Դոլորես Ղափանցյան. «Պետք է օրենքի ուժով թույլ չտալ ներմուծել ԳՄՕ պարունակող սննդամթերք և սերմեր». «Փաստ»

«Փաստ» օրաթերթը գրում է.

ԱԺ–ում ընթանում են «Գենետիկորեն ձևափոխված օրգանիզմներ՝ այլընտրա՞նք, թե պարտադրանք» թեմայով խորհրդարանական լսումները:

Այն նախաձեռնել է ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովը:

ԳՄՕ սննդամթերքների հետ կապված օրենսդրական նախաձեռնություն 2013 թ. եղել է, սակայն, այն շարունակություն չի ունեցել:

Կենսաբան Դոլորես Ղափանցյանը «Փաստ»–ի հետ զրույցում հիշեցրեց, որ այդ ժամանակ էլ իրենք ԳՄՕ–ների արգելման հետ կապված օրենք էին պահանջում: Քննարկումներ եղել են, բայց փաստաթուղթն այդպես էլ օրենքի ուժ չի ստացել:

Նրա պնդմամբ՝ Հայաստանը պետք է գենետիկորեն ձևափոխված օրգանիզմներից զերծ երկիր դարձնել: Համաձայն չէ այն մտքին, որ ներմուծվի կամ արտադրվի ԳՄՕ պարունակող սննդամթերք:

«Սա անթույլատրելի է նաև համաշխարհային շուկա մտնելու համար, որովհետև եթե Հայաստանը ցանկանում է բանջարեղեն արտահանել Եվրոպա, պետք է էկո սննդամթերք արտադրի»,– նշեց մասնագետը:

Բացի սա, մեր բնակչության թիվը քիչ է: Կենսաբանի խոսքով՝ եթե շարունակեն նրանց ԳՄՕ պարունակող սննդամթերք մատակարարել, տարիներ անց ապագա սերնդի առողջությունը վտանգի տակ է հայտնվելու:

«Սա մեր ազգի, գենոֆոնդի նկատմամբ դավաճանություն է: Փորձության ենք ենթարկում մեր բնակչությանը: Գենետիկական, կենսաբանական, գյուղատնտեսական գրականությունում հեղինակավոր գիտնականների կողմից նյութեր կան, որոնք ապացուցում են, թե ինչ մեծ վտանգ այն կարող է իրենից ներկայացնել: Այդ ազդեցությունը մեր առողջության վրա վաղը կամ մյուսը օրը չեն զգա, այլ կերևա տարիների ընթացքում: Դա ապագա սերնդի վրա կազդի, այս ամենի համար ո՞վ պետք է պատասխան տա՝ առանց այն էլ մեր երկրում սիրտ–անոթային, դիաբետիկ, վահանաձև գեղձի հիվանդությունների քանակն օրեցօր ավելանում է»,– վրդովվեց Ղափանցյանը:

Մասնագետի կարծիքով՝ պետք է թույլ չտալ երկիր մտնել սերմեր, որոնք գենաձևափոխված օրգանիզմներ են պարունակում: Իսկ դրանից խուսափելու համար պետք է տեղական սերմարտադրությունը զարգացնել:

«Մենք ունենք սերմերի շտեմարան, հին լոլիկի, կարտոֆիլի, ցորենի սերմերն անհրաժշետ է վերականգնել: Պետք է սերմարտադրություն մշակել և Հայաստանը դարձնել ԳՄՕ–ից զերծ երկիր, այդ աղբից պետք է մաքուր պահել մեր երկիրը»,– նշեց մեր զրուցակիցը:

Դոլորես Ղափանցյանի պնդմամբ՝ համապատասխան օրենք պետք է ընդունել, որտեղ պետք է մի շարք կետեր ամրագրել՝ թույլ չտալ ներմուծել ԳՄՕ պարունակող սննդամթերք և սերմեր, ինչպես նաև չներկրել ԳՄՕ պարունակող պահածոյացված մթերք:

Հիշեցնենք, որ ԳՄՕ սերմերի Հայաստան ներմուծման շուրջ աղմուկ բարձրացավ, երբ պարզ դարձավ, որ շուկայում ակտիվացել է «Monsanto» ընկերությունը: Մտահոգություններ հնչեցին, որ այն կարող է վտանգավոր լինել մեր բնակչության համար: Հայտնի երաժիշտ Սերժ Թանկյանը ևս կոչ է արել հեռու մնալ «Monsanto»–ի արտադրանքից:

Monsanto ընկերությունը ՀՀ–ում ներկայացնում է «Ագրոլայն» ՍՊԸ–ն: Պաշտոնական տվյալներով ներմուծվել է 125 կգ սերմ:

Շարունակությունը՝ «Փաստ» օրաթերթի այսօրվա համարում