Սա ոչ այլ ինչ է, քան քննադատական խոսքը լռեցնելու փորձ․ Ռուբեն Մելիքյանը՝ ՀՀ նոր իշխանության գաղափարակիրներին

Պաշտպանութան նախկին նախարար Վիգեն Սարգսյանի շատ հարցադրումներ իմ մոտ էլ էին առաջացել, եւ ես սպասում էի հետաքրքիր բովանդակային բանավեճի։ Այս մասին այսօր՝ հոկտեմբերի 28-ին, իր ֆեյսբուքյան էջում գրառում է կատարել Արցախի Մարդու իրավունքների նախկին պաշտպան Ռուբեն Մելիքյանը՝ անդրադառնալով ՀՀ վարչապետի պաշտոնակատար Նիկոլ Փաշինյանի եւ իր թիմի վարած արտաքին քաղաքականության շուրջ Վիգեն Սարգսյանի քննադատությանը։

Ռուբեն Մելիքյանը, մասնավորապես, գրել է․

«Երեկ առավոտյան Վիգեն Սարգսյանը հրապարակել էր քաղաքական խոսք պարունակող քննադատական նյութ, որտեղ բարձրացնում էր ՀՀ արտաքին քաղաքականությանը վերաբերող մի շարք հարցեր՝ փաստարկված ու դետալացված ձեւով։ Պարոն Սարգսյանի շատ հարցադրումներ իմ մոտ էլ էին առաջացել, եւ ես սպասում էի հետաքրքիր բովանդակային բանավեճի։

Սակայն, ցավոք, իմ սպասումները չարդարացան։ Նոր իշխանության ակտիվ գաղափարակիր որոշ գործիչների մոտ նախ երեւացին «Դու ո՞վ դարձար, որ քննադատես, դու՛, որ 1000 դրամով բանակ էիր պահում» մակարդակի փաստարկներ։ Այնուհետեւ գերիշխող դարձան «Դու ո՞վ ես, որ քննադատես, դու՛, որ ունես բնակարան Հյուսիսային պողոտայում» փաստարկները։ Ընդ, որում, եթե արձագանքների առաջին ալիքը հաճախ ուղեկցվում էր Վիգեն Սարգսյանին ուղղված լռելու կոչերով, ապա երկրորդը հաճախ կոչ էր պարունակում քննչական մարմիններին՝ ստուգելու Վիգեն Սարգսյանի ունեցվածքը։

Սա ոչ այլ ինչ է, քան քննադատական բնույթի քաղաքական խոսքը լռեցնելու փորձ, ինչը հակադիր է մարդու իրավունքների մշակույթին։

Հ․Գ. Որքան հասկացա՝ այսուհետ ցանկացած քննադատություն կատարելու համար անհրաժեշտ է լինելու ներկայացնել ունեցվածքի հայտարարագիր ու բացատրագիր։ Ահա ներկայացնում եմ. ես ունեմ մեկ ավտոմեքենա, հինգ ժամացույց, երկու համակարգիչ, 704 գիրք, այլ շարժական գույք։ Վերջին ձեռքբերումս է Էռազմ Ռոտերդամցու “Похвала Глупости” գիրքը։ Այն հիմա շատ պահանջված է»։