Ռուբեն Մելքոնյան. «Թուրքիան միտումնավոր է վիժեցնում հայ–թուրքական հարաբերությունների կարգավորման գործընթացը». «Փաստ»

«Փաստ» օրաթերթը գրում է.

Թուրքագետ Ռուբեն Մելքոնյանը «Փաստ»–ի հետ զրույցում անդրադառնալով Մյունխենի անվտանգության համաժողովի ժամանակ հայ–թուրքական հարաբերությունների հարցի վերաբերյալ ՀՀ նախագահ Սերժ Սարգսյանի հնչեցրած պատասխանի՝ թուրքական հասարակական և քաղաքական շրջանակների արձագանքներին, նշեց, որ քանի որ այս օրերին թուրքական քաղաքական էլիտան զբաղված է սիրիական խնդրի էլ ավելի խորացմամբ, ուստիև դեռևս չի արձագանքել ՀՀ նախագահի խոսքին: Ինչ վերաբերում է թուրքական քաղաքագիտական և վերլուծական շրջանակներին, ապա նրանք բավականին ակտիվ են արձագանքել, իսկ կարծիքները բաժանվել են երկու բևեռների:

«Արձագանքներն ու կարծիքները երկու ոճի են: Նրանք, ովքեր փորձում են ավելի օբյեկտիվ երևալ, ՀՀ նախագահի ելույթի կարևոր շեշտադրումները համարում են շատ ճիշտ և հայտարարում են, որ ըստ էության հայ–թուրքական հարաբերությունների կարգավորման վրա էական ազդեցություն են ունեցել այն կետերը, որոնց մասին ՀՀ նախագահը շեշտեց: Այսինքն, ուղղակիորեն չեն բարձրաձայնում, որ թուրքական կողմը մեղավոր է, բայց քաղաքագիտական ձևակերպումներով, անուղղակիորեն ընդունում են այդ փաստը»,– ասաց Ռ. Մելքոնյանը:

Թուրքագետի խոսքով՝ ավելի կարծր, իշխանամետ դիրքորոշում ունեցող վերլուծաբանները շարունակում են նույն մաշված՝ նախապայմանների թեզերը կրկնել, իրենց մտքերը ձևակերպելով, թե իբր հայ–թուրքական հարաբերությունների չկարգավորման համար մեղավոր է Հայաստանը, հայկական սփյուռքը և այլն:

«Այսինքն, իշխանամետ վերլուծաբանների նման մեկնաբանությունները ռացիոնալ որևէ տարր չեն պարունակում»,– ասաց Ռ. Մելքոնյանը:

Խոսելով այն վարկածի մասին, թե իբր Ադրբեջանն է «միջնորդել», որպեսզի թուրքական կողմը տապալի երկխոսությունը, թուրքագետը նշեց, որ դա բավականին զգայուն թեմա է թուրքական հասարակական–քաղաքական շրջանակների համար, և քիչ թե շատ օբյեկտիվ վերլուծաբանները փորձում են այդ հարցը շրջանցել:

«Անգամ ընդդիմադիր կամ օբյեկտիվ մեկնաբաններն աշխատում են շատ չանդրադառնալ ադրբեջանական գործոնին, քանի որ դա կարող է առաջ բերել տարատեսակ արձագանքներ, ընդհուպ մինչև՝ նրանց կարող են մեղադրել դավաճանության մեջ: Իսկ իշխանամետ հատվածը շարունակում է թուրքական սկզբունքայնության դրսևորման թեզն առաջ տանել, որպես թուրք–ադրբեջանական եղբայրության հերթական արտացոլում, մոռանալով, որ միջազգային հարաբերությունների ժամանակ եղբայր, եղբայրական պետություն և այլ նմանատիպ արտահայտություններ չկան և թուրքական իշխանությունների կողմից արված քայլերը մեկնաբանում են պանթուրքիստական, ազգայնամոլական դրսևորումներով, որին կարելի է միայն մեկ որակավորում տալ: Այսինքն, հայ–թուրքական հարաբերությունները կապելով հայ–ադրբեջանական հարաբերությունների հետ՝ Թուրքիան տասնամյակներ շարունակ միտումնավոր է վիժեցնում հայ–թուրքական հարաբերությունների կարգավորման գործընթացը և ոչնչացնում է այն բոլոր հնարավորությունները, որոնք կարող են տանել այդ հարաբերությունների կարգավորմանը»,– ասաց Ռ. Մելքոնյանը:

Շարունակությունը՝ «Փաստ» օրաթերթի այսօրվա համարում