Shamshyan.com-ից հերքում ենք պահանջում. «Սլավ Գրուպ» ՓԲԸ-ն Nutrilon մանկական կերի առնչությամբ

Nutricia ընկերության պաշտոնական ներկայացուցիչ Սլավ Գրուպ ՓԲԸ-ն պարզաբանում է ներկայացրել shamshyan.com կայքի «Ինչպես է կասկածելի փոշին, որով երեխա է թունավորվել, հայտնվել Հայաստանում, իսկ նրա վրա առկա է ադրբեջանական ֆեյսբուքյան էջի հասցե» վերնագրով հրապարակման առնչությամբ։

Պարզաբանման մեջ ասվում է, որ Nutricia ընկերության Nutrilon մանկական կերն արտադրվում է Լեհաստանում, տարբեր երկրների, այդ թվում՝ Ադրբեջանի համար, այդ իսկ պատճառով ապրանքի տարաները պարունակում են բազմալեզու նկարագրություն։

Ներկայացնում ենք պարզաբանումն ամբողջությամբ. «Nutricia ընկերությունը հանդիսանում է մանկական սնունդ արտադրող աշխարհի առաջատար կազմակերպություններից մեկը՝ ներկայացնելով իր արտադրանքն ավելի քան 130 երկրներում:

Nutricia ընկերության Nutrilon մանկական կերն արտադրվում է Լեհաստանում: Անտեսելով այն փաստը, որ ապրանքի վրա հստակ նշված է արտադրման երկիրը՝ մենք ցպահանջ պատրաստ ենք հավելյալ ներկայացնել պաշտոնական բոլոր փաստաթղթերը, որոնք ապացուցում են, որ Nutrilon մանկական կերն արտադրվում է Լեհաստանում:

2006 թվականից մինչ օրս Սլավ Գրուպ ՓԲԸ-ն հանդիսանում է Nutricia ընկերության պաշտոնական ներկայացուցիչը Հայաստանի Հանրապետությունում: Nutrilon մանկական կերը Հայաստան է ներկրվում՝ պահպանելով սննդի անվտանգության միջազգային և ՀՀ բոլոր նորմերը:

Ցանկանում ենք ավելացնել, որ Հայաստան ներկրվող Nutrilon մանկական կերերի խմբաքանակներն Nutrica ընկերության կողմից արտադրվում են Ուզբեկստանի, Տաջիկստանի, Ռուսաստանի, Մոնղոլիայի, Հայաստանի, Ղրղըզստանի, Վրաստանի, Ադրբեջանի և Մոլդովայի համար, այդ իսկ պատճառով ապրանքի տարաները պարունակում են բազմալեզու նկարագրություն:

www.shamshyan.com կայքից պահանջում ենք իրականությանը չհամապատասխանող տեղեկություններ և ՀՀ Ազգային ժողովի պատգամավոր Արկադի Համբարձումյանի վերաբերյալ զրպարտանք պարունակող հոդվածի հրապարակային հերքում»: