Կոկորդիլոսաբուծարանն՝ առանց փորձաքննության. բնապահպանները մարզպետին դատի կտա՞ն
Գրեթե երկու ամիս առաջ Արարատի մարզպետ Գարիկ Սարգսյանն իր գործունեության 100 օրվա ամփոփման ասուլիսի ժամանակ հայտարարեց, որ Արարատի մարզի Դաշտավան համայնքում առաջիկա տարիներին հիմնվելու է կոկորդիլոսաբուծարան: Հայտարարվեց, որ «Արմոտ» ՍՊԸ-ն արդեն վարձակալության է վերցրել 15 հա տարածք, հանդիպել բնակիչների հետ, ներկայացրել ծրագիրը: Հայտարարությունից հետո բնապահպաններն իրենց դժգոհությունը հայտնեցին, իսկ այսօր ծրագիրը կյանքի կոչելու վերաբերյալ իրենց հակափաստարկն ունեն:
«Կենդանական աշխարհի խնդիրներով զբաղվող բնապահպաններն ընդհանրապես դեմ են, որ վայրի կենդանիները նման պայմաններում պահվեն, և նրանց օգտագործեն մթերք կամ կաշի ստանալու համար: Սա գաղտնիք չէ, բայց սա դեռ թողնենք մի կողմ: Այս դեպքում մեր խնդիրը միայն դեմ լինելը չէ: Երբ հայտարարվեց վերոնշյալի մասին, որոշեցինք հասկանալ՝ արդյո՞ք նման գործունեությունը վնաս չի հասցնի ջրային ռեսուրսներին, քանի որ անմիջականորեն կապված է այդ ռեսուրսների հետ: Այդ ժամանակ հասկացանք, որ նման ծրագիրը պետք է անպայման շրջակա միջավայրի փորձաքննություն անցնի: Բայց երբ ծանոթացանք ամբողջական ծրագրի հետ, հասկացանք, որ այստեղ միայն կոկորդիլոսաբուծություն ասվածը չէ»,-Oragir.info-ի հետ զրույցում ասաց բնապահպան Սիլվա Ադամյանը՝ ընդգծելով, որ ըստ նախագծի, նախատեսվող տարածքում նաև ռեստորաններ, ատրակցիոններ, սննդի կետեր են լինելու:
«Ուսումնասիրել ենք մեր օրենսդրությունը, հանգել այն եզրակացությանը, որ, ըստ մեր օրենսդրության, այդ տարածքը պետք է անցնի շրջակա միջավայրի փորձաքննություն: Այստեղ մեր խնդիրը միայն կոկորդիլոսները չեն, ինքը վերցրել ու զվարճանքի վայր է այնտեղ կառուցում: Ասել, որ այդ գործունեությունը չպետք է անցնի շրջակա միջավայրի փորձաքննություն, օրենքի խախտում է: Մենք մարզպետին դատի ենք տալու, ու թող իմանա, որ այդ դատը շահելու ենք, որովհետև նա այս պահին օրենք է խախտում»,ընդգծեց մեր զրուցակիցը:
Նշենք, որ Գարիկ Սարգսյանը նոյեմբերի 10-ին լրատվամիջոցներից մեկի հետ զրույցում հայտնել է, որ տարածաշրջանում առաջին կոկորդիլոսաբուծարանի ստեղծման աշխատանքներն արդեն սկսվել են, և այս պահին ներդրողը հողն է ձեռք բերել, ծառատունկ է իրականացնում, իսկ գարնանն ավելի ակտիվ աշխատանքներ կիրականացվեն:
Սիլվա Ադամյանը մեզ հետ զրույցում հայտնեց, որ բնապահպանության նախարարին հասցեագրված նամակ են ուղարկել, և փորձել պարզել՝ ծրագրի վերաբերյալ կազմակերպությունն ունի՞ թույլտվություն, և իրականացվե՞լ է արդյոք շրջակա միջավայրի փորձաքննություն:
Ի պատասխան, ԲՆ-ից ընդգծել են. ««Ապշանք Էկո-Այգու» ծրագիրը, համաձայն «Շրջակա միջավայրի վրա ազդեցության գնահատման և փորձաքննության մասին» ՀՀ օրենքի, ենթակա է շրջակա միջավայրի վրա ազդեցության փորձաքննության: Տեղեկացնում եմ, որ փորձաքննություն կատարելու համար անհրաժեշտ է շրջակա միջավայրի վրա ազդեցության նախնական գնահատման հայտը օրենքի 16-րդ հոդվածի 4-րդ մասի համաձայն կազմված ներկայացնել բնապահպանության նախարարություն՝ շրջակա միջավայրի վրա ազդեցության փորձաքննության»:
Սիլվա Ադամյանը շեշտեց, որ, փաստորեն, ԲՆ-ում սպասում են, որ ներկայացնեն:
«Բայց այդ մարդը չի ներկայացնում, չի ուզում ներկայացնել: Ի՞նչ է՝ նորից պետք է շարունակե՞ք հին գործելաոճը, ըստ որի՝ ով որտեղից գա՝ կապ չունի, եթե մարզպետը «դաբրո» է տալիս, ինչ ծրագիր ուզենա, կիրականացնի: Տվյալ պարագայում ես իսկապես բացարձակ տարբերություն չեմ տեսնում: Հիմա ինչքան ուզում ես՝ գրի, բարձրաձայնի, մեկ է, որոշել են, որ այս աղքատ երկրում կոկորդիլոս պետք է բուծեն: Եվ բավական չէ, որ Արամ Հարությունյանը (Ջրային տնտեսության պետական կոմիտեի նախկին նախագահ-խմբ.) Արարատյան հարթավայրի ամբողջ ջրային ռեսուրսները սպառել է, հիմա էլ իրենք պետք է կեղտոտեն ու այլանդակեն եղածը:
Պարտավոր են տվյալ նախագիծը շրջակա միջավայրի փորձաքննության ներկայացնել, բայց ստացվում է, որ մարզպետը նախաձեռնողի հետ խախտել է բոլոր օրենքները, և դա բավական չէ, ի լուր ամբողջ աշխարհի հայտարարում է, որ իրենք այդ ծրագրի իրականացումն արդեն սկսել են: Եթե ծրագիրը սկսվել է, պետք է միանշանակ կասեցվի»,-ասաց նա:
Վերջինս հայտնեց, որ պատրաստվում է խոսել ԲՆ ներկայացուցիչների հետ. «Հատկապես տեսչական մարմնից կպահանջեմ, որ գնան և ստուգումներ իրականացնեն՝ հասկանալու, թե ինչպե՞ս է մարզպետը նախաձեռնողի հետ խախտում ՀՀ օրենքները: Ես ուզում եմ հասկանալ, ի վերջո, մարզպետն արդյո՞ք գիտակցում է ու հասկանում, թե ինչի հետ պետք է գործ ունենա: Իհարկե, ո՛չ, քանի որ այդ ծրագիրը չի անցել շրջակա միջավայրի փորձաքննություն, և այդ փորձաքննության ռիսկերն ամբողջովին չեն գնահատվել: Ես նախաձեռնողի՝ Խաչատուրի հետ իր նախաձեռնությամբ համացանցում զրույց եմ ունեցել: Ասել եմ, որ մենք բնապահպան ենք, օդի մեջ ուղղակի դեմ լինելը մեզ հարիր չէ, և մենք օրենքը ցիտելով ենք աշխատում: Բացատրեցի, որ նախագիծը պետք է շրջակա միջավայրի փորձաքննություն անցնի: Բայց պատասխանեց ու ասաց՝ հանրային լսում ենք անցկացրել, հանդիպել ենք գյուղացիների հետ, և իրենք դեմ չեն: Սա բոլոր օրենքների խախտում է նշանակում»:
Բնապահպանը շեշտեց, որ այս փուլում իրենց խնդիրը տեսչական մարմնին տեղյակ պահելն է. «Եթե արձագանք չլինի, նորից կապ կհաստատենք ու կհասկանանք, թե ինչպե՞ս են այդքան բանն անում առանց նշված փորձաքննության: Կներկայացնենք նաև մեր նամակներն ու պատասխանները»: Նա չբացառեց, որ ինչ-որ փուլում հնարավոր է դիմեն նաև Պետական վերահսկողական ծառայության պետ Դավիթ Սանասարյանին. «Իսկ եթե մեզ ո՛չ բնապահպանության նախարարությունն օգնի, ո՛չ էլ Սանասարյանը, կդիմենք դատարան: Եվ համոզված եղեք, որ կշահենք այն, որովհետև օրենքը մեր կողմն է: Պարոն մարզպետը թող չմտածի, որ կկարողանա հեշտ ու հանգիստ այդ ծրագիրն իրականացնել»:
Тотально используя административный ресурс, он «ненавидит» административный ресурс? «Паст»
Чтобы ни одна стена не осталась без фотографии Никола Пашиняна: «Паст»
Сын Мадуро рассказал, что его отец сидит в общей камере на 18 человек
Чья кандидатура будет выдвинута на пост президента Союза армян России? «Паст»
Ваге Овеян разгромил соперника и стал чемпионом Европы по греко-римской борьбе
Властям содержание не нужно: «Паст»
Идеологическая подготовка нового давления на Армению. «Паст»
Здание семинарии было возвращено армянской епархии при поддержке Самвела Карапетяна: «Паст»
BBC: Звучит как угроза: Путин за месяц до выборов напомнил Армении об Украине
Борьба против Армянской Апостольской Церкви уничтожает легитимность любой власти․ Арман Варданян
