Դավոսի ֆորումից մինչև ապագա վարչապետ. «Փաստ»

«Փաստ» օրաթերթը գրում է.

Մեր հյուրն է քաղաքական տեխնոլոգ Արմեն Բադալյանը

– Պարոն Բադալյան, վարչապետ Կարեն Կարապետյանը մասնակցում է Դավոսի ֆորումին: Կարելի է ասել, որ սա նրա առաջին մասնակցությունն է արևմտյան նման հզոր միջոցառման: Սա կարելի՞ է ինչ–որ բանի սկիզբ համարել:

– Ո՛չ, չի կարելի: Որովհետև մասնակցությունն առանց տնային աշխատանքի կատարման, ոչ մի նշանակություն չունի: Իսկ տնային աշխատանք ասելով պետք է հասկանանք Հայաստանում ներդրումներ կատարելու համար անհրաժեշտ միջավայրի ձևավորումը:

Նաև՝ մինչ Դավոս մեկնելը արևմտյան ներդրումային ընկերությունների կամ ներդրողների հետ բանակցություններ վարելը: Որովհետև Դավոսում դու արդեն ինչ–որ բան պետք է ներկայացնես: Իսկ եթե նախապես չես արել այդ ինչ–որ բանը, ապա այնտեղ գնալ–խոսելն ունենում է զրո արդյունք:

– Համենայն դեպս նա հայտարարեց, որ Հայաստանը լավագույն ներդրումային միջավայր ունեցող երկրներից է: Դա ազդեցություն չի՞ թողնի մարդկանց վրա:

– Դե, բնական է, որ այդպես պետք է ասեր: Հո չէր ասելու, որ Հայաստանում կան մենաշնորհներ, որոնք, իրար հետ պայմանավորվելով, մեկ օրվա մեջ տարբեր ապրանքների գները կարող են բարձրացնել իրենց ուզած չափով: Իսկ իշխանություններն էլ ցանկություն չունեն միջամտել այդ հարցում:

Բնականաբար, միջավայրի մասին այդքան դրական արտահայտվելու կողքին, թող նաև օրինակ բերեր, թե վերջին տարվա մեջ քանի՞ խոշոր ներդրող է Հայաստան եկել: Իսկ մենք գիտենք, որ անգամ ֆրանսիական Օրանժ ընկերությունն է մեր երկրից հեռացել:

Այնպես որ, նման արտահայտություններով հատկապես գործարարի վրա, ով իր անձնական գումարն է ներդնելու, որևիցե ազդեցություն չես կարող ունենալ:

Ուստի այդ այցն ընդամենը տուրիստական այց է, և այն որևէ գործնական հետևանք չի կարող թողնել:

– Իսկ Եվրամիության հետ կնքած համաձայնագիրն է՞լ որևէ ազդեցություն չի թողնի, երբ մենք ցանկանում ենք դրա շրջանակներում բարեփոխումներ իրականացնել:

– ԵՄ–Հայաստան համաձայնագիրը ոչ մի նշանակություն չունի, եթե դրանից բխող կետերն իրականություն չդառնան: Երբ կդառնան իրականություն, այդ դեպքում արդեն պատկերն այլ կլինի: Իսկ այս պահի դրությամբ այդ համաձայնագիրն անգամ Հայաստանի խորհրդարանը չի վավերացրել: Այնպես որ, դեռևս այդ համաձայնագիրն ընդամենը փիառ նշանակություն ունի:

– Իսկ կարո՞ղ ենք վարչապետի այս այցի մեջ քաղաքական նշանակություն տեսնել. որ նրա քաղաքական կողմնորոշումն արդեն արևմուտքն է:

– Մեկ այցով դու քո քաղաքական կողմնորոշումը չես փոխում: Մինչ այդ երկրիդ ներսում պետք է իրականացնես գործունեություն, որը կփաստի քո՝ որպես քաղաքական գործչի, արևմտյան արժեքների կրող լինելու մասին: Իսկ եթե դու իրականում արժեքային այդ համակարգի կրողը չես, ապա ոչ–ոքի չես կարող խաբել: Դա պետք է մեկընդմիշտ իմանաս: Այնտեղ հիմարներ չեն նստած:

– Եվ ի՞նչ է լինելու մեզ հետ. կրկին ընկղմված ենք մնալու ճահճի մե՞ջ:

– Դա կախված է արդեն նրանից, թե ո՞վ է լինելու ապագա վարչապետը: Եթե լինի ներկա նախագահը, ապա լճացումը կշարունակվի: Նույնն էլ՝ գործող վարչապետի պարագայում. քանզի նրանք նույն համակարգից են. տարբերություն չկա:

Եթե ընտրվի մեկը, թեկուզ և լինի իշխանությունից, բայց կապ չունենա գործող նախագահի թիմակիցների հետ, ապա հնարավոր է ինչ–որ զարգացում տեղի ունենա երկրում: Առավելապես, եթե ցանկություն ունենա բարեփոխումներ իրականացնել և հատկապես եթե նաև ունենա արևմուտքի ֆինանսական աջակցությունը: Այս դեպքում հնարավոր է, որ Հայաստանում կարճ ժամանակում տեղի ունենա էական առաջընթաց:

Այնպես որ, ամեն ինչ կախված կլինի ապագա վարչապետի անձից:

Շարունակությունը՝ «Փաստ» օրաթերթի այսօրվա համարում