Անվճար մուտք՝ առանց արտոնագրի. «Փաստ»

«Փաստ» օրաթերթը գրում է.

Այս տարվա հուլիսի 19–29–ն ընկած ժամանակահատվածում Հայաստան ժամանող օտարերկրյա քաղաքացիները կազատվեն մուտքի արտոնագրի տրամադրման համար նախատեսված պետական տուրքի վճարից: Այս մասին որոշման նախագիծը օրերս դրվել է շրջանառության:

Նշված ժամանակահատվածում Երևանում կայանալու են Հայ մարմնակրթական ընդհանուր միության հիմնադրման 100–ամյակին նվիրված տոնակատարություններ և 11–րդ բանակումներ: Հայ մարմնակրթական ընդհանուր միության (ՀՄԸՄ) հետ համատեղ մշակվել և իրականացվում են մարզամշակութային, կրթադաստիարակչական, քարոզչական և այլ ծրագրեր ու ձեռնարկներ, Հայաստան–Սփյուռք գործակցության զարգացմանը նվիրված երիտասարդական, մարզական և ընդհանուր հետաքրքրություն ներկայացնող այլ ծրագրեր, աջակցություն է ցուցաբերվում սկաուտական բանակումների կազմակերպական և համահայկական խաղերի իրականացման աշխատանքներին:

Սփյուռքի նախարարության 2018 թ. գերակա խնդիր է սահմանվել Հայաստան–Սփյուռք գործակցության մեջ երիտասարդական կազմակերպությունների դերի ակտիվացումը, որի համաձայն, նախատեսված է աջակցություն ցուցաբերել Հայ մարմնակրթական ընդհանուր միության հիմնադրման (ՀՄԸՄ) 100–ամյակին նվիրված ձեռնարկների իրականացմանը Հայաստանում:

«Հայրենի հողի վրա իրականացվող այս լայնամասշտաբ միջոցառումը հնարավորություն կտա աշխարհի տարբեր անկյուններից ժամանած շուրջ 1000 հայ երիտասարդներին ոչ միայն շփվել, բարեկամանալ, այլ, որ ավելի կարևոր է, ամրապնդել իրենց հայկական արմատները: Հայ մարմնակրթական ընդհանուր միության հիմնադրման 100–ամյակին նվիրված տոնակատարությունների և 11–րդ բանակումների մասնակիցները հիմնականում օտարերկրյա քաղաքացիներ են և ժամանում են տարբեր երկրներից ստանալով մուտքի արտոնագրեր»,– ասված է որոշման նախագծի մեջ:

Սփյուռքի նախարարության աշխատակազմի կողմից մշակված նախագծի ընդունմամբ հնարավոր կլինի լուծել մասնակիցների մուտքի արտոնագրեր ստանալու համար նախատեսված պետական տուրքի վճարման հարցը:

Այսպես, ՀՀ սփյուռքի նախարարը մինչև հուլիսի 10–ը ՀՀ արտաքին գործերի նախարարություն և Ոստիկանություն պետք է ներկայացնի Հայ մարմնակրթական ընդհանուր միության հիմնադրման 100–ամյակին նվիրված տոնակատարություններին և 11–րդ բանակումներին մասնակցելու նպատակով ՀՀ ժամանող օտարերկրյա քաղաքացիների ցուցակները:

Այնուհետև ՀՀ արտաքին գործերի նախարարը և ՀՀ ոստիկանապետը մինչև սեպտեմբերի 1–ը պետական տուրքի չափի մասին տեղեկատվություն պետք է ներկայացնեն ՀՀ սփյուռքի նախարարություն, որից հետո ՀՀ սփյուռքի նախարարը կառավարություն կներկայացնի առաջարկություն 2018 թ. պետական բյուջեով նախատեսված կառավարության պահուստային ֆոնդից մուտքի արտոնագրերի համար գումար հատկացնելու մասին:

Շարունակությունը՝ «Փաստ» օրաթերթի այսօրվա համարում