Անվտանգության հարցը չի կարգավորվում. «Փաստ»

«Փաստ» օրաթերթը գրում է.

Պաշտոնական տվյալներով ճանապարհատրանսպորտային պատահարների հետևանքով զոհերի և վիրավորների թիվը 2017 թ. 2016 թ. համեմատ աճել է: Օրեցօր ավելացող արագաչափերի, տեսախցիկների ֆոնին զոհերի թիվն աճել է 13–ով, տուժածներինը՝ 739–ով:

«Վարորդի ընկեր» ԻՀԿ համահիմնադիր Դավիթ Պեդանյանը «Փաստ»–ի հետ զրույցում նշեց, որ երթևեկությունը կառավարող սարքավորումները ոչ մի օգուտ չեն տալիս. «Վարորդները գալիս են, արագաչափի մոտ դանդաղեցնում արագությունը, իսկ հետո «ոտքը դնում գազին» ու շարունակում ճանապարհը: Իսկ տեսախցիկների առումով տուգանվող մեքենաների միջև անհավասարություն կա: Օտարերկրյա համարներով մեքենաները նոր են սկսել տուգանվել, իսկ մինչ այդ ինչպես ուզում՝ այնպես էլ քշում էին: Բացի այդ՝ բազմաթիվ պետական համարներով մեքենաներ չեն տուգանվում: Այսինքն՝ անվտանգության հարցը չի կարգավորվում: ՃՈ–ն պետք է իր մարդկային ռեսուրսների հաշվին շտկի իրավիճակը, բայց նրանց կողմից դա բարեխղճորեն չի կատարվում: Բացի այդ՝ վերջին 2 տարիների ընթացքում մեքենաների թիվը եռակի աճել է, ինչը պատահարների թվի ավելացման հարցում չի կարող իր դերը չունենալ»:

Ինչ վերաբերում է հայտարարված բարեփոխումներին ու թերացումներին, նա նշեց, որ որոշակի բարեփոխումներ եղել են. «Օրինակ՝ որոշ փողոցներում լայնացումներ եղան: Բայց թե՛ Երևանի, թե ՀՀ–ի փողոցները մինչև հիմա չունեն երթևեկության համար անհրաժեշտ բոլոր սարքավորումներն ու նշանները: Գծանշումները մաշված են, ճանապարհների վիճակն էլ ահավոր է: Իսկ ՃՈ–ն և ՀՀ տրանսպորտի նախարարությունը կոչերն ականջի կողքով է անցկացնում: Հիմա իդեալական մի փողոց չեք գտնի: Երբ մեր խմբում այս կամ այն փողոցի մասին ենք նշում ու բողոքարկում ենք տուգանքները, ասում, որ մարդիկ չեն կողմնորոշվում, քանի որ կողմնորոշիչ նշանները բացակայում են, ՃՈ–ն սկսում է այդ փողոցը կահավորել: Հետիոտնային անցումի վրաերթները ևս չեն կանխվում: Լայն փողոցներում չի կարելի հետիոտնային անցում գծել, այնտեղ պետք է վերգետնյա կամ ստորգետնյա անցում լինի: Բայց երբ վրաերթի հետևանքով մարդ է մահանում, նշվածների փոխարեն արագաչափ են դնում, ինչը հարցի լուծում չէ»:

Նրա խոսքով՝ փոփոխությունները երթևեկությունը կարգավորելուն են միտված, բայց անվտանգությունն ապահովելու ուղղությամբ ընդհանրապես աշխատանք չի կատարվում:

Դավիթ Պեդանյանի դիտարկմամբ՝ տուգանքների մասին պատշաճ ծանուցման առումով ոչ թե առաջընթաց, այլ հետընթաց կա. «Մարդիկ թե՛ վարչական մարմնից, թե՛ դատարանից իրենց որոշումները չեն ստանում, կամ էլ ստանում են միայն այն ժամանակ, երբ գործն արդեն Դատական ակտերի հարկադիր կատարման ծառայություն է հասել: Իսկ պետական ծանուցման համակարգը՝ azdarar.am–ը, իրենից ոչ մի լուրջ բան չի ներկայացնում: Նախ՝ կան տարիքով մարդիկ, ովքեր ինտերնետից չեն կարողանում օգտվել: Եթե փոստատարը բերեց նամակը, տանը չեղաք ու չվերցրեցիք այն, ուղարկում են վարչական մարմին, գցում են azdarar.am ու հաջորդ օրվանից համարում, որ դուք արդեն ծանուցվել եք: Իսկ եթե azdarar.am–ով ծանուցվել եք ու ինչ–որ ժամկետում տուգանքը չեք վճարել, չեք բողոքարկել, ուղարկում են ԴԱՀԿ, որն էլ հաշիվների վրա կալանք է դնում: Այս առումով փնթի իրավիճակ է: Մենք փոստարկղեր չունենք, որ նամակը թողնեն այնտեղ, թեև դա ևս հարցի լուծում չէր լինի: Չեն կարող գցել, որովհետև կարող է ուրիշ մարդ վերցնել: Իրավունքների խախտում է, երբ տուգանքի նամակը հասցեատիրոջը չեն տալիս»:

Ինչ վերաբերում է տուգանքներին, Դ. Պեդանյանն ընդգծեց. «Տուգանքների տեսակներն են փոխվում: Երբ ապացուցում ենք, որ ինչ–որ հատվածում գրանցված տուգանքն անօրինական է եղել, այդ հատվածում տուգանքները նվազում են: Վարորդները տեղեկանում են այդ մասին ու ավելի զգոն լինում այդ հատվածներում, բայց ՃՈ–ն տուգանքների նոր աղբյուրներ է փնտրում: Հիմա սկսել են տուգանել ինչ–որ խաչմերուկում չզիջելու, լուսարձակներն առանց միացնել վարելու համար և այլն: Փորձում են տուգանքների տարեկան քանակն ավելացնել: Անցած տարվա կտրվածքով պաշտոնական տվյալներով մեկ միլիոն 800 հազար տուգանք է եղել, իսկ դրանից առաջ՝ 1,6: Իսկ մեր տվյալներով՝ 2,5 միլիոնից ավելի տուգանք է եղել: Քանի որ բոլոր կառույցներին հրամայվել է բյուջե լցնել, պատկերացրեք, թե 2018 թ. վարորդների հաշվին ինչ նորմատիվներ կլրացվեն»:

Դավիթ Պեդանյանը հավելեց, որ իրենց կազմակերպությունն անօրինական տուգանքների առումով հաղթանակների 60–70% ցուցանիշ է գրանցել:

Շարունակությունը՝ «Փաստ» օրաթերթի այսօրվա համարում