«Համախմբում» կուսակցության նետած ձեռնոցն առայժմ մնացել է օդում կախված. «Փաստ»

«Փաստ» օրաթերթը գրում է.

«Համախմբում» կուսակցության օրերս տարածած հայտարարությունում ասվում էր, որ կուսակցության իրավաբանների եզրակացության համաձայն ԱԺ հերթական ընտրություններն ապրիլի 2–ին նշանակելը հակասում է ՀՀ Սահմանադրությանը:
«Մենք համոզված ենք, որ հակասահմանադրական այս որոշումը պետք է դառնա հանրային ու քաղաքական քննարկման առարկա։ Խնդիրն այս կամ այն օրն առաջ կամ հետ բերելը չէ։ Խնդիրն այն է, որ չի կարելի ի սկզբանե հակասահմանադրական հիմքեր դնել սահմանադրորեն ամրագրված ամենակարևորագույն քաղաքական գործընթացի տակ։ Ի դեպ, ապրիլի 2–ը ընտրության օր նշանակելը նաև այլ մեկնաբանությունների ու գնահատականների տեղիք է տալիս նախորդ տարվա ապրիլի 2–ին սկիզբ առած քառօրյա պատերազմի համատեքստում։ Սա արդեն բարոյաքաղաքական հարթության մեջ է»։
Կուսակցության փոխնախագահ Էլինար Վարդանյանն էլ իր հերթին Ֆեյսբուք սոցիալական ցանցի սեփական միկրոբլոկում մանրամասնել է, թե հատկապես ՀՀ Սահմանադրության ու որ օրենքների դրույթների համադրման արդյունքում է այն պարզվել:
Ամենակարևոր հարցը սակայն այն է, թե նման ծանրակշիռ հայտարարությունից հետո «Համախմբումը» կփորձի այդ սխալի շուրջ համախմբել ոչ իշխանական քաղաքական ուժերին: Եթե այո՛, ապա հնարավո՞ր է, որ մինչ ընտրությունները «Համախմբումը» ընտրությունների օրը հակասահմանադրական ճանաչելու պահանջով դիմի ՀՀ Սահմանադրական դատարան:
Կուսակցության փոխնախագահ Ստեփան Մարգարյանը «Փաստի» հետ զրույցում ասաց, որ թեև դատարան դիմելու հարցի շուրջ այս պահին որոշում չկա, բայց կուսակցությունը դրանով անպայման զբաղվելու է:
«Այն, որ դա խախտում է, փաստ է, որի բացատրությունը կա, բայց ինչ քայլեր ենք ձեռնարկելու այս պահին չեմ կարող ասել, քանի որ այդ հարցը դեռևս քննարկման փուլում է»,– ասաց Ս. Մարգարյանը:
Նա նաև հավելեց, որ փորձելու են հնարավորինս հետևողական լինել, բայցև սպասում են մյուս քաղաքական ուժերի արձագանքին: Ու թեև այս պահին դեռևս որևէ կուսակցություն չի արձագանքել, սակայն Ս. Մարգարյանը հույս հայտնեց, որ այն կշարունակի մնալ իրենց քաղաքական օրակարգում:
«Անկախ նրանից, թե 20 օր առաջ կամ 20 օր հետո ընտրությունները տեղի կունենան, մեզ համար կարևորն այն է, որ սահմանադրական նորմը չխախտվի»,– ասաց «Համախմբում» կուսակցության փոխնախագահը:
Խոսելով «Համախմբում», «Երրորդ հանրապետություն», «ՀՅԴ», «Միացյալ հայեր» դաշինքը Ծառուկյանի դաշինքին միանալու հնարավոր հեռանկարի մասին Ս. Մարգարյանն ասաց, որ այս պահին նման հարց նույնպես չեն քննարկում կուսակցությունում:
«Մենք հայտարարել ենք, որ ողջունում ենք Գագիկ Ծառուկյանի մուտքը քաղաքականություն: Հատկապես կարևորում ենք, որ դրանով քաղաքական դաշտն ավելի կհստականա: Բացի այդ կարևորում ենք նաև այն, որ նախընտրական այս փուլում տրամաբանությունը ոչ թե առանձին կուսակցություններով մասնակցելուն է միտված, այլ՝ դաշինքայինին: Սա մենք համարում ենք առաջընթաց քայլ մեր քաղաքական դաշտում և ինչքան խոշորանան դաշինքները, այնքան լավ: Դեռ ժամանակ կա, կապրենք կտեսնենք»,– ասաց Ս. Մարգարյանը:
Չբացառելով Ծառուկյանի դաշինքին միանալու հեռանկարը, «Համախմբում» կուսակցության փոխնախագահը նշեց նաև, որ քաղաքական ուժերի համագործակցության տարբեր ձևաչափեր կան և իրենք պատրաստ են համագործակցել նաև Ծառուկյանի դաշինքի հետ, սակայն ինչ ձևաչափով՝ դեռևս հստակ չէ:

Շարունակությունը` «Փաստ» օրաթերթի այսօրվա համարում: