ԱԺ արտահերթ նիստից հետո մայիսի 2–ի առավոտը. «Փաստ»

«Փաստ» օրաթերթը գրում է.

Մայիսի 2–ի վաղ առավոտից փակվել էին մայրաքաղաքի Կոմիտաս պողոտան, Վ. Վաղարշյան, Հր. Քոչար, Կասյան փողոցները: Փակ էր նաև դեպի Կիևյան կամուրջ տանող՝ Կիևյան փողոցը, ինչպես նաև դեպի Ազգային ժողով տանող Բարեկամության պողոտան:

Ժամը 10:00–ին տեղեկություն ստացվեց, որ ցուցարարները փակել են նաև «Կ. Դեմիրճյանի» անվան Երևանի մետրոպոլիտենի բոլոր կայարանները, ինչպես նաև «Զվարթնոց» օդանավակայան տանող ճանապարհը: Չէին աշխատում նաև մետրոյի «Բարեկամություն» կայարանի հարևանությամբ գտնվող գետնանցումի տաղավարները:

Փողոցների երթևեկությունն արգելափակած ցուցարարները «Փաստ»–ի թղթակցի հետ զրույցում ասում էին, որ իրենք առաջնորդվում են հանրահավաքի ժամանակ հնչեցված հրահանգներով, իսկ այս կամ այն փողոցն արգելափակելու տեղի և ձևի ընտրության հարցում որևէ ուղղորդում չկա:

«Յուրաքանչյուրս մեր խղճի առջև չմեղանչելու համար ենք միացել այս համաժողովրդական շարժմանը: Ողջ ազգին նույն խնդիրներն են խանգարում` որ ոչ միայն երկիրը զարգանա, այլև ժողովուրդը, բայց պատկերացրեք, որ այս օրերին հասկացա, որ ՀՀԿ–ի գործելաոճի շնորհիվ մեզ մոտ բավականին զարգացել են ստեղծագործական հմտությունները: Օրինակ, եթե երեկ Նիկոլ Փաշինյանը վարչապետ ընտրվեր, այսօր ամեն ինչ հանդարտ կլիներ, բայց հիմա առավոտից ոչ միայն փողոցներն ենք փակում, այլև մտածում ենք, թե ուրիշ ինչ այլ հնարավոր միջոցներով կարող ենք ճնշում գործադրել իշխանությունների վրա: Այնպես որ, ինչքան ՀՀԿ–ն հապաղի, այնքան է՛լ ավելի հետաքրքիր անակնկալներ կմատուցենք նրանց»,– ասաց ակցիայի մասնակիցներից մեկը:

Նշենք նաև, որ անհնազանդության խաղաղ ակցիայի մասնակիցները մայիսի 1–ին միանգամից դուրս եկան փողոց, երբ ութ ու կես ժամ տևած ԱԺ արտահերթ նիստի ավարտից րոպեներ առաջ պարզ դարձավ, որ ժողովրդի թեկնածուի օգտին քվեարկած ձայները բավարար չեն երկրում ստեղծված քաղաքական ճգնաժամին վերջակետ դնելու համար: Փաստորեն, մայիսի 1–ի երեկոյան պարզ դարձավ, որ ՀՀԿ–ն, ԱԺ նիստի ժամանակ մարդկանց նյարդերը ջլատելուց բացի, որոշել է նաև երկար տարիներ ջլատված երկրին վերջին հարվածները հասցնելու ճանապարհով գնալ:

Շարունակությունը՝ «Փաստ» օրաթերթի այսօրվա համարում