Վիգեն Խաչատրյան. «Պետք չէ Նիկոլին կուռքի վերածել, դա նրան միայն կարող է խանգարել». «Փաստ»

«Փաստ» օրաթերթը գրում է.

ԱԺ նախկին պատգամավոր, քաղաքական գործիչ Վիգեն Խաչատրյանը չի կասկածում, որ մայիսի 8–ից Հայաստանը վարչապետ կունենա և այն կլինի Նիկոլ Փաշինյանը: Սակայն ցավով է վերաբերվում այն իրողությանը, որ հասարակությունն անգամ վարչապետ ունենալու մասին ՀՀԿ–ի հստակ հայտարարությանը չի հավատում:

«Դա խոսում է այն մասին, որ մարդիկ այդ ուժին թերահավատորեն են վերաբերվում: Եվ ՀՀԿ–ն պետք է հետևություններ անի, թե ինչն է դրա պատճառը: Բացի այդ, մայիսի 1–ի ընտրությունների ժամանակ նրանք ասում էին, որ իրենք թիմ են և թիմի որոշումը սրբություն է: Հիմա կարծես թե կրկին հակասության մեջ են մտել իրենք իրենց հետ: Թիմը որոշել է, բայց թիմի անդամները չեն կատարում որոշումը: Հիմա հարց է ծագում, թե իրենք թի՞մ են, թե՝ ոչ: Բացի այդ, ինչպես է պատահում, որ մի դեպքում թիմի որոշումը սրբություն է, իսկ մյուս դեպքում՝ ոչ»,– ասաց Վիգեն Խաչատրյանը:

Երկար տարիների քաղաքական անցյալ ունեցող գործչի կարծիքով, թիմային աշխատանքը չպետք է դիտարկվի որպես ոհմակային աշխատանք և, եթե որևէ մեկը չի կատարում թիմի որոշումը, պետք չէ նրան դավաճան անվանել:

«Երբեմն կարող է թիմը սխալվել, իսկ անհատը ճիշտ լինել: Բայց լավ կլինի, որ քաղաքական թիմը մշտապես նույն վարքագիծը դրսևորի: Ի դեպ, պատգամավորի կողմից իր խղճով և համոզմունքներով ընտրություն կատարելը սահմանադրական նորմ է և պետք է դրա վրա հիմնվել: Իսկ այն, ինչ տեղի ունեցավ մայիսի 1–ից հետո, «դեմ» քվեարկելու համար թիմի անդամների վրա գործադրված ճնշումների հետևանք էր, որը հանգեցրեց լարվածության մեծացմանը»,– ասաց Վ. Խաչատրյանը:

Նրա կարծիքով ՀՀԿ–ն Նիկոլ Փաշինյանի օգտին պետք է քվեարկի՝ ելնելով այն իրողությունից, որ ինքն այլևս մեծամասնություն չէ խորհրդարանում: Դրա վառ ապացույցը ժողովրդական շարժումն է, որը նաև ցույց տվեց, որ ընտրությունները կեղծված և կաշառված են եղել:

«Հանրապետականները պետք է իրենց անձնական կարծիքը մի կողմ դնեն և հոգեբանորեն համակերպվեն, որ ընտրությունները սխալ հունով են ընթացել: Ու չնայած ընտրության արդյունքները դե յուրե օրինական են ճանաչվել, սակայն փաստացի բոլորս հասկացանք, որ հասարակությունը դրա հետ համաձայն չէ, որի պատճառով էլ պահանջում է նոր ընտրություններ՝ նոր վարչապետի երաշխավորությամբ: Այս պայմաններում ՀՀԿ խմբակցությունը պետք է քվեարկի ոչ թե հօգուտ անձի, այլ՝ հասարակական պահանջի: Եվ բոլոր նրանք, ովքեր քվեարկում են Նիկոլ Փաշինյանի դեմ, ըստ էության ցանկանում են վերահաստատել իրենց կեղծ կարգավիճակը ու դրանով իսկ բռնազավթում են իշխանությունը»,– համոզված է Վ. Խաչատրյանը:

Քաղաքական գործչի կարծիքով՝ ՀՀԿ–ի խոհեմությունն ու հեռատեսությունը պետք է օգնի արձանագրել, որ իրենք այլևս քաղաքական մեծամասնություն չեն: Նրանք պետք է ընդունեն դա և այնպիսի կեցվածք չընդունեն, թե իրենք ինչպես որոշեն, այդպես էլ կլինի: Ժամանակն է, որ կեղծ մեծամասնությունն իր տեղը զիջի իրական մեծամասնությանը, իսկ թե ով կլինի իրական մեծամասնության կազմում, կորոշի ժողովուրդը:

Վ. Խաչատրյանը քաղաքականության մեջ և՛ առնետավազք է տեսել, և՛ ճամբարափոխություն, և այդ ամենին հանգիստ է վերաբերվում:

«Կլինեն թյուրըմբռնումներ, չարաշահումներ, պիտակավորումներ, բայց դրանք անցողիկ բաներ են, բայց կարևորն այն է, որ հասարակությունը հասկանա, թե ով ինչով է «շնչում»: Ինչ վերաբերում է առնետավազքին, ապա քաղաքական գործիչները պետք է ոչ թե այստեղից այնտեղ վազեն, այլ հասկանան, որ կարող են նաև սխալվել, իսկ հետո սխալն ուղղել»,– ասաց Վ. Խաչատրյանը:

Խոսելով «թաղի խուժան» կոչվող խմբերի «ճամբարափոխ» լինելու և իրենց «ծառայությունները» նոր եկող քաղաքական ուժերին մատուցելու վտանգի մասին՝ նա նշեց, որ նման խմբերը վակուումում չեն գործում և այն հասարակական տրամադրությունները, թե «Նիկոլը փրկիչ է», «Նիկոլը կուռք է», կհանգեցնի միայն նրան, որ Նիկոլ Փաշինյանը շատ վատ աշխատի:

«Նիկոլը կուռք չէ: Կուռքերը ինչպես առաջանում, այնպես էլ դառնում են ատելության պատճառ: Եվ պետք չէ Նիկոլին կուռքի վերածել: Նա ընդամենը կարողացավ մթնոլորտը փոխել, բայց հարց է ծագում, թե հասարակությունն ուզո՞ւմ է փոխվել, թե՝ ոչ: Եթե մարդիկ ուզում են փոխվել, ապա «թաղի խուժանը» կմտնի թփերի տակ, իսկ եթե ոչ՝ գլուխ կբարձրացնի: Հիմա հասարակությունը պետք է իրեն հաշիվ տա, թե ընտրելու է հանրային կյանքով ապրողին, ով պատրաստ է սպասարկել հասարակությանը, թե՝ ուզում է պահից օգտվելով՝ իր մարդկանց անցկացնել ու օգտվել դրանից: Թավշյա հեղափոխությունը փոխվելու հնարավորություն է ստեղծում և, եթե մարդիկ չեն ուզում փոխվել, ապա «թաղի խուժանը» կրկին կնստի նրանց ուսերին և ուր ուզում է՝ այն կողմը կքշի»,– ասաց Վ. Խաչատրյանը:

Շարունակությունը՝ «Փաստ» օրաթերթի այսօրվա համարում