Պարույր Հայրիկյան. «Նիկոլը կարող է տասը սխալ անել, բայց ամենակարևորը կարողացել է ճիշտ անել». «Փաստ»

«Փաստ» օրաթերթը գրում է.

ԱԻՄ առաջնորդ Պարույր Հայրիկյանն օրերս Ֆեյսբուք սոցիալական ցանցի իր միկրոբլոգում, կատարելով գրառում, հարց էր բարձրացրել, թե ինչու ընդդիմադիր քաղաքական գործիչները որպես պարզ քաղաքացի չեն մասնակցում Նիկոլ Փաշինյանի և «Իմ քայլը» նախաձեռնությունների կողմից կազմակերպվող հանրահավաքներին կամ բողոքի ակցիաներին:

Պարույր Հայրիկյանի կարծիքով, անկախ նրանից, թե երեկ կամ այսօր ինչ կասվի կամ կարվի, պետք է վստահ լինել, որ այն աշխարհի վերջին օրը չէ, և այն շարժումը, որը սկիզբ առավ վերջին օրերին, հաջորդ ռազմավարական քայլի նախապատրաստական փուլն է:

«Նույնիսկ ամենաբուռն իրադարձությունների դեպքում մեր կողմից կարևոր համարվող նպատակների որևէ քայլ ի վնաս մեկի չի կարող լինել, քանի որ սրանից ավելի անմխիթար վիճակ չի կարող լինել: Այսօր քաղաքացին երկրի տերը չի, և մեր նախաձեռնած գործընթացը գնալով հասունանում է: Երկու ճանապարհ կա այսօր, մեկը՝ կրիտիկական զանգվածի դեպքում, եթե կարողանան ուժի մեջ պահել «բաց ձեռքերի» մարտավարությունը, նշանակում է, որ հնարավոր կլինի այնպիսի ճնշում գործադրել, որ ամեն ինչ ընթանա հեղափոխական ճանապարհով: Երկրորդ ճանապարհը՝ շատ արագ ստորագրահավաքով Սահմանադրությունը փոխելու ճանապարհն է, որից հետո հնարավոր կլինի լուծել բոլոր մյուս՝ իշխանափոխությանը, արժեքային համակարգին վերաբերող մնացած բոլոր հարցերը»,– «Փաստ»–ի հետ զրույցում ասաց Պ. Հայրիկյանը:

Հասարակական–քաղաքական գործիչը նշեց, որ միանշանակ է, որ երկրում ստեղծված ներքաղաքական զարգացումները թույլ են տալիս արձանագրել, որ իրավիճակը «մեռյալ կետից» շարժվել է և գնալով զարգացում է ապրում:

«Ես ավելի վաղ արձանագրել էի, որ Նիկոլը փորձ է անում մարդկանց արթնացնել և պետք է գոհունակությամբ արձանագրենք, որ այդ հարցը լուծված է: Հիմա խնդիրը վերաբերում է նրան, թե ընդհանրապես մարդկանց՝ «այսօր, կամ երբեք» տրամադրություններն ընդհանրապես արդարացված են, թե՝ ոչ: Եվ հարկավոր է հասարակությանը բացատրել, որ, անկախ դեպքերի զարգացման ընթացքից, կա մեկը մյուսից հիմնավոր հաջորդական քայլերի շարք»,– ասաց Պ. Հայրիկյանը:

Նա նաև նշեց, որ ներկայում տեղի ունեցող դեպքերի արդյունքում Հայաստանը հայտնվել է համաշխարհային հանրության ուշադրության կենտրոնում, սակայն կա մի բան, որը պետք է հաշվի առնել, որ բոլոր քաղաքական ուժերի ներկայացուցիչներն ու առաջնորդները պետք է մի կողմ դնեն իրենց ամբիցիաները և որպես քաղաքացի միանան շարժմանը:

«Նիկոլը սկսել է, Նիկոլը ապրի: Վե՛րջ: Նիկոլը կարող է տասը սխալ անել, բայց ամենակարևոր բանը կարողացել է ճիշտ անել՝ իր խենթ հավատով կարողացավ մարդկանց ոտքի հանել: Եվ նրանք, ովքեր եկել ու միացել են Նիկոլի շարժմանը, պետք է հաջորդ փուլում կոնսուլտացիոն խորհուրդ ստեղծեն: Եվ եթե մեկը շոգեքարշի դերն է կատարում, ապա մյուսները նույնպես պետք է ինչ–որ դերակատարում ունենան: Եվ նորից եմ կրկնում, եթե քաղաքական կուսակցությունները չեն կարողանում որպես կուսակցություն միանալ շարժմանը, ապա կարող են որպես պարզ քաղաքացի մասնակցել և իրենց նպաստը բերել Հայաստանի ներքաղաքական կյանքում տեղի ունեցող զարգացումներին»,– ասաց Պ. Հայրիկյանը:

Շարունակությունը՝ «Փաստ» օրաթերթի այսօրվա համարում