Քաղաքական պատվերի հոտը չափազանց սուր է՝ չզգացվելու համար

Աբել Մկրտչյանը ֆեյսբուքյան իր էջում գրում է.

Ընդամենը երեկ Օլիմպիական խաղերի արծաթե մեդալակիր Սիմոն Մարտիրոսյանը նվաճեց աշխարհի չեմպիոնի կոչումը ծանրամարտում՝ սահմանելով մի քանի ռեկորդ: Բոլորը ցնծում էին, բոլորը հպարտ էին, այդ թվում նաև լրատվականները, ովքեր րոպե առաջ փորձում էին տեղադրել չեմպիոնական տեսանյութը՝ նաև իրենց թանկագին դիտումների «խաթեր համար»: Դե, աշխարհն աշխարհով, լրատվականները իրենց ռեյտինգով: Ինչևէ:
Եվ այսօր, news.am անվանումով կայքերից մեկը հրապարակում է մի հոդված, թե իբր ՀԱՕԿ նախագահ Գագիկ Ծառուկյանը չի հոգում մեկ այլ օլիմպիական չեմպիոնի՝ Արթուր Ալեքսանյանի բուժզննման ծախսերը, և վերջինս անձնական միջոցներից է հոգում դրանք: Քաղաքական պատվերի հոտը չափազանց սուր է՝ չզգացվելու համար:
Մեր երկրում, վստահորեն կարելի է ասել, յուրաքանչյուրս տեղյակ ենք, որ Հայաստանում անչափ սիրելի ծանրամատի, ըմբշամարտի և, առհասարակ, այլ սպորտաձևերի մարզիկները գտնվում են ՀԱՕԿ-ի և անձամբ ՀԱՕԿ նախագահ Գագիկ Ծառուկյանի անձնական հոգածության ներքո: Անչափ ուրախ ենք, որ չուշացավ նաև ՀԱՕԿ-ի պաշտոնական հերքումը, որից պարզ է դառնում, օրինակ, որ Արթուր Ալեքսանյանը Գագիկ Ծառուկյանի անձնական միջոցներից ամեն ամիս ստանում է 6000 դոլար թոշակ: Սա հանրությանը անհայտ ինֆորմացիա է, քանզի Ծառուկյանը իր պարտքն է համարել արժանին մատուցել օլիմպիական չեմպիոնին՝ չնայած դա բոլոր զարգացած պետություններում վերջիններիս պարտականությունն է: Այս քայլին դիմելու համար պետք էր նաև մարզիկի առողջ հոգեբանություն ունենալ:
Սույն լրատվականը, իհարկե, նույնիսկ իրեն նեղություն չի տվել կապվել Ալեքսանյանի հետ՝ ինֆորմացիան ճշտելու համար: Վերջինս հաստատապես այն հերքելու էր: Բացառված է, որ ՀԱՕԿ-ը մերժեր Ալեքսանյանին, եթե վերջինս դիմեր նրանց:
Հարգելի՛ լրատվական, մի երկու կոպեկի համար մի՛ արատավորեք այն կառույցի և այն անձի համբավը, ովքեր գրեթե 0-ից հայկական սպորտը բարձրացրել են օլիմպիական մակարդակի, ովքեր Հայաստանով մեկ կառուցել են տասնյակ մարզադպրոցեր և ոչինչ չեն խնայում սպորտի մասսայականացման համար:
Թերևս բոլորս կհիշենք, թե ինչպես էր հայ հաղորդավարը հուզմունքից գրեթե լաց լինում այն պահին, երբ Ալեքսանյանը դարձավ օլիմպիական չեմպիոն, որովհետև դրանից առաջ գրեթե 15 տարի Հայաստանը այդ պատվից զրկված էր եղել՝ սպորտ-ինդուստրիայի անտեսման հետևանքով:
Առջևում կրկին Օլիմպիական խաղերն են, և ձեր կայքն էլ մեզ հետ հավասար ցնծալու է ՀԱՕԿ-ի շնորհիվ օլիմպիական նոր բարձունքների հասած մեր չեմպիոնների համար: Պարզապես մենք դա կանենք մաքուր խղճով, իսկ այ դուք՝ երևի թե կրկին 2 կոպեկի դիմաց կարող եք գրել, որ Օլիմպիական խաղեր վաղուց չեն անցկացվում: