Ավետիք Իշխանյան. «Հատուկ միջոցների կիրառումն անօրինական էր, անտեղի ու վտանգավոր». «Փաստ»

«Փաստ» օրաթերթը գրում է.

Բաղրամյան պողոտայում ապրիլի 16–ին տեղի ունեցած բախման ժամանակ ոստիկանությունը հատուկ միջոցներ կիրառեց ցուցարարների դեմ։

«Հայաստանի Հելսինկյան կոմիտեի» նախագահ Ավետիք Իշխանյանը «Փաստ»–ի հետ զրույցում գնահատելով ոստիկանության գործողությունները, նախ ընդգծեց.

«Փաստորեն կիրառվեցին հատուկ միջոցներ, պայթուցիկներ: Նախ՝ եթե հատուկ միջոցներ կիրառելու անհրաժեշտություն կա, ապա դրա մասին պետք է հայտարարություն լինի, որովհետև մարդկանց համար այդ անսպասելիությունը կարող է շատ վատ հետևանքներ ունենալ: Կարող են լինել դյուրագրգիռ մարդիկ և այդ հանկարծակի պայթյունները շատ վատ ազդեցություն ունենան նրանց վրա: Այսինքն՝ ոստիկանությունը պետք է մի քանի անգամ զգուշացնի այդ մասին: Ես համոզված եմ, որ միջազգային ու առնվազն ՀՀ ոստիկանության կանոնակարգերով դա պետք է նախատեսված լինի: Մի քանի անգամ զգուշացնելուց հետո նոր պետք է այդպիսի հատուկ միջոցներ կիրառվի, որպեսզի իրավաչափությունը կասկածի տակ չլինի»:

Ավետիք Իշխանյանի խոսքով՝ բացի այդ պետք է գնահատել հատուկ միջոցների կիրառման անհրաժեշտությունը:

«Պետք է գնահատական տալ, արդյո՞ք ցուցարարներին հանդարտեցնելու այլ մեթոդ չկար, քան հատուկ միջոցների կիրառումն էր: Եթե մենք գնահատական տանք ապրիլի 16–ին տեղի ունեցած միջադեպին, ապա ցուցարարները բացարձակապես չէին ցանկանում գրոհել, ավելին՝ բանակցություններ էին ընթանում: Հատուկ միջոցների կիրառման անհրաժեշտություն կա՞ր, այլ մեթոդներ չէին մնացե՞լ: Ես կասկածում եմ: Երկրորդը՝ եթե նույնիսկ այլ մեթոդներ չկան, ապա պետք է զգուշացվի ցուցարարներին հատուկ միջոցների կիրառման մասին: Երկու տարի առաջ Խորենացի փողոցում կիրառված հատուկ միջոցները, ինչպես նաև ապրիլի 16–ի միջադեպը մի բան են ցույց տալիս՝ մեր ոստիկանությունը հատուկ միջոցների կիրառման մասնագետներ չունի: Միայն այն, որ առաջինն ընկավ հենց ոստիկանների մեջ, դա է ապացուցում: Բացի այդ՝ հատուկ միջոցներից մարդիկ վնասվածքներ են ստանում, մինչդեռ վնասվածքներ չպետք է ստանան: Հատուկ միջոցների կիրառումը պետք է միայն զուտ աղմուկի էֆեկտ ունենա: Բայց մարդիկ բազմաթիվ մարմնական վնասվածքներ են ստանում, բեկորները մարդկանց մարմնի մեջ են խրվում: Չէր բացառվում նաև, որ աչքի մեջ ընկնեին ու մարդիկ զրկվեին տեսողությունից: Սա նշանակում է, որ ոստիկանության հատուկ միջոցները կամ անորակ են կամ հատուկ միջոցների օգտագործման փորձառություն չունեն: Իսկ ավելի հավանական է՝ երկուսը միասին: Այսինքն՝ և՛ հատուկ միջոցներն են անորակ և պատրաստ չեն այն կիրառելու: Սա ցույց է տալիս ՀՀ ոստիկանության ոչ պրոֆեսիոնալ լինելը»,– նկատեց իրավապաշտպանը:

Նա ընդգծեց, որ հավաքը խաղաղ էր. «Մի քանի անգամ հավաքը գլխավորող Նիկոլ Փաշինյանը շեշտեց, հորդորեց ու պահանջեց հավաքի մասնակիցներից, որ ոստիկանների նկատմամբ ոչ մի բռնություն չլինի: Շեշտեց նաև, որ ոստիկանները մեր եղբայրներն են: Իսկ երբ մոտեցավ ոստիկանական պատնեշին, Ն. Փաշինյանն ուղղակի բանակցություններ էր վարում ու որևէ գրոհի մասին խոսք չէր կարող լինել: Եվ հանկարծ, առանց նախազգուշացման կիրառվեցին հատուկ միջոցներ: Սա անօրինականություն էր: Ես չեմ ուզում խոսել անգամ համաչափության մասին, որովհետև համաչափությունը ենթադրում է, որ կարելի էր կիրառել, բայց կիրառվել է անհամաչափ: Սա հատուկ միջոցների անտեղի ու շատ վտանգավոր կիրառում էր, քանի որ մարդկանց կյանքին վտանգ էր սպառնում»:

Հարցին, թե ի՞նչ հետևանք պետք է լինի, որ ոստիկանությունը զերծ մնա նման գործողություններից, Ավետիք Իշխանյանը պատասխանեց. «Չգիտեմ՝ հարցին ինչպես պատասխանել: Այդիպիսի դեպքեր հնարավոր է լինեն ցանկացած իրավական պետության մեջ: Բայց այդպիսի դեպքերից հետո իրավական պետության դեպքում հետաքննություն է սկսվում: Իսկ երբ պարզվում է, որ իսկապես ոստիկանությունը ոչ օրինական դաշտում է գործել, ապա պատժվում են և՛ հրաման տվողները և՛ այն կատարողները: Իսկ ի՞նչ է նշանակում իրավական պետություն: Իրավական պետություն՝ նշանակում է դատաիրավական համակարգ, որը չի ենթարկվում այդ պահի քաղաքական իշխանության հրահանգներին: Ունե՞նք արդյոք մենք այդպիսի համակարգ, եղե՞լ են արդյոք այդպիսի հետաքննություններ, ինչից հետո մեղավորները պատժվել են: Հիշենք մեր ամբողջ նորանկախ պատմությունը. 1995 թ., 1996 թ., 1998 թ., 2003 թ., 2004 թ., 2008 թ., 2015 թ., 2016 թ.: Ես կավարտեմ իմ հարցազրույցը հետևյալ կերպ՝ No comment»:

Շարունակությունը՝ «Փաստ» օրաթերթի այսօրվա համարում