Արամ Մանուկյան. «Թող բոլորը գան ու պարծենան, որ եղել են մեր երկրի անկախության շարժման ակունքներում». «Փաստ»

«Փաստ» օրաթերթը գրում է.

Փետրվարի 20–ը համարվում է Հայաստանի անկախության շարժման սկիզբը: Դա այն օրն էր, երբ Ազատության հրապարակում ամենամարդաշատ հավաքը կայացավ: «Փաստ»–ը ՀԱԿ փոխնախագահ Արամ Մանուկյանից փորձեց պարզել, թե այս օրերին ինչով է զբաղված կուսակցությունը:

«Այն անեկդոտը լսել եք, որ ասում է՝ իմ գործ թողած, քո գործն եմ անում: Հիմա մենք մեր գործը թողած՝ իշխանության գործն ենք անում»,– ասաց Ա. Մանուկյանը:

Իշխանության թողած հատկապես ո՞ր գործն են որոշել ավարտին հասցնել հարցին, քաղաքական գործիչը պատասխանեց, որ այս օրերին լրանում է 88–ի անկախության շարժման 30–ամյակը, որը ոչ միայն զարթոնք էր, այլև՝ լուսավոր պատմական շրջան, իսկ ժողովրդի կյանքում՝ լավագույն տարիներ:

«Եվ դա ունի թե՛ դաստիարակչական իմաստ, թե՛ մարդկանց ոգևորելու իմաստ: Այն նաև հազար ու մի դրական միտք է իր մեջ պարունակում: Այդ ընթացքում ողջ ժողովուրդը հաղթահարեց դարավոր վախի զգացողությունը, բարդույթավորվածությունը, որ պետք է անպայման ուրիշի ենթակայությամբ կամ հովանավորությամբ ապրի: Այսինքն, արժանապատվության մեծագույն տոնահանդես էր շարժումը: Այս արժեքի մասսայականացնելն ու ժողովրդին մատուցելը իշխանությունների թիվ մեկ գործը պետք է լիներ: Ժողովրդին հպարտության զգացում պետք է մատուցվեր, բայց կա՛մ իշխանության խելքը չի հասնում, որ դա մեծագույն արժեք է, կա՛մ դիտավորյալ չեն ցանկանում ոգևորել, որպեսզի ժողովուրդն ընկճված մնա, քանի որ ընկճված ժողովուրդն ավելի հեշտ է կառավարվում»,– ասաց Ա. Մանուկյանը:

Քաղաքական գործչի կարծիքով իշխանությունները իր նշած արժեքներով չեն ապրում: Ավելին, դեմ են ըմբոստ և ինքնիշխան քաղաքացի ունենալուն: Եվ դա է պատճառը, որ այդ գործը մնացել է իրենց, ինչն իրենք հաճույքով են անում: Դա ոչ միայն քաղաքական գործընթաց են համարում, այլ՝ պայքարի ու սեփական ժողովրդի ոգին բարձր պահելու միջոց:

«Ինձ համար շատ կարևոր է, որ քաղաքացին զգա, որ ինքը կարող է ինչ–որ բան անել: Որ ինքն է այն հերոսը, որը 88–ին հաղթեց իմպերիային, անկախություն ձեռք բերեց: Դրա արդյունքում Արցախում հաջողություն ձեռք բերեց, բայց հետո հայտնվեց այն մարդկանց ձեռքին, որոնց ձեռնտու է խավար սիրել, ոչ թե ազատությունը»,– ասաց Ա. Մանուկյանը:

Շարժման 30–ամյակի կապակցությամբ ՀԱԿ–ը մեծ ցուցահանդես է կազմակերպել և բոլորին, առանց բացառությունների, հրավիրում է մասնակցել, որտեղ կներկայացվեն շարժման օրերին լուսանկարիչների կողմից ֆիքսած մոտ 200 կադր:

«Դրանք արխիվային և պատմական կադրեր են: Այդ օրը կցուցադրվեն նաև շարժման պաստառները, որոնք պահպանվել են Երևանի պատմության թանգարանում: Շեփորները 3–ն են եղել, որոնցից մեկը Պատմության թանգարանում է, մեկը մեզ մոտ է, մյուսը շեփորահար Աշոտ Միրզոյանի մոտ է, ով ի դեպ, նույնպես մասնակցելու է միջոցառմանը»,– ասաց Ա. Մանուկյանը:

Կլինեն նաև դրոշներ ու լոզունգներ, որոնք օգտագործվել են շարժման ընթացքում: Քաղաքական գործիչը շնորհակալություն հայտնեց նաև Երևանի պատմության թանգարանի տնօրենին շարժման դրոշներն ու լոզունգները տրամադրելու համար: Ա. Մանուկյանը նշեց նաև, որ փորձելու են Ազատության հրապարակում այն միջավայրը ստեղծել, որը եղել է 30 տարի առաջ:

«Սա ոչ թե կուսակցական միջոցառում է, այլ ներկայացվելու է մեր շարժման պատմությունը, որի նպատակը, իմաստը և խորագիրը հետևյալն է՝ «Արի և քեզ գտիր շարժման ու պատմության մեջ»: Դա մարդուն կօգնի կրկին հպարտության զգացում ապրել, որ ինքը այս անկախ երկրի քաղաքացին է»,– ասաց Ա. Մանուկյանը:

Նա նաև տեղեկացրեց, որ միջոցառումը կսկսվի փետրվարի 20–ին ժամը 13:00–ին, բայց պաշտոնական բացումը տեղի կունենա ժամը 17:00–ին: Միջոցառումը կտևի 3 օր: Իսկ դրան կմասնակցի, թե չի մասնակցի ՀԱԿ առաջնորդ Լևոն Տեր–Պետրոսյանը, Ա. Մանուկյանը չգիտեր: Նա նաև նշեց, որ միջոցառմանը մասնակցելու անձնական հրավերներ չեն լինելու, քանի որ դա բոլորի տոնն է:

«Թող բոլորը գան ու պարծենան, որ եղել են մեր երկրի անկախության շարժման ակունքներում»,– խոսքը եզրափակեց Ա. Մանուկյանը:

Շարունակությունը՝ «Փաստ» օրաթերթի այսօրվա համարում