Պետրոս Մակեյան. «Սերժ Սարգսյանն այս օրվան ոչ թե հինգ, այլ մինիմում քսան տարի է պատրաստվել». «Փաստ»

«Փաստ» օրաթերթը գրում է.

«Հանուն Հայաստան պետության» ճակատի մաս կազմող «Ժողովրդավարական հայրենիք» կուսակցության նախագահ Պետրոս Մակեյանի կարծիքով իշխանության դեմ պայքարելու ընթացքում, երբ ընդդիմությունը մտնում է ուժի դաշտ, իշխանություններն իրենց սկսում են զգալ ինչպես ձուկը ջրում:

«Մենք որևէ խնդիր չենք տեսնում անզեն, խաղաղ պայքարի դուրս գալու հարցում: Դա այն է, ինչ առաջարկում է Նիկոլ Փաշինյանը: Ես համոզված եմ, որ այդ հարցում մենք ընդհանուր եզրեր կգտնենք»,– «Փաստ»–ի հետ զրույցում ասաց Պ. Մակեյանը:

Պատասխանելով «Միջազգային և անվտանգության հարցերի հայկական ինստիտուտի» հիմնադիր նախագահ, քաղաքական հարցերով փորձագետ Ստյոպա Սաֆարյանի այն դիտարկմանը, թե ընդդիմությունը ստրատեգիական միտք չունի, հակառակ դեպքում այսօրվա խնդիրը 5 տարի առաջ կդներ, ոչ թե վարչապետի ընտրությունից 15 օր առաջ, Պ. Մակեյանն ասաց, որ Հայաստանում արդեն 20 տարի է, ինչ ընդդիմությունը պայքարում է և երբեք չի դադարել պայքարն այս վարչախմբի դեմ:

«Այդ պայքարի հետևանք է մարտի 1–ը, 2003 թ.–ի ապրիլի 13–ի Բաղրամյան պողոտայում տեղի ունեցած դեպքերը, Սարի Թաղի դեպքերը: Այս բոլորը պայքարի արդյունք է եղել, և ընդդիմությունը երբեք էլ չի դադարել: Նույնիսկ, երբ Սերժ Սարգսյանը նախաձեռնեց սահմանադրական, այսպես կոչված՝ հանրաքվեն, ընդդիմությունը այդ ժամանակ շուրջօրյա երթեր ու հանրահավաքներ կազմակերպեց: Ինչ վերաբերում է Ս. Սարգսյանի այսօրվան պատրաստվելուն, ապա իմ տպավորությամբ նա ոչ թե 5 տարի, այլ՝ ավելի երկար է պատրաստվել այս օրվան: Ես հիշում եմ, երբ նա 95, 96, 97 թվականներին շատ հանգիստ, անաղմուկ, սև պապկան ձեռքին, Ազգային ժողովի և կառավարության միջանցքներով քայլում էր, քաղաքական գործիչների հետ շատ հարգալից էր, բայց այդ ամբողջ ընթացքում նա երևացող և երևալու պոտենցիալ ունեցող բոլոր քաղաքական գործիչների դեմ գործեր էր հավաքում, որպեսզի այսօր հասներ այս հանգրվանին»,– ասաց Պ. Մակեյանը:

Նրա դիտարկմամբ, Սարգսյանն այս ամենին ոչ թե 5, այլ մինիմում 20 տարի է պատրաստվել և հիմա հարցը մոտենում է հանգուցալուծման: Պ. Մակեյանը համաձայն չէ դիտարկմանը, թե իր նշած 20 տարվա ընթացքում ընդդիմությունը բացի փողոցային պայքարից, այնուամենայնիվ չի կարողացել ստրատեգիական քայլեր մշակել, դրանք իրագործել և արդյունքի հասնել: Նա շեշտեց, որ ընդդիմությունը երբեք էլ չի դադարել պայքարել, իր խոսքով ասած՝ գործող ռեժիմի դեմ, իսկ առաջարկվող 15–օրյա պայքարի հնարավորություններն, ըստ նրա, իրատեսական է:

«Այդ 15 օրը տալիս է իշխանությունների ասած՝ սահմանադրական, օրենքի և իրավական հիմքերն օգտագործելով Սերժ Սարգսյանի կողմից երրորդ անգամ իշխանությունը ուզուրպացնելու քայլը կանխել: Այդ խնդիրը մենք հիմա ենք փորձում լուծել, քանի որ այդ հնարավորությունը տալիս է ապրիլի 9–ից 17–ն ընկած ժամանակահատվածը, իսկ թե պայքարի արդյունքն ինչպիսին կլինի, կախված է հանրության արձագանքից: Եթե ժողովուրդը այս 20 տարվա թալանը, ստորացումները, որը տեղի է ունեցել Սերժ Սարգսյանի մասնակցությամբ, իսկ վերջին 10 տարին նրա գլխավորությամբ հանդուրժի, ուրեմն կնշանակի, որ դեռ դիմանալու տեղ ունի: Բայց ես վստահ եմ, որ եթե ժողովուրդը դուրս գա, այս պայքարը հաղթանակով կավարտվի»,– ասաց Պ. Մակեյանը:

Խոսելով «դոսյեներ» հավաքած անձանց մասին, քաղաքական գործիչը նշեց, որ նրանք բոլորն այսօր ՀՀԿ–ի վերնախավում են, մաքուր մարդիկ այնտեղ տեղ չունեն: Ինչ վերաբերում է ուժի կիրառմանը, ապա «Ժողովրդավարական հայրենիք» կուսակցության նախագահի կարծիքով, եթե բողոքի ցույցերին մասնակցի ողջ ժողովուրդը, ապա իշխանությունները չեն կարողանա ուժ կիրառել: Պատասխանելով հարցին, թե 10000 դրամով ընտրությանը մասնակցած քաղաքացիներն արդյոք այսօր կգնա՞ն ու կկանգնե՞ն ընդդիմության կողքը, քաղաքական գործիչը պատասխանեց:

«Նույն այդ 10000 դրամ վերցրած քաղաքացին, ում նաև 20 տարի նսեմացրել են, ապրիլյան պատերազմի ժամանակ ոտքով, մեքենաներով, ով ինչ հնարավորություն ուներ, շտապում էր Արցախը պահելու: Այսինքն, ժողովրդին մեղադրել, որ գումար է վերցրել, չեմ կարծում ճիշտ է: Վաղը նույն այդ ժողովուրդը, եթե կարողանա հաղթել, կարող է նույն այդ 10000–ը հետ տա նույն այդ գումար տվողներին»,– ասաց Պ. Մակեյանը:

Նա նաև նշեց, որ իրենք նաև ցանկանում են այս շանսն օգտագործել, որպեսզի 2022 թվականի ժամանակ նույնը չկրկնվի:

«Եթե այս իշխանությունները մնան, 2022–ին 100%–ով նույնը կրկնվելու է: Այդ պատճառով էլ մենք ժողովրդին ասում ենք, եկեք այս շանսն օգտագործենք և թույլ չտանք, որ ժողովրդի ողնաշարը լրիվ կոտրվի: Ամեն դեպքում մենք հույս ունենք, որ ժողովուրդը ոտքի կկանգնի: Եվ եթե կանգնեց, ուրեմն խնդիրը կլուծվի: Հակառակ դեպքում՝ պայքարը կշարունակվի: Կշարունակենք ժողովրդի հետ աշխատել, հնարավոր և սպասելի ֆորս մաժորներն օգտագործելով կփորձենք պայքարել: Եվ եթե դա էլ չստացվի, կսպասենք մինչև 2022 թվականը»,– ասաց Պ. Մակեյանը:

Շարունակությունը՝ «Փաստ» օրաթերթի այսօրվա համարում