաքելու և փոխհատուցելու համար 15–օրյա ժամկետ է սահմանել և հնարավոր է, որ սահմանված ժամկետից հետո էլ շարունակի փոխհատուցում անել՝ Սաթենիկ Մկրտչյանն ասաց, որ եթե հատուկ դեպքեր լինեն՝ այո:

«Չեմ կարծում, թե մարդկանց առողջության հետ կապված կլինեն որոշակի սահմանափակումներ: Բայց ամեն դեպքում 15–օրյա ժամկետը բավական է, և եթե այլ հարց կլինի՝ նախարարությունը լրացուցիչ կքննարկի ու որոշում կկայացնի»,– նշեց նա:

Լևոն Ալթունյանի օգնականի խոսքով՝ դեռ ուսումնասիրություններ են արվում, թե ում կողմից է ներկրվել կեղծ դեղը: Սակայն նախարարությունն այլևս իրավասություն չունի հետևելու գործի ընթացքին, Առողջապահության պետական տեսչությունը հայտնաբերել է դրանք և արդեն գործերն ուղարկվել են Ազգային անվտանգություն:

Սաթենիկ Մկրտչյանը նաև հավելեց, որ անհամապատասխան են եղել առաջնային և երկրորդային փաթեթի պիտակի գունային երանգները, պիտակի տպագրական տառաչափերը: Միաժամանակ փորձաքննության արդյունքում պարզվել է, որ դեղի բաղադրությունը առերևույթ նման է գրանցված տարբերակի դեղահաբի բաղադրությանը, բայց ունի էական շեղումներ, որոնց թվաբանական ցուցանիշները կտրամադրվեն դեղի արտադրող և ապրանքային նշանի սեփականատեր «Լե Լաբողատուաղ Սեղվիե» ընկերությանը:

Շարունակությունը` «Փաստ» օրաթերթի այսօրվա համարում: