Կայուն էլեկտորատի ֆենոմենը

ՀՀ քաղաքական դաշտում կրքերն աստիճանաբար մարում են, և հանրությունը սահուն կերպով փորձում է վերադառնալ առօրյա կյանք:

ԱԺ արտահերթն այլևս պատմություն է. երկու շաբաթից ՀՀ-ն կունենա իր յոթերորդ գումարման խորհրդարանը, որում ընդգրկված կլինի երեք քաղաքական ուժ:

Ընտրություններից շատ առաջ, նաև քարոզարշավի ողջ ընթացքում, անընդհատ խոսվում էր այն մասին, թե ով կլինի պառլամենտի երկրորդ ուժը, քանի որ առաջատարի հարցը պարզ էր ի սկզբանե, այլ կերպ ասած՝ տեխնիկայի հարց էր: Երկրորդ տեղի հարցը բավականին լուրջ էր, քանի որ տվյալ ուժը պետք է ցույց տար իր քաղաքական կշիռը, նաև պատասխանատվությունը ժողովրդի առջև:

Ընտրությունից երկու օր անց պարզ է, որ ԱԺ անցած ուժերից երկրորդը ԲՀԿ-ն է, որը ստացել էր ընտրողների 8,6 տոկոս քվեն կամ որ նույնն է՝ 103837 ձայն: Ունենում ենք մի իրավիճակ, որ նախկին խորհրդարաններից ԲՀԿ-ն այն միակ քաղաքական ուժն է, որ կարողացավ հաղթահարել ընտրական շեմը: Երկրորդ առանցքային ուժի կարգավիճակ ստանալով՝ ԲՀԿ-ն ապացուցում է, որ նախկինում պարբերաբար շահարկվող և թևածող խոսակցությունները, թե ԲՀԿ-ն նախորդ համակարգի արատավոր բարքերով է առաջնորդվում կամ բարեգործության շնորհիվ է կարողանում տեղ գտնել խորհրդարանում, իրականության հետ աղերս չունեցող լուրեր են՝ ընդամենը հակառակորդների կողմից շրջանառվող մանիպուլիացիաներ, քանի որ նոր Հայաստանում և նոր իրողությունում առկա են այլ խաղի կանոններ:

Ակնհայտ է, որ առանց որևէ միջնորդության՝ ԲՀԿ-ն ստանում է ժողովրդի շոշափելի հատվածի աջակցությունը, որն, ինչ խոսք, պարտավորեցնող է: Տեղի ունեցածը պարզեցում է մտցնում նաև այն հարցում, որ կուսակցությունն ունի կայուն էլեկտորատ, որոնք, ակախ էյֆորիայի և երկրում տիրող բուռն հեղափոխական մթնոլորտից, մնացել են իրենց մոտեցումներին ու համոզմունքներին հավատարիմ:

Աղասի Առաքելյան