Չի բացառվում, որ «Սանիթեքը» լուծարման մասին հայտարարի. «Փաստ»

«Փաստ» օրաթերթը գրում է.

«Սանիթեք» ՍՊԸ–ի դեմ դատարաններում 15 գործ է լսվել: Դրանց «շքերթը» սկսվել է դեռևս 2016 թվականից, բայց զարմանալիորեն դատական նիստերն ընթանում են բավականին մեծ ինտերվալներով: Որոշ դեպքերում, երկու տարի անց, թեև արդեն հրապարակվել են վճիռներ, սակայն «Դատալեքս» որոնողական համակարգում դրանք չկան:

Ի դեպ, ընկերության դեմ ուղղված դիմումները հիմնականում խախտված իրավունքները վերականգնելու, գումարի բռնագանձման և վնասի հատուցման պահանջների մասին են: Հայցվորները ոչ միայն անհատներ են, այլև կազմակերպություններ:

«Անուշ լինի» ՍՊԸ–ի բողոքի մասին դատարանի որոշումը հրապարակելու օրը նշված է եղել 2018 թ–ի մարտի 15, սակայն, մինչ օրս վճռի էլեկտրոնային տարբերակը հրապարակված չէ, իսկ նույն ընկերության ներկայացրած մեկ այլ հայց կարճվել է, հայցվորի կողմից հայցից հրաժարվելու հիմքով:

«Ռոսգոսստրախ Արմենիա» ապահովագրական ընկերության դիմումը «Սանիթեքի» մեքենայի պատճառով վթարված մեքենայի տիրոջը ապահովագրական ընկերության կողմից վճարված գումարի բռնագանձման մասին է, որը դատարանը մերժել է: Սրանից սակայն չի վհատվել ապահովագրական ընկերությունը և մեկ այլ դիմում էլ ներկայացրել է Արագածոտնի մարզի դատարան:

Գործը թեև վարույթ է ընդունվել անցյալ տարվա նոյեմբերին, սակայն այս պահին դատաքննությունը դեռևս շարունակվում է: «Ռոսգոսստրախի» մեկ այլ նույնատիպ գործ ընթացքի մեջ է: Ուշագրավը սակայն այն է, որ 2017 թվականի նոյեմբերի 27–ին վարույթ ընդունված այս գործի քննությունը նշանակվել է 2018 թվականի հունիսի 12–ին, այսինքն՝ 7 ամիս անց:

«Սանիթեքի» դեմ հայցերից ուշագրավ է նաև ընկերությունից գումարի բռնագանձման և անշարժ գույքի վարձակալության պայմանագիրը չեղյալ համարելու պահանջը: Այս հայցի ապահովման համար դիմող կողմը դատարանին միջնորդել է արգելանք դնել ընկերության գույքի և դրամական միջոցների վրա, ոը զարմանալիորեն բավարարվել է:

Չի բացառվում, որ վերջին դիմումով «Սանիթեքը» փորձել է ինքն իրեն ապահովագրել դատարաններում գումարի բռնագանձման այլ պահանջներից խուսափելու համար, քանի որ անցյալ տարվա նոյեմբերի 6–ին վարույթ ընդունված գործով գումարների վրա արգելանք դնելու պահանջը շատ շուտ բավարարվել է, իսկ հաջորդ դատաքննության օրը մինչ օրս նշանակված չէ: Սա էլ հիմք է տալիս եզրակացնելու, որ «Սանիթեքը» փորձել է իր հաշվին եղած գումարները սառեցնել, այլ դատական վճիռների կատարումն անհնարին դարձնելու համար:

2017 –ի մարտին սկսված մեկ այլ գործ էլ կարճվել է 7 ամիս անց: Գործով հաշտության համաձայնագիր է կնքվել, մոտ 2 մլն 321 հազարի պարտքը «ջրվել է», չնայած որ «Սանիթեքը» համաձայնվել է վճարել 2 մլն դրամը:

Ամփոփելով ասվածը ընդգծենք, որ ստացվում է, որ «Սանիթեքի» գործերը գնալով վատանում են և չի բացառվում, որ կարճ ժամանակ անց, կքննարկվի նաև ընկերությունը լուծարելու մասին: Ստացվում է, որ իրոք, Հայաստանում փոխշահավետ գործարքների մասին երազել և բիզնես անելը խաղ ու պար չէ: Եվ այս ֆոնին ուզում ենք, որ Հայաստան ներդրողներ գան ու ներդրումներ անեն: Վատ երազանք չէ, մնում է այն իրականացնողներ գտնել:

Շարունակությունը՝ «Փաստ» օրաթերթի այսօրվա համարում