Լյուդմիլա Սարգսյան. «ՕԵԿ–ը գնաց այդ ճանապարհով, քանի որ վարկաբեկվել էր». «Փաստ»

«Փաստ» օրաթերթը գրում է.

ԱԺ նախկին պատգամավոր Լյուդմիլա Սարգսյանն անդրադառնալով ՀՎԿ–ի հետքայլին «Փաստ»–ի հետ զրույցում նշեց, որ իր կարծիքն առանձնապես շատ չի տարբերվում ընդհանուր հանրային կարծիքից:

«Նոր ձևավորված «Հայկական վերածնունդ» կուսակցությունը չարդարացրեց իրեն: ՕԵԿ–ը գնաց այդ ճանապարհով, քանի որ վարկաբեկվել էր և այլևս ընդունելի չէր հանրության կողմից: Նրանք որոշեցին վերանվանվել, մտածելով, որ շատ հարցեր կմոռացվեն հասարակության կողմից, մարդիկ կսկսեն այլ կերպ վերաբերվել կուսակցությանը: Սակայն կյանքը ցույց տվեց, որ այդ ճանապարհը նրանց տարավ փակուղի»,– ասաց Լ. Սարգսյանը:

Խոսելով 100–ից ավելի կազմակերպությունների ՕԵԿ–ի հետ միավորվելու մասին, նա նշեց, որ դրանք մարդ–կուսակցություններ էին, չնայած, որ կուսակցության առաջնորդները հույս ունեին, որ դրա միջոցով միայն կկարողանան իրենց կուսակցության ռեաբիլիտացիան ապահովել:

«Իրականում այդ քայլը չաշխատեց, քանի որ այն ՀԿ–ներն ու մարդիկ, որոնք միացել էին, քաղաքական դաշտում դերակատարություն չունեցող անձինք էին: Բացի այդ, մարդիկ տեսնում են ովքեր էին ՀՎԿ–ի կազմում ընդգրկվածները և ովքեր էին նոր՝ ՀՎԿ–ի ղեկավարները: Նույն Արթուր Բաղդասարյանն էր, նույն Հեղինե Բիշարյանը և այլն: Հետևաբար ի սկզբանե պարզ էր, որ ռեբրենդինգ լինելը որևէ դրական արդյունք չի ապահովի ՕԵԿ–ի համար, ինչը փաստեցին նաև ԱԺ ընտրությունների արդյունքները»,– ասաց Լ. Սարգսյանը:

Հիմա նախկին՝ ՕԵԿ կուսանվանը վերադառնալը, քաղաքական գործչի կարծիքով, ժամանակին ավելի հաջողակ լինելու մտայնության հետևանք է: Այն նաև հույս է, թե դրանով հնարավոր կլինի ինչ–որ բան փոխել կուսակցության կյանքում: Սակայն, ինչպես կյանքը ցույց է տալիս, որ ավելի շուտ հարկավոր է հաշվի նստել ռեալ իրողությունների հետ և ռեալ գնահատել, թե ժողովուրդն իրենց ինչքանով է վստահում:

ՀՎԿ–ն նորից ՕԵԿ–ի ռեբրենդինգ անելով, Լ.Սարգսյանի կարծիքով որևէ բան չի փոխվի, քանի որ դրանից նրանց քաղաքական կշիռը չի փոխվի:

«Դա փաստվում է նաև սոցիալական ցանցերում կատարված գրառումներից և պարզ է դառնում, որ մարդիկ չեն վստահում այդ կուսակցությանը: Դրա պատճառն այն է, որ իրենք ժամանակ–առ–ժամանակ ընդդիմություն են դառնում, հետո նորից վերադառնում են իշխանություն: Եվ տպավորություն է ստեղծվում, որ նրանք իշխանության կողմից գործուղվում են որպես ընդդիմություն, հետո նորից վերադառնում են իրենց ակունքներին»,– ասաց քաղաքական գործիչը:

Իրականում հին հենքի վրա նոր կուսակցություն ստեղծելու ճանապարհով է անցել նաև ՀԱԿ–ը, որը հասարակության շրջանում շարունակում է ՀՀՇ–ի հետ ասոցացվել: Լ. Սարգսյանի կարծիքով, սակայն ՀԱԿ–ի անվանափոխությունը տրամաբանական է եղել, քանի որ այն ծնվել է հասարակական հզոր շարժման արդյունքում: Այնպես որ, ըստ քաղաքական գործչի, մի փոքր ազնիվ չէ, ՀԱԿ–ին ՀՎԿ–ի հետ համեմատելը:

«ՀՎԿ–ն արհեստականորեն ձևավորված միավոր էր, իսկ ՀԱԿ–ը շարժում էր, որին հետագայում միացան շատ ու շատ կուսակցություններ: Այնպես որ համեմատության եզրեր չկան ու չեն էլ կարող լինել»,– ասաց Լ. Սարգսյանը:

Խոսելով ներկուսակցական դեմոկրատիա ունենալ–չունենալու մասին նա նշեց, որ կուսակցությունները Հայաստանում վառ արտահայտված մեկ լիդերի շուրջ են ձևավորվում, որը հետագայում չի համալրվում ճանաչված այլ մարդկանցով: Եվ հետևաբար երկրորդ, երրորդ համարժեք լիդերներ այդպես էլ չեն ձևավորվում, այսինքն այլ նախագահ ընտրելու հնարավորություն չեն ունենում, ինչն էլ դառնում է խնդիր կուսակցությունների համար:

«Բացի այդ, կուսակցություններում տեղի ունեցող երևույթները շատ նման են երկրում տեղի ունեցող իրադարձություններին: Այսինքն, ինչպես երկրում, այնպես էլ կուսակցություններում չի կարող դեմոկրատիա լինել, քանի որ խորհրդային տարիներից դեռևս պահպանվում է մեկ անձի առաջնորդության սկզբունքը»,– ասաց Լ. Սարգսյանը:

Բացի այդ, կուսակցությունների դերը բավականին իջեցվել է: Չկա պետական ֆինանսավորում և այդ է պատճառը, որ կուսակցություններն, այսպես թե այնպես, ինքնալուծարվում են: Եվ եթե անգամ փաստաթղթով էլ չեն ամրագրում դա, բայց նրանց գործոնը հավասարվում է զրոյի:

«Էվոլյուցիոն պրոցեսները որևէ մեկը չի կարող կանգնեցնել, անգամ երկրի ներքին դեմոկրատիայի պարագայում, քանի որ կյանքն առաջ է ընթանում: Այսօր աշխարհը բաց է մեզ համար, ինչը նշանակում է, որ աշխարհում տեղի ունեցող պրոցեսները կամա թե ակամա դրական փոփոխությունների են բերելու: Ես հավատում եմ, որ ժամանակի ընթացքում ինչ–որ բան փոխվելու է: Եվ եթե շատերի համար դա կարող է անգամ տեսանելի չլինել, ապա վստահ եմ, որ երիտասարդները դա կտեսնեն»,– ասաց Լ. Սարգսյանը:

Շարունակությունը՝ «Փաստ» օրաթերթի այսօրվա համարում