Ստուգման գործընթաց՝ «ՎիզաՄետրիկ»–ի վերաբերյալ. «Փաստ»

«Փաստ» օրաթերթը գրում է.

Հայաստանում Գերմանիայի արտակարգ և լիազոր դեսպան Մաթիաս Քիսլերի հայտարարության վերաբերյալ հասարակության և փորձագիտական շրջանակներում առկա որոշակի մտահոգություններին «Փաստ»–ն արդեն անդրադարձել է: Մասնավորապես՝ դեսպանը հայտարարել էր, որ այս տարվա ապրիլի 3–ից Հայաստանում Գերմանիայի դեսպանատնից Շենգենյան վիզաների համար դիմումատուներին սպասարկող «ՎիզաՄետրիկ» կազմակերպությունը ռուս–թուրքական կոնսորցիում է, որի հոլդինգ կազմակերպությունը գտնվում է Թուրքիայում: Նա հայտնել էր, որ 2018 թվականի ապրիլի 3–ից Երևանում Գերմանիայի, Բելգիայի, Նիդեռլանդների, Լյուքսեմբուրգի, Ավստրիայի և Շվեդիայի համար ներկայացված Շենգենյան վիզայի դիմումները կընդունի ոչ թե Գերմանիայի դեսպանությունը, այլ «ՎիզաՄետրիկ» սահմանափակ պատասխանատվությամբ ընկերությունը: Քաղաքացիների գլխավոր մտահոգությունը ՀՀ քաղաքացիների անձնական տվյալների պաշտպանության հարցն է՝ թուրքական գործոնի համատեքստում:

Մենք փորձել էինք հարցի շուրջ պարզաբանում ստանալ ՀՀ արդարադատության նախարարության աշխատակազմի Անձնական տվյալների պաշտպանության գործակալությունից: Նախարարությունից մեզ հայտնել էին, որ հարցի շուրջ պարզաբանումն ավելի ուշ կլինի:

Արդարադատության նախարարությունն անդրադարձել է խնդրին: «Փաստ»–ին տրամադրած գրավոր պարզաբանման մեջ մասնավորապես նշվում է. «Հաշվի առնելով դեսպանի հայտարարությունը, հայտարարության վերաբերյալ զանգվածային լրատվության միջոցների բազմաթիվ հրապարակումները, ինչպես նաև հարցի շուրջ հանրային մեծ հետաքրքրությունը, ՀՀ քաղաքացիների անձնական տվալները Թուրքիա փոխանցվելու մտավախությունը՝ ՀՀ արդարադատության նախարարության Անձնական տվյալների պաշտպանության գործակալությունը սեփական նախաձեռնությամբ սկսել է ստուգման գործընթաց, պարզելու, թե որքանով է «ՎիզաՄետրիկ» սահմանափակ պատասխանատվությամբ ընկերության կողմից անձնական տվյալների մշակումը համապատասխանում ՀՀ օրենսդրությանը: «Անձնական տվյալների պաշտպանության մասին» ՀՀ օրենքով սահմանված լիազորությունների շրջանակում գործակալությունն ուսումնասիրում է բարձրացված խնդիրը՝ ի թիվս այլնի «ՎիզաՄետրիկ» ընկերության կողմից անձնական տվյալների մշակման ընթացքում օրենքի պահպանումը ապահովելու և անձնական տվյալների մշակման հնարավոր խախտումները կանխելու համար»:

Նախարարությունից հավելել են նաև, որ գործակալության գործողությունների և արդյունքների վերաբերյալ պարբերաբար կտեղեկացնեն հանրությանը:

Ավելի վաղ տեղեկատվական անվտանգության փորձագետ Սամվել Մարտիրոսյանը «Փաստ»–ի հետ զրույցում ընդգծել էր, որ տեսականորեն մեր քաղաքացիների տվյալների պաշտպանության հետ կապված և ոչ մի վտանգ այս առումով չի բացառվում: Նա նաև շեշտել էր, որ Հայաստանն այդ առումով պետք է հստակ երաշխիքներ պահանջի: Չէր բացառել, որ տեսականորեն հնարավոր է նաև, որ այդ տվյալներն ընկնեն թուրքական հատուկ ծառայությունների ձեռքը:

Ավելի ուշ՝ ՀՀ Ազգային ժողովի արտաքին հարաբերությունների մշտական հանձնաժողովի նախագահ Արմեն Աշոտյանը հայտնել է, որ դիմել է Հայաստանի կառավարությանը՝ ԵՄ մի շարք երկրների համար Շենգենյան վիզա ստանալու գործընթացը թուրքական «ՎիզաՄետրիկ» ընկերությանը վերապահելու որոշման վերաբերյալ պարզաբանում ստանալու համար։

Շարունակությունը՝ «Փաստ» օրաթերթի այսօրվա համարում