Կոնսեսուսի ինչ–որ մոդել պետք է լինի. «Փաստ»

«Փաստ» օրաթերթը գրում է.

Ազգային ժողովը գնաճի թեմայով հունվարի 23–ին խորհրդարանական լսումներ կանցկացնի: Երեկ ԱԺ նախագահ Արա Բաբլոյանը ԱԺ տնտեսական հարցերի մշտական հանձնաժողովին հանձնարարեց լսումներին ապահովել բոլոր շահագրգիռ կողմերի մասնակցությունը:

Հայաստանի գործատուների հանրապետական միության նախագահ Գագիկ Մակարյանը, գնահատելով լսումների պրակտիկան, ազդեցությունն ու կարևորությունը, «Փաստ»–ի հետ զրույցում կարծիք հայտնեց, որ լսումներ կազմակերպելու նախաձեռնությունը բխել է նաև հանրապետության նախագահի անցկացրած խորհրդակցությունից: Ըստ նրա՝ սպասվող լսումները նշված խորհրդակցության կարևոր հետևանքն էին:

«Ճիշտ է, որ ԱԺ–ն նման լսումներ իրականացնի և առաջ ընկնի դեպքերից: Վերջին հաշվով՝ պատգամավորները ներկայացնում են ժողովրդի շահերը: Հետևաբար լսումները պետք է տեղին ու ժամանակին լինեն: Լսումներն ավելորդ չեն, ընդհակառակը՝ ես անգամ ուշացած եմ համարում: ԱԺ–ն այն տեղն է, որտեղ պետք է ոչ միայն կուսակցությունների, համապատասխան հանձնաժողովների, այլ պետական մարմինների, նաև տնտեսական բլոկի ներկայացուցիչներ ու փորձագետներ լինեն: Լսումները հետաքրքիր են նրանով, որ տարբեր տեսակետներ լսելով` հնարավոր կլինի հնարավորությունների ստեղծման, ինչ–որ լծակներ գործարկելու մի մոդելի գալ: Վերջին հաշվով՝ սա ինքնանպատակ չէ, որ լսենք, հետո ասենք՝ լավ է, վատ է, կամ ոչ մի ճար չկա, թողնենք ու գնանք: Առհասարակ գնաճից բխող խնդիրները պետք է դիտարկել սոցիալ–տնտեսական համատեքստում՝ տնտեսականն ու սոցիալականը միասին վերցրած: Գնաճը ենթադրում է, որ ձեռնարկությունների եկամուտները, հարկերն ավելանում են: Իսկ երբ տնտեսականից հեռանում ենք ու անցում կատարում սոցիալականի՝ մատնանշում ենք աղքատությունը, գործազրկությունը, որոնք կարող են սրվել առկա գնաճի հետևանքով: Հիմա ո՞րն է կարևորը՝ սոցիալականը, թե տնտեսականը: Կոնսեսուսի ինչ–որ մոդել պետք է լինի, որոշումները պետք է ներդաշնակ լինեն: Որքա՞ն մաս պետք է զոհաբերել հանուն տնտեսականի, և որքանը՝ հանուն սոցիալականի: ԱԺ–ն հենց նշվածը քննարկելու հարթակն է»,–ընդգծեց Գ. Մակարյանը:

Վերջինիս խոսքով՝ գնաճը զսպելու առումով պետական մարմինների աշխատանքը բավարար չէ:

«Կառավարության կողմից դեռ քայլեր չեն արվել, մինչդեռ պետական մարմինները պետք է կոնսոլիդացնեն իրենց ուժերը և համատեղ աշխատեն: Սոցիալ–տնտեսական վերլուծություններ չկան: Օրինակ, Աշխատանքի և սոցիալական հարցերով նախարարությունը հաշվարկ չունի, թե ռիսկ կա՞, որ թանկացումների հետևանքով աղքատության ցուցանիշը կավելանա: Վստահ եմ՝ այդ ռիսկը կա: Հիմա 29,4% է ու չի բացառվում, որ երկու ամիս հետո հասնի 35%–ի կամ նույնիսկ անցնի այդ թվից, որովհետև մարդկանց հնարավորությունները եկամուտների առումով նույնն են մնալու, բայց իրենք ամեն ինչ թանկ են գնելու»,–նշեց մեր զրուցակիցը՝ հավելելով, որ չկա նաև Տնտեսական զարգացման և ներդրումների նախարարության վերլուծությունն այն մասին, թե որքան նոր արտադրանքներ կլինեն թանկացումների հաշվին կամ որքան ներդրողներ կհայտնվեն:

«Ընդհանուր առմամբ՝ աշխատավարձերի, աշխատատեղերի, ընդհանուր ներդրումների, բիզնեսի եկամտաբերության կամ զարգացման առումով վերլուծություններ ևս չկան: Կենտրոնական բանկը ևս չունի այն վերլուծությունները, թե որքան գումար պետք է բաց թողնի պահուստային ֆոնդերից, որ գոնե ժամանակավոր զսպի գնաճը: ԿԲ–ն նաև չգիտի, թե որքան ժամանակ պետք է զսպի, իսկ հավերժ չի կարող: Մենք 100 միլիոն դոլարներ ենք ծախսել զսպման քաղաքականությունների վրա: Արդյունքում ոչինչ չենք ստացել, բայց փոխարենը ծախսել ենք պահուստային գումարները: Գնաճը զսպելու համար կարիք կա՞ այսքան անտեղի ծախսել գումարները»,– ասաց Գ. Մակարյանը:

Հայաստանի գործատուների հանրապետական միության նախագահը հայտնեց, որ ինքը ևս մասնակցելու է ԱԺ լսումներին ու տնտեսական մասով ելույթ է ունենալու:

Շարունակությունը՝ «Փաստ» օրաթերթի այսօրվա համարում