Վարչապետի պաշտոնանկության պահանջը կսկսվի Նոյեմբերյանից, եթե... «Փաստ»

«Փաստ» օրաթերթը գրում է.

«Պոլիմետալ Արմենիա» ընկերությունը խախտել է նոյեմբերյանցիների անդորրը՝ հայտարարելով, որ սկսում է հանք շահագործել այդ տարածքում: Ընկերության այս որոշմանը նոյեմբերյանցիները դեմ են և խոստանում են բոլոր հնարավոր և անհնար տարբերակներով թույլ չտալ հանք շահագործող այս ընկերության մուտքը Նոյեմբերյան:

Մեր թղթակիցն այս թեմայով զրուցեց Նոյեմբերյանի բնակիչ, մեդիաընկերության սեփականատեր և հասարակական գործիչ Վարուժան Բաբաջանյանի հետ:

– Պարո՛ն Բաբաջանյան, «Պոլիմետալ Արմենիա» ընկերությունը ներկայացրել է երկրաբանական հետազոտությունների արդյունքներ, ըստ որոնց, իրավունք է ձեռք բերել հանք շահագործել Նոյեմբերյանի տարածքում:

– Մեզ չի հետաքրքրում, թե ինչ փաստաթղթեր են նրանք ներկայացրել, մեզ չի հետաքրքրում նաև, թե ինչ թղթաբանություն են ներկայացրել: Մենք փաստում ենք, որ Նոյեմբերյանում հանք շահագործելու թույլտվություն նրանք ստացել են կառավարությունից, և մենք՝ նոյեմբերյանցիներս, թույլ չենք տա ապականել մեր անաղարտ բնությունը, այն բնությունը, որը կերակրում է մի ողջ տարածաշրջանի բնակչության: Այն տարածքը, որտեղ պատրաստվում են հանք շահագործել, հանդիսանում է բացառիկ էկոտարածք, որտեղ պետությունը պետք է զբոսաշրջություն զարգացներ, ոչ թե հանք շահագործեր:

– Ընկերությունը կառավարությանը խոստացել է, որ տարածքի բնակչությանն ապահովելու է աշխատատեղերով և բարձր աշխատավարձով, արդյո՞ք նոյեմբերյանցիները համաձայն են գնալ և այդ հանքերում աշխատել:

– Ամբողջ Նոյեմբերյանում չեք գտնի գեթ մեկ մարդու, ով համաձայն է գնալ և քանդել մեր բնությունը: Մեզ պետք չէ, որ մեր բնությունը ոչնչացնեն, նպաստեն քաղցկեղով հիվանդությունների աճին, ինչ է թե՝ աշխատատեղ են ստեղծում: Այս անտառներն արդեն կերակրում են նոյեմբերյանցիներին: Այդ տարածքներից նրանք հավաքում են ամենատարբեր հատապտուղներ և վաճառում: Այդ տարածքները նաև արոտավայրեր են, որոնց ոչնչացմամբ, փաստացի, նաև կվերանա անասնապահությունը: Մեր պահանջն է պետությունից՝ կանխել այս ամենը և ձեռք չտալ մեր անտառներին: Այս ընկերությունը կարող է հանք շահագործել Նոյեմբերյանում միայն մեր ազգաբնակչությանը կոտորելու հաշվին, երկրորդ տարբերակ մենք թույլ չենք տալու: Թույլ չենք տալու որևէ տեխնիկա մտնի մեր տարածք:

– Հաշվի առնելով այն, որ «Պոլիմետալ Արմենիա» ընկերությունը հանդիսանում է հանք շահագործող խոշոր ընկերություն, և այս ընկերության բաժնետերերի սեփականատերերը գալիս են ռուսական և չեխական իշխանական վերնախավից, պայքարի ի՞նչ մեխանիզմներ ենք առաջարկում:

– Եթե «Պոլիմետալ Արմենիա» ընկերությունը խոշոր ընկերություն է, ես էլ հանդիսանում եմ խոշոր մեդիաընկերության սեփականատեր և լայն կապեր ունեմ ողջ ԱՊՀ տարածքում: Այնպես որ՝ գործի կդրվեն ոչ միան փողոցային պայքարի տարբերակներն, այլ նրանց դեմ լուրջ պայքար կսկսվի նաև տեղեկատվական բլոկով: Նոյեմբերյանցիները թույլ չեն տա, որ կրկնվի Թեղուտի պատմությունը, երբ հանք շահագործողները հարստացան և հեռացան՝ տարածքի բնակիչներին թողնելով թունավոր միջավայր:

– Թեև Նոյեմբերյանում հանք շահագործելու դեմ պայքարը արդեն տևական ժամանակ է՝ թեժ է սոցիալական ցանցերում, սակայն մինչ այս պահը չկա կառավարության արձագանքը: Սա ինչո՞վ եք բացատրում:

– Դե, թույլտվությունը տվել է կառավարությունը, դրա համար էլ չկա արձագանք: Պարզապես, կառավարությունն ու նրա ղեկավարը պետք է իմանան, որ եթե մեր տարածքում այս հրեշավոր ծրագիրը սկսեն իրագործել, ապա վարչապետի պաշտոնանկության պահանջը կսկսվի հենց Նոյեմբերյանից:

– Արձագանք չկա կառավարությունից, սակայն նոյեմբերյանցիների բողոքին արձագանքեց «Պոլիմետալ Արմենիա» ընկերությունը՝ խոստանալով դադարեցնել երկրաբանահետախուզական աշխատանքները: Արդյո՞ք այս որոշումը կթուլացնի նոյեմբերյանցիների բողոքի նոտան, թե՞, այնուամենայնիվ, հիշելով տարբեր հանք շահագործող ընկերությունների կողմից բողոքի ձայնը լռեցնելու համար աշխատանքները ժամանակավոր դադարեցնելու և հետո նորից վերսկսելու դառը փորձը, նոյեմբերյանցիները ձեռքները ծալած չեն նստի:

– Մեր զգոնությունը չի թուլանում այս հայտարարությամբ, յուրաքանչյուր պահի կպայքարենք և ոչ մի դեպքում թույլ չենք տա հանքի շահագործումը:

Շարունակությունը՝ «Փաստ» օրաթերթի այսօրվա համարում