«Երկիր Ծիրանի»–ի առաջարկը` Վուդրո Վիլսոնի և Մարտի 1–ի զոհերի հիշատակը հավերժացնող հուշարձաններ տեղադրելու մասին. «Փաստ»

«Փաստ» օրաթերթը գրում է.

Մեկ շաբաթ անց՝ մարտի 19–ին, կգումարվի Երևան քաղաքի ավագանու 3–րդ նստաշրջանի 2–րդ նիստը: Ավագանու նիստի օրակարգում ներառված է 10 նախագիծ:

Դրանք վերաբերում են ինչպես հողի հարկի գծով արտոնություն սահմանելուն, գույքն ընդունելուն, հողամասերի նպատակային նշանակությունը փոխելուն, այնպես էլ՝ Երևան քաղաքի 2017 թ. բյուջեի կատարման հաշվետվությունը հաստատելուն ու Երևանի զարգացման 2017 թ. ծրագրի իրականացման հաշվետվությանը: Օրակարգում են ներառված նաև «Երկիր Ծիրանի» խմբակցության երկու նախագծերը, որոնցից մեկը վերաբերում է փողոցի անվանակոչմանն ու հուշարձանի տեղադրմանը, իսկ մյուսը՝ միայն հուշարձանի տեղադրմանը:

Այսպես, «Երկիր Ծիրանի»–ի ավագանու երեք անդամները՝ Զարուհի Փոստանջյանը, Մարինա Խաչատրյանն ու Սոննա Աղեկյանը առաջարկում են Երևանի Կենտրոն վարչական շրջանի Վազգեն Սարգսյանի անվան փողոցի՝ Հանրապետության հրապարակի Հակոբ Պարոնյանի անվան երաժշտական կոմեդիայի պետական թատրոնից դեպի ՀՀ արտաքին գործերի և ՀՀ արդարադատության նախարարություններ տանող հատվածը վերանվանել Վուդրո Վիլսոնի անվամբ: Միաժամանակ, Վազգեն Սարգսյանի անվան փողոցի հարակից այգում, երևանցիների համար հայտնի որպես «Էրեբունի–Երևան 2750» շատրվաններ, Վուդրո Վիլսոնի հուշարձանը տեղադրել: Նման նախագծի անհրաժեշտությունը ավագանու ամենափոքր խմբակցությունը պատճառաբանել է Վիլսոնի՝ Հայկական հարցի հայանպաստ լուծմանը և անկախ Հայաստանի հզորացմանը հետամուտ գործիչ լինելու հանգամանքով:

Ի դեպ, նրանք հուշարձանի նախագծային ու շինարարական աշխատանքների ֆինանսավորումն առաջարկում են իրականացնել հանրության միջոցների հաշվին՝ դրամահավաք անցկացնելու միջոցով:

«Երկիր Ծիրանի»–ի մյուս նախագիծը վերաբերում է Մարտի 1–ի զոհերի հիշատակը հավերժացնող հուշարձանի տեղադրմանը, որի համար նպատակահարմար են գտել Կենտրոն վարչական շրջանի Ալեքսանդր Մյասնիկյանի արձանի հետնամասում գտնվող Իտալիայի, Բեյրութի, Մովսես Խորենացու և Գրիգոր Լուսավորչի փողոցների սահմաններով պարփակված այգին: Այս դեպքում նույնպես հուշարձանի տեղադրման ու նախագծման համար դրամահավաք կկազմակերպեն:

Կյանքի կկոչվեն այս նախագծերը, թե՝ ոչ, պարզ կլինի օրեր անց: Իսկ մինչ այդ «Փաստ»–ը փորձեց պարզել, թե ինչ կարծիքի են «Երկիր Ծիրանի»–ի նախագծերի հետ կապված ավագանու ՀՀԿ խմբակցության անդամները:

Երաժշտագետ Աննա Ասատրյանը լսելով հարցը, նախ մի քանի վայրկյան լռեց, հետո ասաց, որ չի կարող հիմա պատասխանել, քանի որ շատ զբաղված է: Դիտարկմանը, թե հարցին պատասխանելն իրենից ընդամենը երկու րոպե ժամանակ կպահանջվի, ասաց, որ այդ 1–2 րոպեն էլ չունի: Ճարտարապետ Լևոն Իգիթյանն էլ առհասարակ հրաժարվեց խոսել՝ պատճառաբանելով, թե բազմիցս բարձրաձայնել է, որ ընդհանրապես չի շփվում լրագրողների հետ, և դա իր իրավունքն է:

Քիչ թե շատ հստակ պատասխան տվեց երաժիշտ Մարտին Վարդազարյանը, ով նշեց, թե հանձնաժողովի նիստի ժամանակ իր կարծիքն արդեն ասել է՝ դեմ է այդ նախաձեռնություններին: Իսկ որն է պատճառը հարցին՝ պատասխանեց, թե դա առանձին խոսակցություն է, իսկ ինքը հիմա զբաղված է, չի կարող խոսել. «Ինձնից ավելի խելոք մարդ գտեք, նրան հարցրե՛ք»:

Շարունակությունը՝ «Փաստ» օրաթերթի այսօրվա համարում