Մեքենաների քանակին ոչ համահունչ փողոցները. ո՞րն է գումար պահանջող լուծումը

Ի՞նչ է պետք խցանման համար: Անփորձ վարորդներ, որոնք շատ են, ճանապարհ չզիջել, խցկվել, խոչընդոտ ստեղծել...

«Վարորդի ընկեր» իրավապաշտպան հասարակական կազմակերպության նախագահ Տիգրան Քեյանը թվարկում է հաճախակի բնույթ կրող երևանյան խցանումների պատճառներից մի քանիսը: Թվարկում է, բայց նաև խոսում կարգավորման ուղղություններից:

«Կան մի շարք կանոններ, որոնք վարորդների կողմից չեն պահպանվում: Օրինակ, երբ խաչմերուկը գերծանրաբեռնված է, անկախ նրանից՝ թույլատրելի ազդանշանն իրե՞նն է, թե՞ ոչ, վարորդը տվյալ դեպքում պետք է մուտք չգործի խաչմերուկ: Մուտք գործելով խաչմերուկ՝ իրենք ավելի շատ խցանում են ստեղծում, քան կարգավորում են տվյալ հատվածի երթևեկությունը: Անձրևներին տեսանելիության խնդիր կա, քանի որ մգեցված ապակիներով երթևեկողներն էլ են շատ: Բացի այդ՝ մեր քաղաքի ճանապարհների թողունակությունն էլ այդքան լավ չէ. տարեցտարի ավտոմեքենաների քանակն ավելանում է, բայց Երևանում ճանապարհների հետ կապված խնդիր կա: Մեր փողոցներն այդքան էլ համահունչ չեն մեքենաների քանակին՝ լայն փողոցներ այդքան էլ չունենք»,–Oragir.info-ի հետ զրույցում նշեց հ/կ նախագահը:

Անդրադառնալով օրեր առաջ Երևանում գրանցված խցանմանը՝ Տիգրան Քեյանը հիշեցրեց՝ 100–ից ավելի վթար էր գրանցվել:

«Դրա պատճառը նաև տեսանելիության բացակայությունն է. ուշադիր չլինելով՝ վթար են ստեղծում: Եվ, բնականաբար, մինչև ԱՊՊԱ–ի հետ ձևակերպումներն ավարտվում են, բավականին ժամանակ է անցնում, իսկ այդ հատվածը կաթվածահար է լինում: Ճանապարհային ոստիկանությունը պետք է զգոն լինի: Հատկապես ձյան, անձրևի ժամանակ բոլոր խաչմերուկներում պետք է հսկողություն իրականացնի, որ նման խցանումներ չլինեն: Ամեն տարի, երբ ձյուն է տեղացել, Երևանը եղել է գերծանրաբեռնված, բոլոր փողոցները՝ խցանված: Այն վարորդները, ովքեր ավտոմեքենաների անիվները չեն փոխել, այդ օրերին չպետք է երթևեկեն իրենց մեքենաներով: Չպետք է երթևեկեն նաև այն վարորդները, ովքեր փորձառու չեն, քանի որ իրենց ոչ ճիշտ երթևեկելու հետևանքով մեծ խցանումներ են առաջանում Երևանում»,– ասաց Տ. Քեյանը՝ որպես խցանման պատճառ առանձնացնելով նաև այն հանգամանքը, որ քաղաքացիները գրեթե նույն ժամին են ավարտում աշխատանքը:

Այդուհանդերձ՝ մեր զրուցակիցը ավելի մեծ արդյունք ակնկալելու համար այլ լուծում է ցանկանում տեսնել:

«Բոլոր հատվածներից շրջանցիկ այլ ճանապարհներ պետք է ստեղծել, եթե հնարավորություն ունենք, ապա վերգետնյա: Շրջանցիկ ճանապարհների դեպքում այն վարորդը, ով պետք է ծայրամասից ծայրամաս երթևեկի, տեղ հասնելու համար ստիպված չի լինի երթևեկել կենտրոնի փողոցներով, իսկ քաղաքը նման իրավիճակում չի հայտնվի: Բոլոր ուղղություններով պետք է ինչ–որ շրջանցիկ ճանապարհներ ունենանք, լավ կլինի, որ ծայրամասից ծայրամաս ինչ– որ շրջանաձև ճանապարհահատված նախագծվի, որ մարդիկ այլ ճանապարհով փորձեն հասնել իրենց կեցավայրը կամ աշխատավայրը: Իսկ կենտրոնական հատվածի մի շարք փողոցներում լայնացումներ անելն իրատեսական չէ: Վերջին մի քանի տարիների ընթացքում ՃՈ–ի կողմից մի շարք հատվածներում երթևեկության լրացուցիչ գոտիներ են ավելացվել, այսինքն՝ 2–ը 3 է դարձվել, 3–ը՝ 4, բայց այդ փոփոխությունը մի փոքր է լուծել խնդիրը, հարցի վերջնական լուծումը չի տրվել: Այլ ճանապարհների կառուցումը թույլ կտա բեռնաթափել Երևանի կենտրոնական մասը»,–շեշտեց Տ. Քեյանը՝ ընդգծելով, որ նշված ճանապարհով հարցին լուծում տալը, բնականաբար, ֆինանսական բաղադրիչ ունի:

«Առանց գումարներ ծախսելու հարցին լուծում չենք կարող տալ: Մենք վարորդներին չենք կարող ստիպել, որ չերթևեկեն, կամ ասել՝ մի՛ գնացեք տուն, մի՛ գնացեք կենտրոն կամ այսինչ ուղղությամբ: Թեպետ, երբ քաղաքային տրանսպորտի հարցը լուծվի և ներդրվի միասնական համակարգը, երթևեկությունը որոշակի կբեռնաթափվի: Մետրոյի նոր կայարանների կառուցումը նույնպես բեռնաթափման որոշակի գործառույթ կիրականացնի: Այս հարցերը պետք է լուծվեն, բայց շատ արագ չի լինի: Չենք կարող ասել՝ այսօր կամ վաղը քաղաքապետարանի կողմից կարող է իրականացվել մի այնպիսի ծրագիր, որից հետո վաղն այլևս խցանում չի լինի»,–նկատեց մեր զրուցակիցը:

Նա շեշտեց, որ այլ ճանապարհներ ստեղծելու մասով քաղաքապետարանը միշտ մտածել է, բայց դրան ուղղված աշխատանքների կատարումը ֆինանսական խնդրի պատճառով միշտ հետաձգվել է. «Ներկայումս նոր իշխանությունը մտածում է այդ ուղղությամբ, հուսանք՝ կկարողանան այդ հարցին լուծում տալ»: