500 միլիոն դրամի ներդրման դեպքում մինչև 99 տարի ժամկետով վարձակալություն. 500. «Փաստ»

«Փաստ» օրաթերթը գրում է.

Որքան ավելի շատ գումար հատկացնեն ներդրող ընկերությունները, այնքան ավելի երկար ժամանակահատվածով կկարողանան վարձակալել բնության հատուկ պահպանվող տարածքների տնտեսական և ռեկրեացիոն գոտիներում գտնվող հողամասերը:

Սրա հետ կապված Բնապահպանության նախարարությունը մի նախագիծ է մշակել և շրջանառության դրել, որի նախաբանում ասված է, որ դրա ընդունմամբ կխթանվի բնության հատուկ պահպանվող տարածքներում կատարվող ներդրումների իրականացումը, ինչն իր հերթին նախադրյալներ կստեղծի բնության հատուկ պահպանվող տարածքների և դրանցում էկոտուրիզմի զարգացման համար: Ասվում է, թե նախագիծը մշակվել է Սերժ Սարգսյանի կողմից 2017 թ. հունիսի 8–ին տրված հանձնարարականի կատարման շրջանակում:

«ՀՀ կառավարության մի շարք որոշումներում փոփոխություններ և լրացումներ կատարելու մասին» կառավարության որոշման նախագիծը մշակվել է՝ նպատակ ունենալով բարձրացնել բնության հատուկ պահպանվող տարածքների տնտեսական և ռեկրեացիոն գոտիների տարածքներում կառուցապատման նպատակով բնության հատուկ պահպանվող տարածքների կառավարումն իրականացնող պետական ոչ առևտրային կազմակերպությանը անհատույց օգտագործման իրավունքով ամրացված հողամասերի վարձակալությամբ տրամադրելու գրավչությունը` կախված կատարվող ներդրումների ծավալից»,– կարդում ենք նախագծում:

Նախարարության աշխատակազմի իրավաբանական վարչությունը մշակել է այս նախագիծը՝ հիմնվելով միջազգային փորձի ուսումնասիրությունների վրա, որոնք ցույց են տալիս, որ Կենտրոնական և Արևելյան Եվրոպայի երկրներում բնության հատուկ պահպանվող տարածքների կառավարման ֆինանսավորումը հիմնականում իրականացվում է պետական բյուջեի միջոցով: Բացի այդ, բնության հատուկ պահպանվող տարածքների համար կարող են ստեղծվել ֆինանսավորման այլ աղբյուրներ, մասնավորապես` բնության հատուկ պահպանվող տարածքներ մուտքի թույլտվություններից, էկոտուրիստական ծառայություններից ստացված օգուտներ, որոնք, սակայն, կազմում են պահպանվող տարածքի բյուջեի փոքր մասը: Ավելի մեծ չափով գումարներ են մուտքագրվում հողերը վարձակալության և (կամ) կառուցապատման և կենսառեսուրսների օգտագործման իրավունքով տրամադրելիս: Այդ նպատակով անհրաժեշտ է, որ պետությունը երաշխավորի պետական սեփականություն հանդիսացող հողերի և դրանց բարելավումների տնօրինման, օգտագործման կամ շահագործման իրավունքի երկարաժամկետ փոխանցումը` ծրագիրն իրականացնող կազմակերպությանը:

Նախագծում ասված է, որ հողերի վարձակալության ուղղությամբ ներկա պայմանները, մասնավորապես` ժամկետները, ընդունելի չեն ներդրողների և բանկերի համար, որոնք չեն տրամադրում հարմար վարկային միջոցներ ներդրողներին: Ներդրողներին խրախուսելու համար անհրաժեշտ է վերանայել հողի կառուցապատման իրավունքով վարձակալության տրամադրման պայմանները և ժամկետները: Հողային օրենսգրքի համաձայն՝ պետության և համայնքների սեփականության հողամասերի վարձակալության ժամկետը կարող է սահմանվել մինչև 99 տարի` համապատասխան ներդրումների կատարման պայմանով:

Ասված է նաև, որ ժամկետների և ներդրումների ծավալների համամասնությունները մանրամասն քննարկվել են բնության հատուկ պահպանվող տարածքների կառավարումն իրականացնող պետական ոչ առևտրային կազմակերպությունների հետ՝ հաշվի առնելով բնության հատուկ պահպանվող յուրաքանչյուր տարածքի վիճակը և ներդրումների գրավչության պոտենցիալը:

Բնության հատուկ պահպանվող տարածքներում դրա կառավարումն իրականացնող պետական ոչ առևտրային կազմակերպությանը անհատույց օգտագործման իրավունքով ամրացված պարկի ռեկրեացիոն և տնտեսական գոտիների տարածքների՝ կառուցապատման նպատակով հողամասերը կարող են տրամադրվել մինչև 5 տարի ժամկետով, եթե կառուցապատման համար ներդրումները կազմում են մինչև 50 միլիոն դրամ, մինչև 25 տարի՝ 50–150 միլիոն դրամ ներդրումների, մինչև 50 տարի՝ 150–300 միլիոն դրամի, մինչև 75 տարի՝ 300–500 միլիոնի և մինչև 99 տարի՝ 500 միլիոն դրամ և ավելի ներդրումների դեպքում:

Շարունակությունը՝ «Փաստ» օրաթերթի այսօրվա համարում