Ոչ թե ձևական պատասխանի, այլ ռեալ քայլերի սպասում. «Փաստ»

«Փաստ» օրաթերթը գրում է.

«Նաիրիտի» վերագործարկման և գործարանի հետ կապված այլ հարցերի քննարկման արդյունքում «Հայ մասնագետների խորհուրդը», միանալով նաիրիտցիների պայքարին, գրություն է ուղարկել ՀՀ վարչապետին և բաց նամակ հղել ՀՀ նախագահին։ «Հայ մասնագետների խորհրդի» և «Նաիրիտի համակարգող խմբի» համատեղ քննարկումներին ներկա է եղել նաև համակարգող խմբի անդամ, «Նաիրիտի» նախկին աշխատակից Արագեղեցիկ Կարեյանը:

«Ինչպես գիտնականների խորհուրդը, այնպես էլ մենք դիմումը մի շարք հանգամանքներով ենք հիմնավորում: Նախ՝ ՀՀ կառավարությունն ուզում է առաջիկա տարիներին հանրապետությունում 10–15 արտադրամաս գործարկել, մինչդեռ կա պատրաստի գործարան, որը կարելի է վերագործարկել՝ օգտագործելով ավելի քիչ ֆինանսական միջոցներ և կարճ ժամանակահատված: Բացի այդ, պետբյուջեից տարեկան մեկուկես միլիարդ է դուրս գրվում այն ընկերությունների հաշվին, որոնք գյուղատնտեսության ոլորտն ապահովում են պարարտանյութով: Մինդեռ կարելի է առանց այդ գումարի հատկացման գործարանում պարարտանյութի արտադրություն կազմակերպել, ինչն ավելի էժան կլինի, քան դրսից բերված պարարտանյութը: Երրորդ հանգամանքն արտագաղթի դեմ կիրառվող միջոցներն են: Եթե գործարանը վերագործարկվի՝ այնտեղ շուրջ 2000 մարդ կաշխատի: «Նաիրիտի» վերագործարկումը մեզ հնարավորություն կտա մեր «ՏԷՑ»–ի և ատոմակայանի ռեակտորների մաքրման համար կաուստիկ սոդա արտադրել»,–«Փաստ»–ի հետ զրույցում ասաց Ա. Կարեյանը՝ հավելելով, որ նշված հարցերից բացի գիտնականների կողմից առաջ քաշվող այլ առաջարկներ ևս կան:

«Թե՛ նշվածները, թե՛ մնացած առաջարկները կարելի է քննարկել, և գործարանը վերագործարկելուց հետո իրականացնել: Սա ուղղություն է, որ մենք տալիս ենք ՀՀ կառավարությանը: Մենք արտասահմանից ներդրող ունենք, ով հայտ է ներկայացրել: Եթե ՀՀ կառավարությանը ձեռնտու չէ տվյալ ընկերությունը, իրենք կարող են ուրիշ ընկերություն ներգրավել կամ հենց ՀՀ կառավարությունը կարող է ներդրում անել: Մեծ հաշվով՝ մեզ համար մեկ է, թե ով ներդրում կանի: Մեզ համար կարևոր է, որ գործարանը վերագործարկվի և աշխատի: Առաջ են քաշում նաև անվտանգության խնդիրը, բայց ոչ մի խնդիր այդ առումով չկա: Տարիներ շարունակ մեր կադրերն իրենց աշխատանքով են փաստել, որ վախ գոյություն չունի: Պատրաստի կաուչուկը նույն բանն է, ինչ, օրինակ՝ պահածոն: Այսինքն՝ ոչ մի վտանգ չկա այն ներկրելու կամ արտահանելու դեպքում: Մեր հաշվարկներով՝ ամսվա կտրվածքով 2,7–ից մինչև 4 միլիոնի եկամուտ կունենանք, եթե ամսական 2000 տոննա կաուչուկ արտադրենք»,– նշեց նա:

Արագեղեցիկ Կարեյանը նկատեց՝ այս տարիների ընթացքում բազմաթիվ դիմումներ, նամակներ են ուղարկել տարբեր կառույցների:

«Շատ են եղել դեպքեր, որ մեր նամակներին ոչ մի պատասխան չի տրվել: Համենայն դեպս, հույս ունենք, որ ի վերջո կպատասխանեն մեր նամակներին: Բայց ոչ թե ձևական պատասխանի, այլ ռեալ քայլերի և առաջարկությունների ենք սպասում: Մենք ունենք տեղեկատվություն, որ կա ինչ–որ իրանական ընկերություն, որը մուտք է գործել ու տեսել է գործարանը, և բանակցություն կա ՀՀ կառավարության հետ: Բայց կառավարության կողմից դա չի բարձրաձայնվում, ինֆորմացիան պաշտոնական չէ, բայց մեր տեղեկություններով՝ նրանց այցերը հաճախակի են: Այս ամենը հուսադրող է մեզ համար: Մյուս կողմից ապամոնտաժում են այն սարքավորումները, որոնք մեր նախնական ծրագրով պետք է ապամոնտաժվեին: Այսինքն՝ հիմնական սարքավորումներին, այսպես ասած, դեռ չեն կպչում: Եթե ժամանակի ընթացքում վերագործարկման ցանկություն ընդհանրապես չլինի, պարզ է, որ դրանց ապամոնտաժմանն էլ հերթը կհասնի: Վտանգ առայժմ չկա, բայց եթե մի քանի ամիս էլ ՀՀ կառավարությունը լռի, մենք կհասկանանք, որ չեն ուզում վերագործարկման մասին մտածել, ինչպես նաև զարգացնել արդյունաբերությունը: Որքան վերագործարկումը հետաձգվում է՝ մասնագետների արտագաղթ է տեղի ունենում: Զուգահեռ կա նաև սարքավորումների մաշվածության խնդիր»,– հավելեց գործարանի նախկին աշխատակիցը:

Շարունակությունը՝ «Փաստ» օրաթերթի այսօրվա համարում