Տիգրան Մանսուրյան. «Լուրջ երաժշտություն՝ առանց «թատրոնի», հրաշալի երեկո էր, կեցցե՛ս, Շաքե՛». «Փաստ»

«Փաստ» օրաթերթը գրում է.

Կոմիտասի թանգարան–ինստիտուտը երեկ լցվել էր դասականների ոգով: Համերգային դահլիճն այդ ոգով պարուրողը դաշնակահարուհի Շաքե Թադևոսյանն էր:

Դաշնամուրային երաժշտության երեկոյի ծրագրում ներառված էին Բախի «Քրոմատիկ Ֆանտազիա և Ֆուգա d–moll», Յոհաննես Բրամսի «Ինտերմեցո, Op.117»,

Սերգեյ Պրոկոֆևի «Սոնատ N6 A–dur» և Էդվարդ Միրզոյանի «Պոեմ» ստեղծագործությունները:

Հանդիսատեսն, ով ժամեր շարունակ ամբողջությամբ սուզվել էր դաշնամուրային ստեղծագործությունների ալիքների մեջ, այդքանով չբավարարվեց: Ավելի քան մեկուկես ժամ տևած երեկոյի ժամանակ դաշնակահարուհին այնքան մեծ էներգիա, սեր և արվեստ փոխանցեց, որ երեկոյի ավարտին հանդիսատեսը նորից երաժշտություն «պահանջեց»: Արդեն այլ ստեղծագործությունների տեսքով դաշնակահարուհին կրկին փոխանցեց նույն էներգիան, սերն ու արվեստը:

Հայաստանի ժողովրդական արտիստ, մաեստրո Տիգրան Մանսուրյանը ևս հանդիսատեսի շարքում էր: Դաշնամուրային երաժշտության երեկոյի ավարտին իր խոսքն ուղղելով դաշնակահարուհի Շաքե Թադևոսյանին, մաեստրոն ասաց. «Լուրջ երաժշտության կարոտ ունեինք, հագեցանք: Հրաշալի կատարումներ էին՝ առանց թատրոնի, մաքուր երաժշտություն: Հրաշալի երեկո պարգևեցիր, ավելի մեծ լսարան ու ավելի հաճախ կուզենամ Շաքեն համերգներ տա: Կեցցես Շաքե»:

Պրոֆեսիոնալ դաշնակահարուհի Շաքե Թադևոսյանը 1994 թվականին արժանանցել է «Ամեդուս» հանրապետական մրցույթի դիպլոմանտի պարգևին:

1998 թվականին Փարիզում կայացած «Յոհան Սեբաստիան Բախի անվան միջազգային մրցույթ»–ում արժանացել է «II» մրցանակին:

Իսկ արդեն 2000 թվականին Փարիզում տեղի ունեցած «Պիեռ Լանտիեի անվան միջազգային մրցույթ»–ում արժանացել է «դաշնամուրային կոնցերտի լավագույն կատարում» մրցանակին: