ԻՆՉՈՒ ԵՆ ՀԵՂԻՆԱԿԱԶՐԿՈՒՄ ԴԵՌ ՉԵՐԴՎԱԾ ՆԱԽԱԳԱՀԻՆ

Արմենիա հեռուստաընկերությունը, ըստ ամենայնի նախանձելով Հանրային հեռուստաընկերության «Լավ երեկո» նախագծի «փառքին», փորձել է կրկնօրինակել եւ ստեղծել է «Երեկոյան Ազոյան» հաղորդումը: Գրեթե նույն բեմական տեսքը, նույն ֆորմատը, երաժշտություն, պար, տափակ հումորներ, միայն Kami friends project-ի փոխարեն «Երեկոյան Ազոյան» հաղորդման մեջ պարային խումբ է, Արուս Տիգրանյանի փոխարեն՝ Աղասը, իսկ հաղորդավարներ Գարիկի եւ Արամ mp3 -ի փոխարեն՝ Հովոն եւ Մհերը:

Ի դեպ, life.panorama.am-ի դիտարկմանը, որ նմանատիպ շոու Հայաստանում արդեն իսկ կա՝ ի դեմս Հանրային հեռուստաընկերության «Լավ երեկո»-ի, եւ հարցին, թե արդյոք երկու նմանատիպ նախագծերը միմյանց չե՞ն խանգարի եւ մարդիկ էլ չե՞ն կարծի, թե «Ազոյան շոուն» «Լավ երեկո»-ի կրկնօրինակումն է, հաղորդավար Մհեր Խաչատրյանը պատասխանել էր. «Այն մարդիկ, ովքեր չգիտեն, որ «Երեկոյան շոուն» միջազգային ֆորմատ է եւ շատ վաղուց կա աշխարհում, պարզ է, որ կասեն, թե կրկնօրինակում ենք Ուրգանտին, իսկ ովքեր Ուրգանտի շոուն չեն դիտել, պարզ է, որ կմտածեն, թե կրկնօրինակում ենք հայկական նմանատիպ հաղորդմանը: Սա արդեն կախված է հեռուստադիտողի տեսակից, ինչը նորմալ է: Այս պահին ես մրցակցության մասին չեմ մտածում, ոչ էլ այդպես կբնութագրեմ: Սա պարզապես հայտնի հաղորդման ֆորմատ է, որը անում ենք նաեւ մենք»: 

Փաստորեն՝ Երեկոյան Ազոյան հաղորդման հեղինակները չեն նեղվում, որ կրկնօրինակում են «Լավ երեկոյին», իրենց սփոփում են, որ վերջինս էլ Ուրգանտի շոուի կրկնօրինակումն է, այսինքն՝ միջազգային ֆորմատով այլ հաղորդում չկար, կամ հնարավոր չէր սեփական ֆորմատը մտածել: Եթե «Լավ երեկոյին» նախորդ շաբաթ հաջողվել էր հայտնվել քննարկումների դաշտում անազատության մեջ գտնվող կանանց ծաղրելու համար, ապա «Երեկոյան Ազոյանը» քննարկում ու ծաղրում էր ՀՀ 4-րդ նախագահ Արմեն Սարգսյանին:

Հաղորդման ժամանակ «Ուշ լինի, ծյուշ լինի» էջի շրջանակներում հեղինակները Արտակ Հերիքյանի Արմեն Սարգսյանի հետ արած հարցազրույցի պատասխանները վերցրել էին, հարցերը փոխել, մոնտաժել եւ այդպես րոպեներ շարունակ զվարճանում էին Ա.Սարգսյանի վրա, հետաքրքիր է՝ նույնը կանեի՞ն Սերժ Սարգսյանի դեպքում: Ֆեյսբուքում մարդիկ մեկնաբանություններ էին թողնում․ Ruzanna Stepanyan Չստացված հումորի հետ դեռ կարելի է համակերպվել, բայց երբ այդ հումորի գլխավոր հերոս ես դարձնում երկրի նորընտիր նախագահին ու դա վերածում ծաղրի, միայն տհաճություն է առաջացնում… P.S. չեմ ուզում որակումներ տալ, թե այս հաղորդման մեջ Արմեն Սարգսյանին ինչի տեղ էին դրել ու ինչ նպատակով: Ինքներդ դատեք, 24 -րդ րոպեից…

Vahe Makaryan

Մի մեդալ էլ էդ Արմենիայի Ծյուշին տվեք՝ ՀՀ չորրորդ նախագահ նշանակված Արմեն Սարգսյանին «բարեխիղճ ու պրոֆեսիոնալ» ձևով փչացնելու, վարկաբեկելու, էժան հումորներով ծաղրելու համար։

Հենց նոր «Արմենիա» TV-ի «Երեկոյան Ազոյան» հաղորդման ժամանակ Ծյուշ ներկայացած ինչ-որ «լրագրող» բառի բուն իմաստով ղժժում էր Արմեն Սարգսյանի վրա։ Իհարկե, կարծում եմ՝ Արմեն Սարգսյանը հանդուրժողականություն կցուցաբերի իր արտաբերած «անհանդուրժողականություն» բառը մոնտաժով մի քանի անգամ կրկնելու և դրանով իրեն հիմարի տեղ դնելու, ծաղրելու համար։ Այլ հարց է, թե Արմեն Սարգսյանին նախագահ նշանակող անձը կհանդուրժե՞ր, արդյոք, իրեն ենթակա TV-ով նույն վիրտուալ հարցազրույցը կազմակերպել իր հետ ու նույն կերպ ծաղրել իրեն։ Ի՞նչ տարբերություն, նախագահը նախագահ է` լինի երրորդ, չորրորդ, թե, ասենք, «Լյուդովիկոս 14-րդ»։ Լավ, կարելի՞ է մարդուն նշանակել երկրի առաջին դեմք ու էս կարգի ոչնչացնել, փչացնել, հավասերեցնել զրոյի։ Ձեր նշանակած մարդն ա, ի վերջո:

Armine Rafaelovna Brsoyan

Հասարակությունը երկու մասի ա «կիսվել» «Լավ երեկո», թե «Երեկոյան Ազոյան»։

Ժողովուրդ տարբեր օրերի ու ժամերիա՝ երկուսն էլ նայեք կամ երկուսն էլ մի նայեք․ ձեր տան պուլտը ձեր ձեռքումա Մի կողմից խնդիրը Հովհաննես Ազոյանն է՝ երիտասարդ դերասան, ով պարբերաբար մասնակցում է ընդդիմադիր ակցիաների, երբեմն քննադատական ստատուսներով հանդես գալիս: Մյուս կողմից էլ, «Արմենիան» իշխանական ալիք է, որով իշխանության թեկնածուին «փչացնելու« կուրս են վերցրել։ Նախ Ազգային ժողովում մի շարք օրենքներով հնարավորինս նվազեցրին նրա իրավասությունները, անգամ փոքրիկ հարցերում նրան ինքնուրույնությունից զրկելով, ապա հրապարակավ ծաղրում են, ինչը երբեւէ չեն արել ոչ մի՝ անգամ ամենաշարքային ՀՀԿ-ակաների նկատմամբ։