Ծառուկյան ջան, ոնց որ Աբովյանն ես թևիդ տակ առել ու տիրություն ես անում, Թալինն էլ քո ձեռքը վերցրու. Թալինցի կինը՝ Ծառուկյանին

Արագածոտնի մարզի Թալին քաղաքում արտահերթ խորհրդարանական ընտրությունների քարոզարշավի շրջանակում ԲՀԿ առաջնորդ Գագիկ Ծառուկյանի խոսքին ու գործին հավատող թալինցիները մեծ ոգեւորությամբ՝ զւոռնա դհոլով եւ աղ ու հացով դիմավորեցին նրան: Չնայած եղանակային վատ պայմաններին, մեծաքանակ մարդիկ էին հավաքվել մշակույթի տան բակում:

ԲՀԿ առաջնորդը իր ելույթի ժամանակ խոսեց մինչ օրս ձեռք բերված հաջողությունների մասին.

«Մենք ցանկացած ոլորտում գործ ունենք արած, ծաղկացրել ենք, զարգացրել ու դարձրել մրցունակ։ Ես ուզում եմ, որ ներդրողները վստահ ներդրումներ կատարեն, ոչ ոք չի վստահի թույլ երկրի, դրա համար մենք պետք է շենացնենք մեր երկիրը, որպեսզի բոլորի մոտ հպարտ ասենք, որ հայ ենք։ Չպետք է այնպիսի տպավորություն լինի, որ մենք օտարերկրացուց գումար ենք խնդրում, մուրում, մենք պետք է այնպես անենք, որ նրանք իրենք խնդրեն ներդրումներ անել»,- ասաց Ծառուկյանը։

Թալինցիների հետ շփումը բավական ջերմ էր. հանդիպման ժամանակ տեղաբնակները ԲՀԿ առաջնորդին ուղղեցին իրենց հետաքրքրող հարցերը, նրանցից մեկն առաջ քաշեցին ոռոգման ջրի խնդիրը, որին ի պատասխան Գագիկ Ծառուկյանը նշեց, որ գիտի մարզում առկա գյուղատնտեսական խնդիրների մասին և պատրաստ է աջակցել՝ ինչով կարող է։ Նա հիշեցրեց՝ երբ մեկ-երկու տարի առաջ օգնեց թալինցիներին սերմացու ձեռք բերել, ճիշտ է՝ սերմացուն վատը, անորակ դուրս եկավ, և մնաց գյուղացու չարչարանքը, սակայն Ծառուկյանը փոխհատուցեց կրած վնասը։ Այժմ էլ նա պատրաստ է աջակցել ոռոգման ջրի խնդրին։

Հարց ու պատասխանի ժամանակ մի կին էլ Գագիկ Ծառուկյանին դիմեց խնդրանքով. «Ծառուկյան ջան, ոնց որ Աբովյանն ես թևիդ տակ առել ու տիրություն ես անում, Թալինն էլ քո ձեռքը վերցրու»։ Ծառուկյանը ժպտաց ու նկատեց, որ Աբովյանում էլ գյուղատնտեսական հարցերն ամբողջովին լուծված չեն, քանի որ միայն բարեգործություններով հնարավոր չէ մեծ հարցեր լուծել։

«Դրա համար եմ ասում՝ ձեր ճիշտ ընտրությունը կատարեք։ Ես չեմ ասում՝ պետք է մեզ ընտրեք, ում հարմար գտնեք, նրան էլ կընտրեք։ Ես մինչև հիմա արել եմ ու սրանից հետո ավելի շատ եմ անելու»,- ասաց Ծառուկյանը։ Նա նկատեց նաև, որ թեև վարչապետը շատ է ուզում, բայց միայնակ չի կարող շատ բան փոխել՝ նրան օգնող ուժ է հարկավոր։ Ծառուկյանը Թալինում ներկայացրեց նաև կուսակցության կողմից առաջադրված պատգամավորի թեկնածուներին։

Սոսե Չանդոյան