Համընդհանուր գնանկում սննդամթերքի և ոչ ալկոհոլային խմիչքի գնանկման ֆոնին, բայց միայն 0,5%–ով. «Փաստ»

«Փաստ» օրաթերթը գրում է.

Օրերս Ազգային վիճակագրական ծառայությունը հրապարակել է 2018 թ. հունվար–փետրվար ամիսների սպառողական գների ինդեքսը: Ըստ այդմ՝ 2018 թ. փետրվարին հունվարի համեմատ ՀՀ սպառողական շուկայում արձանագրվել է 0,5% գնանկում, ինչը հիմնականում պայմանավորվել է սննդամթերքի և ոչ ալկոհոլային խմիչքի 1,2% գնանկումով: Սննդամթերքի (ներառյալ ոչ ալկոհոլային և ալկոհոլային խմիչք, ծխախոտ) գները նշված ժամանակահատվածում նվազել են 1,1%–ով, ոչ պարենային ապրանքներինը՝ 0,1%–ով, իսկ ծառայությունների ոլորտում գրանցվել է սակագների 0,1% հավելաճ: 2018 թ. փետրվարին 2017 թ. դեկտեմբերի համեմատ սպառողական գների ինդեքսը կազմել է 102,4%, այդ թվում՝ սննդամթերքինը՝ 104,1%, ոչ պարենային ապրանքներինը՝ 101,6%, ծառայությունների սակագներինը՝ 100,5%:

2018 թ. փետրվարին 2017 թ. փետրվարի համեմատ սպառողական գների ինդեքսը կազմել է 103,3%, այդ թվում, սննդամթերքինը` 104%, ոչ պարենային ապրանքներինը` 104,6%, ծառայությունների սակագներինը` 101,6%:

Հանրապետության դիտարկված 9 քաղաքներում 2018 թ. փետրվարին հունվարի համեմատ բանջարեղենի գները նվազել են 13,9–4,4%–ով, ի դեպ՝ գնանկման ամենաբարձր ցուցանիշն արձանագրվել է Հրազդանում, մեկում գրանցվել է 0,6% գնաճ, իսկ մեկում պահպանվել է գների նախորդ ամսվա մակարդակը: Մայրաքաղաքում բանջարեղենի գների ընդհանուր մակարդակը նախորդ ամսվա համեմատ նվազել է 8%–ով: Կաթնամթերքի, պանրի և ձվի ապրանքախմբում 2018 թ. փետրվարին նախորդ փետրվարի համեմատ արձանագրվել է 7,2% գնաճ, իսկ 2018 թ. հունվարի համեմատ` 0,5% գնակում, ինչին մեծապես նպաստել է ձվի 3,1% գնանկումը:

Մայրաքաղաքում կաթնամթերքի, պանրի և ձվի գների ընդհանուր մակարդակը նախորդ ամսվա համեմատ նվազել է 0,2%–ով: Նվազել են նաև շաքարի և շաքարավազի գները՝ 0,3%–ով: Բացի այդ, փետրվարին հունվարի համեմատ հանրապետությունում արձանագրվել է հրուշակեղենի 0,1% գնանկում, իսկ սուրճի, թեյի և կակաոյի ապրանքախմբում պահպանվել է գների նախորդ ամսվա մակարդակը: Մսամթերքի ապրանքախմբում 2018 թ. փետրվարին 2017 թ. փետրվարի համեմատ գրանցվել է 14,1%, իսկ 2018 թ. հունվարի համեմատ 1% գնաճ:

Շարունակությունը՝ «Փաստ» օրաթերթի այսօրվա համարում