«Կեղծ ռազմահայրենասիրություն, որից խորհրդային շրջանի հոտ է փչում». «Փաստ»

«Փաստ» օրաթերթը գրում է.

Շրջանառության մեջ է դրվել «Սովորողների ռազմահայրենասիրական դաստիարակության ռազմավարությանը հավանություն տալու մասին» ՀՀ կառավարության որոշման նախագիծը, որի հեղինակը ԿԳՆ–ն է: Մշակված ռազմավարության նպատակներից է հայրենիքի պաշտպանությանը պատրաստ քաղաքացի ձևավորելը, զինվորականի մասնագիտության հանդեպ գրավչության մեծացումը՝ նպաստելով հայրենիքը թշնամուց պաշտպանելու, հայրենիքի հանդեպ նվիրվածության գիտակցմանը, կարգապահության ամրապնդմանը: Ռազմավարության իրականացման արտաքին ու ներքին մարտահրավերներ են առանձնացվել:

Արտաքին մարտահրավերներից են պատերազմները, շրջափակումը, հարևան որոշ պետությունների ծավալապաշտական նկրտումները և այլն: Ըստ ԿԳՆ–ի՝ ՀՀ առջև ծառացած ներքին մարտահրավերներից են հայրենիքի պաշտպանությանը ոչ պատրաստակամ քաղաքացիների առկայությունը, զինվորական ծառայության հանդեպ գոյություն ունեցող անտարբերությունը, օտար մշակութային արժեքներին հաղորդակից լինելու տենդենցը, անկարգապահությունը, արտագաղթը, թմրամոլությունը, սեռական այլասերվածությունը և այլն:

«Կեղծ ռազմահայրենասիրություն, որից խորհրդային շրջանի հոտ է փչում»,–անդրադառնալով ռազմավարությանը՝ «Փաստ»–ի հետ զրույցի սկզբում ընդգծեց իրավապաշտպան Ժաննա Ալեքսանյանը՝ հավելելով, որ ներկայացված ռազմավարությունը կեղծ հայրենասիրություն է:

«Այս կետերով ոչինչ չի փոխվում: Զինվորի, բանակի նկատմամբ վերաբերմունքը պետք է իրական լինի: Տեսնում ենք անտարբերության մատնված վիրավոր զինվորներ, ներքին հարաբերություններով պայմանավորված զոհեր: Իրենց ռազմահայրենասիրական տեքստերը չեն համապատասխանում իրականությանը: 21–րդ դարում, այս ազատ աշխարհում սովետական շրջանի տեքստեր բերելն ու դրանք երեխաների գլխում սերմանելն անընդունելի է: Փաստորեն, չեն թողնում մանկություն ունենան, ոչ էլ իրենց բնական սերն ունենան հայրենիքի, բանակի նկատմամբ: Ամբողջովին ռազմականացնում են դպրոցները: Չեն թողնում, որ հայրենիքը ոչ թե տեքստերով, այլ իրական սիրեն»,– ասաց իրավապաշտպանը՝ հավելելով, որ սա սովետական շրջանին հատուկ պարտադրանք է, ինչն անընդունելի է:

«Հիմա իրական կյանքում թույլ չեն տալիս աղոթագիրք փոխանցել զինվորին, իսկ այն ամենը, ինչը գրվում ու ասվում է եթերներից, իրականությանը չի համապատասխանում: Վիգեն Սարգսյանն Արևմուտքում կրթություն է ստացել ու հիմա եկել է, որ ամբողջ Հայաստանը սովետականացնի, վերադարձնի խորհրդային ժամանակաշրջան, որտեղ ամեն ինչ պարտադրված էր: Իհարկե, պարզ է, որ ԿԳ նախարարը մենակ չի նստել ու հորինել այդ ռազմավարությունը: Հիմա որոշել են փչացնել մեր երեխաների մանկությունը»,– նշեց նա:

Դիտարկմանը՝ միգուցե այլ ձևակերպումներով նման ռազմավարությունը հասկանալի լիներ, իրավապաշտպանն ընդգծեց. ««Ռազմագիտություն» առարկան լրիվ բավարար է, թեև այդ առարկան երբեք լուրջ առարկա չի համարվել: Հիմա մենք պետք է կրենք ժողովրդավարական արժեքները: Ամեն ինչ պետք է մարդու համար գրվի, և ոչ թե պլակատային հայտարարություններ արվեն հայրենասիրության մասին: Լրջություն չկա այս ամենի մեջ: Չեմ կարծում, որ ձևակերպումները կփոխեն իրավիճակը: Այս ժամանակահատվածը, ինտերնետը երեխաներին ուրիշ աշխարհ է տանում, և իրենք չեն հասցնի այդ կոնցեպտներով ընկնել երեխաների հետևից և փոխել նրանց մտածողությունը»:

Իրավապաշտպանն ընդգծեց, որ ձևակերպումները ևս անընդունելի են:

«Ընդգծվել է նաև արտագաղթը, բայց արտագաղթը Հայաստանից տեղի է ունենում հենց այդ կոնցեպտները գրողների պատճառով: Իրենք թող վերանայեն իրենց վարքագիծը, հարցնեն, թե որքանո՞վ են օրենքին խոնարհ ծառայում երկրին: Այս ամենը մի բուռ բնակչության վրա բարդելն անընդունելի է: Իսկ «հայրենիքի պաշտպանությանը ոչ պատրաստակամ քաղաքացիները» պաշտոնատար անձանց, հանրապետականների զավակներն են: Առաջին հերթին՝ թող իրենց միջավայրը կարգի բերեն, իրենց զավակներին ուղարկեն ծառայության, և հետո նոր անդրադառնան մյուսներին: Իսկ մյուսները սիրում են իրենց հայրենիքը: Պատերազմի ժամանակ ցույց են տվել, թե որքան հայրենասեր են: Բայց հիմա Հայաստանը լրիվ այլ ճանապարհով է գնում, ինչը բացահայտ շեղում է ժողովրդավարությունից: Արտագաղթը և նշվածները որպես մարտահրավեր բարդում են մարդկանց վրա: Ասում են, թե կան ծառայության ոչ պատրաստ մարդիկ: Իսկ ինչպես պատրաստ լինեն, երբ ամեն ինչ արվում է, որ մարդիկ լքեն Հայաստանը»,– եզրափակեց Ժ. Ալեքսանյանը:

Շարունակությունը՝ «Փաստ» օրաթերթի այսօրվա համարում