Սարգիս Սեդրակյան. «Ջրային համակարգում կադրային փոփոխություններ են անհրաժեշտ». «Փաստ»

«Փաստ» օրաթերթը գրում է.

Վարչապետ Կարեն Կարապետյանը Ջրային տնտեսության պետական կոմիտեի նախագահից հեղափոխություն է ակնկալում: Ըստ վարչապետի՝ մեր երկրում գյուղատնտեսությունը չի զարգանա, եթե Ջրօգտագործողների ընկերության շրջանում ռեֆորմ չլինի:

«Ֆերմերային շարժում» ՀԿ նախագահ Սարգիս Սեդրակյանը դժգոհ է ՋՕ–երի աշխատանքից: Նրան այդ մասին ամեն անգամ որևէ համայնք այցելելիս բողոքում են նաև գյուղացիները:

«ՋՕ–երի աշխատանքից գոհ չեմ, այդ համակարգը կարելի է պարզեցնել, կրճատումներ անել՝ կարելի է 4–5 հոգի աշխատողի փոխարեն մեկ լավ մասնագետ պահել: Ամեն անգամ գյուղացիներն ինձ հարցնում են, թե ջրի հարցը ո՞նց է լուծվելու: Սեզոնին, երբ ջուր էր լինում, մինչև գյուղացին փողը չտար, ջուր չէին տալիս, թողնում էին ջուրն ինքնահոս գնում էր Թուրքիա»,– «Փաստ»–ի հետ զրույցում ասաց Սեդրակյանը:

«Ֆերմերային շարժում» ՀԿ–ն կառավարությանն առաջարկել է ոռոգման ջրի դիմաց գանձումներ չանել: Նրանց առաջարկը, սակայն, թղթից գործի չի վերածվել:

Սարգիս Սեդրակյանը գտնում է, որ ոռոգման համակարգում առաջին հերթին կադրային փոփոխություններ են անհրաժեշտ:

«Առաջին հերթին ճիշտ կադրային քաղաքականություն պետք է տարվի: Ջրպետկոմի ղեկավարը պետք է լինի ջրերի մասնագետ, գործից հասկանա, գազի գրասենյակից մարդ են բերել ու դրել են ջրերի վրա, չի կարելի, մասնագետներ պետք է աշխատեն: Նույնը նաև գյուղացին է ասում՝ ջրից հասկացող մարդ դրեք, որ կարողանա աշխատել»,– նշեց մեր զրուցակիցը:

Տաք ձմեռը կարող է սառը հետևանքներ ունենալ գյուղատնտեսության համար: Սարգիս Սեդրակյանի խոսքով՝ ջրամբարների լցվածությունը նույնպես կախված կլինի եղանակային հետագա պայմաններից:

«Երաշտը հուպ տվեց, այս տարի ջուրը շատ քիչ է լինելու և գյուղատնտեսությունը վտանգի առաջ է կանգնելու: Սրա հետ կապված կսկսեն Սևանից ջուր բաց թողնելը, բայց գիտեք՝ այդ ջրի 70–80%–ը ճանապարհին կորչում է, 30%–ն է միայն մնում: Ես չգիտեմ, թե վարչապետն ինչ հեղափոխության մասին է խոսում, մեկ–մեկ այնպիսի ամպագոռգոռ բառեր են օգտագործում, որ մարդ զարմանում է»,– ասաց նա:

Սեդրակյանը փաստեց, որ այսօր ոռոգման համակարգը թերի է, մաշված խողովակների պատճառով ջրի 80% կորուստ է լինում:

««Հազարամյակի մարտահրավերներ» ծրագրով բավականին շատ դրամաշնորհներ բերեցին Հայաստան, որոնք հիմնականում ուղղված են ջրի կուտակման աշխատանքներին: Բայց այսօր որևէ խնդիր լուծելու համար ասում են՝ գումար չկա: Հսկայական գումարներ են բերում, ո՞ւր են գնում այդ փողերը»,– հարցրեց նա:

Նախորդ տարի էլ վարչապետը Ջրպետկոմից «գմփոց» ծրագիր պահանջեց, բայց խնդիրները չլուծվեցին: Ավելին՝ Արմավիրի մարզի Արմավիրի, Բաղրամյանի և Թալինի տարածաշրջաններում ամիսներով մի կաթ ջուր դաշտերին չի հասել: Այսօր պետությունը գյուղացուն կաթիլային ոռոգման տարբերակն է առաջարկում: Սա էլ, ըստ Սարգիս Սեդրակյանի, հարցի լուծում չէ, քանի որ այն հողագործի համար թանկ հաճույք է:

«Հիմա, գիտեք ինչ, բոլորին ասում են՝ գնացեք բիզնեսով զբաղվեք, երկիրը, մանավանդ գյուղացիները պարտքերի մեջ են՝ հարկերի, վարկերի, տոկոսների մեջ, այդ մարդը ո՞նց կարող է բիզնես անել: Գնում են Ռուսաստան գումար աշխատելու, բայց այնտեղ էլ հեշտ չի գումար աշխատելը: Գալիս են, ու բերած գումարներով հազիվ կարողանում են պարտքերի մի մասը տալ»,–ասաց Սեդրակյանը:

Շարունակությունը՝ «Փաստ» օրաթերթի այսօրվա համարում