Գյումրիում հարսանիքից վերադարձող ընտանիքը վթարի է ենթարկվել․ զոհվել են ամուսիններ (լրացված)

ԱԻՆ «911» ծառայությանը տեղեկություն է հաղորդվել, որ այսօր, դեկտեմբերի 16-ին, ժամը 01:12-ին Շիրակի մարզի Գյումրի քաղաքի Բուլվարային թաղամասի «ԱՐԳՈ» խանութ-սրահի մոտակայքում տեղի է ունեցել ՃՏՊ, ավտոմեքենայում կան արգելափակված քաղաքացիներ. անհրաժեշտ է փրկարարների օգնությունը: Այս մասին NEWS.am-ը տեղեկանում է ԱԻՆ պաշտոնական կայքից։

Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:

Պարզվել է, որ «Opel Astra» մակնիշի ավտոմեքենան (վարորդը՝ Արիստակես Քոչարյան, 1964 թ.), դուրս է եկել ճանապարհի երթեւեկելի հատվածից և բախվել ոչ բնակելի տան պարսպին, ինչի հետևանքով ուեւորներ Տաթեւիկ Քոչարյանը (1996 թ.) և Արեւիկ Քոչարյանը (1997 թ.) մարմնական վնասվածքներով հոսպիտալացվել են Գյումրու ԲԿ, իսկ Միշա Քոչարյանը (2007 թ.) և Լուսինե Քոչարյանը (1998թ.)՝ Ավստրիական մանկական հիվանդանոց:
Բժիշկները 11-ամյա Միշայի եւ 21-ամյա Արեւիկի առողջական վիճակը գնահատել են ծանր, իսկ 20-ամյա Լուսինեինը եւ 22-ամյա Տաթեւիկինը՝ բավարար:

Փրկարարները սահմանազատել են տարածքը, հոսանքազրկել ավտոմեքենան և հատուկ տեխնիկայի միջոցով ավտոմեքենայից դուրս են բերել վարորդի և Ժաննա Քոչարյանի (1972 թ.) դիերը:

Ըստ Shamshyan.com-ի՝ մեքենայում եղել են ընտանիքի անդամներ․ մահացածները ամուսիններ էին, վիրավորները նրանց երեխաներն ու թոռներ են, որոնք վերադառնալիս են եղել հարսանեկան արարողությունից: Ճանապարհն ամբողջությամբ պատված էր մերկասառույցով, և վթարի հիմնական պատճառներից մեկն էլ դա է եղել։