Սիսիանում 18-ամյա աղջիկը պապի մահվան տարելիցին համագյուղացու «Ֆորդով» վթարի է ենթարկվել ու մահացել

1in.am-ը գրում է.

Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ ավարտվել է Մերուժան Մուրադյանի գործի դատական քննությունը:

Ըստ մեղադրանքի՝ 2017 թվականի հուլիսի 21-ին, ժամը 19-ն անց 10 րոպեին 44-ամյա Մերուժան Մուրադյանը, գտնվելով ալկոհոլ օգտագործած վիճակում, վարել է իր անձնական օգտագործման «Ֆորդ Տրանզիտ» մեքենան:

Սիսիան քաղաքի Իսրայելյան փողոցում նա թույլ է տվել ՃԵԿ համապատասխան կետերի ու օրենքի պահանջներին հակասող գործողություններ՝ գերազանցելով տվյալ ճանապարհահատվածում թույլատրելի առավելագույն արագությունը՝ աջ շրջադարձ կատարելիս դուրս է եկել երթևեկելի գոտուց, կողային հատվածով հարվածել է ճանապարհին կից քարե պարսպին, ապա առաջ գնալով՝ մեքենայի դիմային հատվածով բախվել է հողաթմբին, կողաշրջվել է, որի հետևանքով 18-ամյա ուղևոր Շուշան Ա.-ն գլխուղեղի վնասվածք է ստացել և հուլիսի 25-ին հիվանդանոցում մահացել է:

Մերուժան Մուրադյանին մեղադրանք էր առաջադրվել ՀՀ քրեական օրենսգրքի 242 հոդվածի 2-րդ մասով:

Մերուժան Մուրադյանն իրեն լիովին մեղավոր է ճանաչել ու հայտնել է, որ դեպքի օրը՝ 2017 թվականի հուլիսի 21-ին իրենց գյուղում մասնակցել է համագյուղացի Հովհաննես Ա.-ի հոր՝ տուժող Շուշանի պապիկի մահվան տարելիցի արարողությանը: Գյուղի մշակույթի տանը օղի է խմել:

Ժամը 16-ի սահմաններում Շուշանի ու նրա ծնողների հետ իր «Ֆորդ» մեքենայով սպասքը մշակույթի տանից տեղափոխել է նրանց տուն: Այնտեղ կրկին սեղան են նստել: Այս անգամ ուրախ բարեմաղթանքներ են հնչել՝ Հովհաննես Ա.-ի որդու ամուսնության ու դստեր՝ Շուշանի՝ համալսարան ընդունվելու առթիվ: Ինքը կրկին օղի է օգտագործել:

Հացկերույթի ժամանակ զանգել է իր եղբայրը, խնդրել է, որ նրա տան բանալիներն ինքը շտապ տանի Սիսիան: Բայց ինքը մերժել է՝ ասելով, թե խմած է:

Քիչ անց զանգել է Սիսիանի բնակիչ Աշոտ Հ.-ն, ով եղբոր տունը գնելու նպատակով ցանկանում էր այն լուսանկարել: Ինքը նրան խաբել ու ասել է, թե Սիսիանի ճանապարհին է:

Դրանից հետո դուրս է եկել Հովհաննեսի տանից: Շուշանը խնդրել է, որ մեքենայով նրան տանի գյուղի մշակույթի տուն՝ պետք է սկուտեղները վերադարձներ:

Ինքը Շուշանին չի մերժել:

Տեսել է, որ Շուշանի մայրը պատուհանից դստերն է տվել սկուտեղները: Շուշանը նստել է իր մեքենայի առջևի աջ նստատեղին:
Միասին նախ գնացել են իր տուն, վերցրել են եղբոր՝ Սիսիանում գտնվող տան բանալիները:

Ճանապարհին՝ գյուղի խաչմերուկում, ինքը Շուշանին առաջարկել է իջնել մեքենայից, ասել է, որ ինքը շտապում է՝ պետք է շտապ Սիսիան հասնի:

Շուշանը չի իջել, ասել է, թե չի ցանկանում սկուտեղները ձեռքին քայլել փողոցով:

Այդ պատճառով միասին ուղևորվել են Սիսիան:

Հասել է եղբոր տուն: Շուշանն էլ է իջել մեքենայից, եղբոր տան դուռը բացել են, Աշոտ Հ.-ն լուսանկարել է տունը:

Մի քանի րոպե հետո ինքն ու Շուշանն իր մեքենայով շարժվել են դեպի իրենց գյուղ: Այդ պահին ինքը հանկարծ վատ է զգացել ու շարժվել է մեծ արագությամբ:

Դրանից հետո հիշում է, որ մեքենան գտնվել է ճամփեզրին՝ վթարված վիճակում, իսկ Շուշանն անշարժ էր… Քիչ անց շտապօգնության մեքենայով նրան տեղափոխել են զինվորական հոսպիտալ…

Մերուժան Մուրադյանն ասել է, թե դեպքի պահին եղել է ալկոհոլի ազդեցության տակ, պատահարի մանրամասները չի հիշում, զղջում է…

Տուժողի իրավահաջորդը՝ Շուշանի հայրը, հայտնել է, որ համագյուղացի Մերուժանի հետ նորմալ հարաբերությունների մեջ է եղել մինչև դեպքը: Դեպքի օրը գյուղի մշակույթի տանը իր հոր մահվան տարելիցի արարողությունն էր:

Դրանից հետո իրենց տանն էլ են սեղան բացել՝ որդու ամուսնության ու դստեր՝ Շուշանի՝ համալսարան ընդունվելու առթիվ:

Մերուժան Մուրադյանը մասնակցել է հացկերույթներին: Իրենց տանը գտնվելու ժամանակ զանգել է Մերուժանի եղբայրը, խնդրել է, որ իր տան բանալիները տանի Սիսիան: Մերուժանն ասել է, թե խմած է, Սիսիան մեկնել չի կարող:

Այդ նույն ժամանակ գյուղի մշակույթի տան աշխատակիցը զանգել է իր կնոջը, պահանջել է մշակույթի տան բանալին ու սկուտեղները՝ հանձնում-ընդունում կատարելու համար:

Շուշանը վերցրել է սկուտեղները ու տանից դուրս է եկել: Մոտ հինգ րոպե անց իրենց տանից դուրս է եկել նաև Մերուժանը:

Որոշ ժամանակ հետո մշակույթի տանից զանգել ու ասել են, որ Շուշանը տեղ չի հասել:

Կինը զանգել է Մերուժանին: Իսկ նա հայտնել է, թե ճանապարհին վթարի է ենթարկվել, Շուշանին տեղափոխել են զինվորական հոսպիտալ…

Հուլիսի 25-ին իր 18-ամյա դուստրը գիտակցության չգալով՝ մահացել է…

Հայրը նշել է, թե չի իմացել, որ Շուշանը Մերուժանի մեքենան է նստել ու նրա հետ գնացել է Սիսիան: Նաև նշել է, թե չի հավատում Մերուժանի ցուցմունքներին… Տուժողի իրավահաջորդը պահանջել է Մերուժանին խիստ պատժի ենթարկել…

Վկա Փայլակ Թ.-ն դեպքի վայրի հարևանությամբ է ապրում: Նա դեպքի օրը իր տան աստիճաններով իջնելիս հավաքված մարդկանց է տեսել, մոտեցել է: Տեսել է, որ «Ֆորդ» մեքենան կողաշրջված է, իսկ պատուհանից կախված է մի ջահել աղջիկ…

Մեքենան ուղղել են, հանել են ամրագոտին ու աղջկան դուրս են բերել մեքենայից: Մինչև շտապօգնության հասնելը ինքը ձեռքերի վրա է պահել աղջկան, ով անգիտակից վիճակում էր: Լսել է, որ «Ֆորդի» վարորդը ասում էր. «Շուշանին փրկեք»:

Դատարանը Մերուժան Մուրադյանին մեղավոր է ճանաչել ՀՀ քրեական օրենսգրքի 242 հոդվածի 2-րդ մասով և դատապարտել է 2 տարի 6 ամիս ազատազրկման՝ 3 տարով զրկելով տրանսպորտային միջոցներ վարելու իրավունքից: