Առանց կրակ ծուխ չի լինում. «Փաստ»

«Փաստ» օրաթերթը գրում է.

Օրերս «Փաստ»–ի խմբագրությունը Վարազ Սյունեցու և 50 մտահոգ սյունեցիների կողմից ստորագրված նամակ էր ստացել, որն ի դեպ, ուղարկված է եղել նաև ՀՀ նախագահին: Նամակում ասվում է, որ Սյունիքի մարզպետ Վահե Հակոբյանը պատեհ–անպատեհ առիթներով վիրավորում ու հետապնդում է սյունեցիներին:

«Ամենուրեք Ձեր և Ձեր շրջապատի (նամակագիրները նկատի ունեն ՀՀ նախագահին,– խմբ.) տնտեսական գործակալ ներկայացող Վահե Հակոբյանին չեն հետաքրքրում, որ կառավարման համակարգը թողնված է բախտի քմահաճույքին: Նա իր մանր ու քինախնդիր էությամբ միայն կարողանում է սպառնալ հետապնդումներով ու քրեական գործեր սարքելով»,– ասվում է նամակում:

Նշվում է նաև Դարպաս համայնքի դպրոցի տնօրենի մրցույթում հաղթելու, որից հետո մարզպետի կողմից քրեական հետապնդում սկսելու ու տապալվելու մասին, Սյունիքի 5 հիվանդանոցների տնօրեններին պաշտոնանկ անելու, «Սյունյաց երկիր» թերթի խմբագրի հանդեպ արհեստածին մեղադրանքներով քրեական գործեր հարուցելու մասին: Գրում են, որ Սյունիք համայնքի դպրոցի տնօրենին աշխատանքից ազատել են միայն այն բանի համար, որ նա ընթերցում է նշված թերթը և այլն:

Նամակում ՀՀ նախագահին հարց է ուղղվում, թե՝ «ճի՞շտ է արդյոք, որ մարզի ԱԱԾ–ն, դատախազությունը, ոստիկանությունը ղեկավարվում են Սյունիքի մարզպետ Վահե Հակոբյանի կողմից և կատարում են նրա սուբյեկտիվ ցանկությունները, քանի որ նա հայտարարում է, որ յուրաքանչյուրին կնստացնի ու կկորցնի, իսկ նրա մարզպետ նշանակվելուց հետո արդեն 13 քրեական գործ է հարուցվել»:

Այս հարցերի մութ անկյունների վրա լույս սփռելու համար «Փաստ»–ի թղթակիցը փորձեց կապ հաստատել Սյունիքի մարզպետի հետ, սակայն մեր՝ մարզպետի հետ զրուցելու ցանկությանն ի պատասխան, խորհուրդ տվեցին զրուցել մարզպետի մամուլի քարտուղար Սամվել Սաղաթելյանի հետ:

«Փաստ»–ի թղթակցի հարցերին պատասխանելով, Ս. Սաղաթելյանն ասաց, որ դպրոցի տնօրենը չէր կարող թերթ կարդալու համար պաշտոնից ազատվել: Մարզում ահ ու սարսափի մթնոլորտ տիրելու մասին էլ, ապա Սյունիքի մարզպետի մամուլի քարտուղարն ասաց.

«Անլուրջ ենք համարում այդ հարցը մեկնաբանելը: Իհարկե, չի կարող արգելված թերթ լինել: Մենք ապրում ենք դեմոկրատական երկրում, և դրանք հորինված, անլուրջ, անհեթեթ որակումներ են: Դպրոցի տնօրենը աշխատանքից ազատվել է սեփական դիմումի համաձայն: Եթե հետևեք լրահոսին, ապա կտեսնեք, որ տվել ենք մեկնաբանություն, թե ինչ հիմքով է տնօրենն ազատվել աշխատանքից: Թերթը կարդալու համար մարդիկ աշխատանքից չեն ազատվում: Եվ այն, ինչ արվում է, արվում է օրենքի շրջանակներում: Ինչ վերաբերում է պնդումներին, թե մարզում վախի մթնոլորտ կա, ապա ես անլուրջ եմ համարում այդ հարցին պատասխանել»,– ասաց Ս. Սաղաթելյանը:

Նա նաև նշեց, որ մարզում որևէ վախի մթնոլորտ էլ չկա և բարենպաստ պայմաններ են ստեղծված տարբեր գործառույթներ իրականացնելու համար և բավականին լավ տրամադրություն է տիրում մարզում: Նա նաև անհեթեթ և անլուրջ համարեց պնդումները, թե Սյունիքի մարզպետն աջ ու ձախ մարդկանց ահաբեկում է՝ ասելով, թե բոլորին կնստացնի ու կոչնչացնի:

«Անհեթեթ պնդումներ են, որոնց կրկին անլուրջ եմ համարում պատասխանել: Դրանք իրականության հետ որևէ առնչություն չունեն և հիմնված են ինչ–որ մարդկանց հարուստ երևակայության վրա»,– ասաց Վ. Սաղաթելյանը:

«Փաստ»–ը վաղը կներկայացնի նաև նամակում նշված անձանց առնչվող դեպքերի ու դրանց ընթացքի մասին: Եվ որքան էլ Սյունիքի մարզպետի մամուլի խոսնակը դրանք անհեթեթ և անլուրջ որակեց, սակայն, ինչպես ժողովուրդն է ասում, առանց կրակ ծուխ չի լինում:

Շարունակությունը՝ «Փաստ» օրաթերթի այսօրվա համարում