Ջոնի Մելիքյան. «Ռեալ չէ, որ Սահակաշվիլին կամ իր կուսակցությունը Վրաստանում լուրջ արդյունքների հասնեն». «Փաստ»

«Փաստ» օրաթերթը գրում է.

Վրաստանի նախկին նախագահ Միխայիլ Սահակաշվիլին դիմել է Վրաստանի «Միացյալ ազգային շարժման» իր համակուսակիցներին և կոչ արել այլ կուսակցությունների հետ բանակցություններ սկսել հոկտեմբերին կայանալիք նախագահական ընտրություններին ընդդիմությունից միասնական թեկնածու առաջադրելու համար:

Վրացագետ Ջոնի Մելիքյանի խոսքով՝ բավականին դժվար է նման սցենար պատկերացնել:

«Այսօր «Միացյալ ազգային շարժումը» խորհրդարանում փոքր ֆրակցիա ունի, որը բաղկացած է 6 հոգուց: Բացի այդ՝ պետք է նկատի ունենալ այն փաստը, որ Վրաստանում այսօր նախագահի պաշտոնն արդեն սիմվոլիկ նշանակություն ունի, իսկ նախագահական ընտրություններում հաղթելը չի նշանակում վերադարձնել իշխանությունը: Երկրորդ փաստն այն է, որ իշխող «Վրացական երազանքի» առաջադրած թեկնածուի շանսերը բավականին մեծ են»,– «Փաստ»–ի հետ զրույցում ասաց վրացագետը՝ հավելելով, որ իշխող կուսակցության թեկնածուների վերաբերյալ մի քանի հայտարարություններ կան:

«Վարչապետ Գիորգի Կվիրիկաշվիլին հայտարարել է, որ չի պատրաստվում նախագահի թեկնածու դառնալ: Մամուլում պարբերաբար մի քանի քաղաքական գործիչների անուններ կարելի է տեսնել: Նախկինում կար տեղեկատվություն, որ առողջապահության նախարար Դավիթ Սերգեյենկոն կարող է առաջադրվել, վերջին շրջանում էլ նաև արդարադատության նախարար Տեյա Ցուլուկիանիի անունն էր շրջանառվում: Այդուհանդերձ, իրենք այս պահի դրությամբ դեռ չեն քննարկել և որոշում չի կայացվել, թե իշխող կուսակցության կողմից ով է առաջադրվելու: Այս պարագայում ռեալ չէ, որ «Միացյալ ազգային շարժումը» վերադառնա իշխանության՝ մանավանդ նախագահական ընտրությունների արդյունքում»,–նշեց նա:

Հարցին, թե Վրաստանի հասարակության շրջանում Սահակաշվիլու և իր կուսակիցների նկատմամբ ի՞նչ տրամադրություններ կան, վրացագետը պատասխանեց. «Ըստ սոցիոլոգիական հարցումների՝ մոտ մինչև 10% աջակցություն կա: Բայց մենք պետք է հասկանանք, որ ովքեր դժգոհությամբ են խոսում իշխանության մասին, մի մասն այդ սոցհարցումների ժամանակ այլ կուսակցությունների է ձայն տալիս: Բայց որոշ ստաբիլ էլեկտորատ ունեն և ինչ–ինչ ձևով կարողացել են պահպանել, բայց էլեկտորատը թույլ չի տա իրենց, որ ինչ–որ լուրջ թիվ կարողանան ապահովել»:

Ջոնի Մելիքյանն ընդգծեց, որ պետք է հիշել նախորդ պառլամենտական ընտրությունները, երբ «Միացյալ ազգային շարժումը» մեկ ամսվա ընթացքում կիսվեց. «Հիմնական, ակտիվ ու հայտնի քաղաքական գործիչները և ընտրված պատգամավորների մեծ մասն ուղղակի դուրս եկան կուսակցությունից՝ ստեղծելով «Եվրոպական Վրաստան» քաղաքական ուժը: Այդ իսկ պատճառով այսօրվա դրությամբ նախկին «Միացյալ ազգային շարժման» կողմնակիցները ևս բաժանվեցին երկու տարբեր դաշինքների: Նշված հանգամանքներից ելնելով, ըստ իս, այսօրվա դրությամբ ռեալ չէ, որ Սահակաշվիլին կամ իր կուսակցությունը լուրջ արդյունքների հասնեն Վրաստանում»:

Իսկ հարցին, թե Վրաստանի իշխող կուսակցությունն ունի՞ հասարակության հստակ աջակցությունը, նա պատասխանեց. «Չէի ասի, որ մեծամասնությունն իրենց կողմնակիցն է, կան դժգոհ մարդիկ, ովքեր չեն աջակցում նաև ընդդիմությանը: Ըստ սոցհարցումների՝ իշխող կուսակցությունը մոտ 30–35% աջակցություն ունի, իսկ հարցվածների մոտ 40%–ը կամ չգիտի ում է աջակցելու կամ բոլորին դեմ է և այլ տարբերակներ է ընտրում»:

Վրացագետը նշեց, որ գալիք պառլամենտական ընտրությունները կարևոր են նաև Վրաստանի համար. «Այդ ընտրությունների համար արդեն բոլորը պետք է պայքարեն: Այսօրվա դրությամբ իրենք կրիտիկական ձայների մի մասսա ունեն: Վերջին պառլամենտական ընտրությունները, այնուամենայնիվ, ցույց տվեցին, որ իրենք ստացան սահմանադրական մեծամասնություն և մինչև հաջորդ ընտրություններ կարող են ևս մեկ անգամ տրամադրություններ փոխել: Այսօրվա դրությամբ իրենք այդ քվեն արդեն ստացել են: Թեև այսօր մի փոքր նվազել է աջակիցների թիվը, բայց մինչև գալիք ընտրություններ կաշխատեն, նոր դեմքեր կբերեն և ոչ մի խոչընդոտ չպետք է լինի, եթե, իհարկե, ֆորս մաժորային իրավիճակներ չլինեն»:

Շարունակությունը՝ «Փաստ» օրաթերթի այսօրվա համարում