Դիմակների մեծածախ գինը կազմում է 50-60 դրամ, բայց մինչև հասնում են մարզեր, դրանց գինը հասնում է 200 դրամի. Սրբուհի Գրիգորյան

Դիմակների մեծածախ գինը կազմում է 50-60 դրամ, բայց մինչև հասնում են մարզեր, դրանց գումարը հասնում է 200 դրամի, և պարզ է` թոշակառուները ամեն օր չեն կարող գնել և ամսական մեկ դիմակ են դնում: Այս մասին Ազգային ժողովի արտահերթ նիստին ասաց «Լուսավոր Հայաստան» խմբակցության պատգամավոր Սրբուհի Գրիգորյանը՝ դիմելով Տնտեսական մրցակցության պաշտպանության պետական հանձնաժողովի անդամի թափուր պաշտոնում կառավարության առաջադրած թեկնածու Կարեն Սեդրակյանին:

Պատգամավորը հետաքրքրվեց, թե ինչպես պետք է կարգավորվի այս խնդիրը, որ մատների վրա հաշված տնտեսվարողները չհարստանան՝ գերշահույթ ստանալով, և հասարակությունն էլ կարողանա մատչելի. տրամաբանական գնով դիմակ գնել:

Կարեն Սեդրակյանն ասաց, որ այս պահին դիմակների մասով վարույթ է ընթանում, և ուսումնասիրման ընթացքում բոլոր հարցերն ամբողջական տեսքով կներկայացվեն:

«Մինչև օրս ուսումնասիրության արդյունքները ցույց են տալիս, որ այդպիսի տարբերակ չկա, որ 20 դրամով ձեռք բերվի դիմակը և վաճառեն 200 դրամով»,-ասաց նա:

Սրբուհի Գրիգորյանը նշեց, որ երեկ Սիսիանի սուպերմարկետներից մեկում եռաշերտ դիմակը գնել են 200 դրամով, իսկ ՏՄՊՊՀ անդամի թեկնածուն, խնդրեց կոնկրետ փոխանցել, թե որ խանութում է եղել, քանի եռաշերտ դիմակները շուկայում տատանվում են 90-150 դրամի շրջանակներում:

Տեսանյութը՝այստեղ