Արցախի հեռուստատեսությամբ սահմանադրական հանրաքվեին դեմ լինողները նույնացվում են թշնամու հե՞տ. «Փաստ»

«Փաստ» օրաթերթը գրում է.

«Դեմ եմ»–ի շտաբին եթեր չի տրամադրվում

Փետրվարի 20–ին Արցախում սպասվող սահմանադրական փոփոխություններին ընդառաջ Լեռնային Ղարաբաղում մեկնարկած «Ոչ»–ի քարոզարշավն ընթանում է անհավասար պայմաններում:
Այս մասին «Փաստի» հետ զրույցում ասաց «Դեմ եմ»–ի շտաբի ներկայացուցիչ, «Հայկական վերածնունդ» կուսակցության նախագահ Հայկ Խանումյանը՝ հավելելով, որ Արցախի տեղեկատվության ամենաազդեցիկ աղբյուրը՝ Արցախի Հանրային հեռուստաընկերությունը եթեր չի տրամադրում իրենց:
«Փոխարենն անընդհատ եթեր են հրավիրում «Կողմ եմ»–ի կողմնակիցներին՝ իրենց քարոզչությունն իրականացնելու համար: Իսկ «Կողմ»–ի քարոզիչներից մեկը նույնիսկ ցուցաբերում է բացահայտ ֆաշիստական մոտեցումներ՝ դեմ արտահայտվողներին նույնացնելով թշնամու հետ»,– ասաց Հայկ Խանումյանը՝ հավելելով, որ քարոզարշավի ընթացքում Արցախի Հանրային հեռուստաընկերությունը որոշել է վճարովի եթեր չհատկացնել քարոզարշավ իրականացնող կողմերին:
Արցախի ընդդիմադիր «Ազգային վերածնունդ» կուսակցությունը ձևավորել է «Դեմ եմ»–ի շտաբ ու այս օրերին միայն կարողանում է հանդիպումներ ունենալ քաղաքացիների հետ, քարոզչական թերթիկներ բաժանել, կատարել զանգեր բնակիչներին ու փակցնել քարոզչական պաստառներ: «Մեր շտաբի անդամները և համագործակցող անձինք ճնշումների չեն հանդիպել, սակայն ակնհայտորեն զգացվում է վարչական ռեսուրսի օգտագործման փաստը»,– ասաց Արցախի խորհրդարանի պատգամավորը:
Հարցին, թե ինչպիսին է արցախցիների ընդհանուր տրամադրվածությունը սահմանադրական փոփոխությունների առթիվ, Հայկ Խանումյանն ասաց. «Ընդհանուր տրամադրվածության մասին դժվար է դատել, քանզի մեծ մասը զգուշանում է բարձրաձայն կարծիք հայտնելուց: Որոշակի ցուցիչ կարող են լինել սոցիալական ցանցերի օգտատերերի գրառումները, սակայն միշտ չէ, որ այն արտացոլում է ամբողջ պատկերը»:
Նշենք, որ «Ազգային վերածնունդ» կուսակցությունը իր կայքէջում կոչ է անում «դեմ» քվեարկել սահմանադրական փոփոխություններին՝ հիմնավորելով, որ դրանցով Արցախի նախագահ Բակո Սահակյանն իր պաշտոնավարումը ուզում է երկարաձգել մինչև 2030 թվականը: «Արցախում սահմանադրական փոփոխությունների կարիք չկա, գործող Սահմանադրությունն ի վիճակի է ապահովել երկրի բնականոն զարգացումը:
Այս փոփոխություններով Բակո Սահակյանը նպատակ ունի նախագահի պաշտոնում մնալ նաև 2017 թ.–ից հետո (գործող սահմանադրությամբ նա 2017 թ. չի կարող առաջադրվել նախագահական ընտրություններում): Սահմանադրական փոփոխություններով հնարավորություն է ստեղծվում նախագահել մինչև 2030 թ.»,– ասվում է կուսակցության հրապարակած քարոզչական թերթիկում:
«Ազգային վերածնունդը» նաև հայտարարում է, որ «մեկ անձի իշխանության վերարտադրության համար սահմանադրություն փոխելով` մենք նմանվում ենք Ադրբեջանի, Զիմբաբվեի, Թուրքմենստանի և այլ ավտորիտար ռեժիմներով երկրների: Նման հեռանկարը կթուլացնի Արցախի միջազգային դիրքերը, կկրճատի մեր բարեկամների թիվն աշխարհում, կծնի անարդարության զգացում երկրի ներսում: Կկորչի համայն հայության հավատն Արցախի նկատմամբ, կկրճատվեն ներդրումներն ու նվիրատվությունները»,– ասված է կոչում:
Ավելին՝ ըստ Արցախի խորհրդարանական կուսակցության, այս փոփոխություններով ժողովուրդն ավելի է հեռացվում որոշումներ ընդունելու գործընթացից: «Եթե գործող Սահմանադրությամբ սահմանադրական փոփոխությունները կատարվում են համաժողովրդական հանրաքվեով, ապա այս նախագծի ընդունվելու դեպքում այդ իրավունքը կանցնի Ազգային ժողովին: Սովորաբար, քաղաքական իրավունքների սահմանափակմանը հաջորդում է մարդու հիմնարար իրավունքների սահմանափակումը: ԴԵՄ քվեարկելով սահմանադրության նախագծին՝ մերժում ենք այդ հեռանկարը»,– ասված է ընդդիմադիր կուսակցության կոչի մեջ:

  Շարունակությունը` «Փաստ» օրաթերթի այսօրվա համարում: